Toma: Savalia o le Malaga o le Faatuatua

Saunia e Michelle Dennis Christensen

Mekasini a le Ekalesia

O le tala a Toma ua faaali mai ai ia i tatou o fesili, onosai, ma le mauaina o se molimau o se vaega o le faatupulaia o lo tatou faatuatua ma le talitonuga maumaututu.

O le a le mea e oo mai i lou mafaufau pe a e faalogo i le suafa o le soo o le Faaola o Toma? E masani ona tatou faafesootaia lona igoa ma le “tagata masalosalo” po o le “masalosalo.”

Ae e tele atu isi mea ia Toma. I le Evagelia a Ioane, tatou te vaaia ai le malaga o le faatuatua o Toma e ono atagia ai o tatou lava faatuatua: E mafai ona faamalosia le faatuatua i le aluga o taimi pe a tatou talitonu ma galulue e faateleina lo tatou faatuatua.

E Le Afaina le I Ai o Fesili

Na valaauina e Iesu Keriso ia Toma e avea ma se tasi o Ana Aposetolo e Toasefululua, ma sa mulimuli Toma i le Faaola i Lana galuega atoa i le tolu tausaga. Sa ia te ia se alofa tuuto mo le Faaola. Ina ua fefe Toma mo le soifua o le Alii, sa ia uunaia isi Aposetolo, “Ia tatou o foi, ina ia tatou oti faatasi ma ia” (Ioane 11:16).

I lona tuuto, sa ia faia ai pea ni fesili. A o lei oo i Ketesemane, sa aoao atu e Iesu Ona soo o le a alu ese o Ia. “Na fesili Toma, “Le Alii e, matou te le iloa le mea e te afio atu i ai; matou te mafaia faapefea ona iloa o le ala?”

Na fetalai Iesu, “O a’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te a’u” (Ioane 14:5-6).

E pei o Toma, atonu tatou te le malamalama i aoaoga uma a le Atua po o vaega uma o le ata o le faaolataga. Ae o le faia o fesili amiotonu e mafai ona faaalia ai upumoni mai le Alii. E manaomia e tupu ai lo tatou faatuatua.

Na aoao mai Peresitene Russell M. Nelson:

“Afai e i ai ni au fesili—ma ou te faamoemoe e i ai—saili ni tali faatasi ma manaoga faatauanau ia talitonu. …

“… O au fesili faamaoni, e fesiligia i le faatuatua, o le a taitai atu ai e le aunoa i le faatuatua sili atu ma le iloa sili atu.”

Faatuatua ma le Fefe

Ina ua faalogo aposetolo ua toetu mai Iesu mai le oti, sa “e peiseai se talanoaga, latou te lei talitonu foi ia te i latou” (Luka 24:11). Atonu na umi atu le taimi o le masalosalo o Toma nai lo isi ona sa lei i ai o ia i le taimi muamua na faaali atu ai le Alii toetu ia i latou (tagai Ioane 20:24).

Ina ua uma ona latou fai atu ia Toma na o latou vaai i le Faaola, na ia faapea mai ai, “Afai ou te le vaai atu i ona lima i mea na tutui ai fao, ma tuu lo’u tamatamailima i mea na tutui ai fao, ma tuu lo’u lima i lona itu, ou te le talia lava” (Ioane 20:25).

Ina ua mavae aso e valu, sa toe faaali mai le Alii ma fai atu ia Toma e tagotago i Ona manu’a. I le tali atu, na alaga ai Toma, Lo’u Alii e, ma lo’u Atua e” (Ioane 20:28). Ona aoao mai ai lea e le Faaola o se upumoni taua: “Amuia o e le vaai mai, a e talitonu mai pea” (Ioane 20:29).

E oo mai tali. Ua aoao mai Elder David A. Bednar o le Korama Aposetolo e Toasefululua, “E faafofogaina tatalo uma ma le loto faamaoni ma e tali mai e lo tatou Tamā Faalelagi, ae o tali tatou te mauaina atonu e le’o mea ia sa tatou faamoemoe i ai pe oo mai foi i le taimi tatou te mananao ai, po o le ala foi tatou te faanaunau i ai.”

Talitonuga Maumaututu E Tumau

Pe a tatou maua tali e ala i le tumau, tatalo, ma faaaliga, e mafai foi ona tatou maua se talitonuga maumaututu—o se molimau. Afai e faaauau pea ona tatou faafaileleina lo tatou faatuatua, e mafai ona tumau lena molimau ia i tatou i le olaga atoa. E pei ona aoao mai Peresitene Nelson: “A o e faamamaluina ma le onosai le taimi a le Alii, o le a tuuina atu ia te oe le malamalama ma le malamalama e te sailia. O faamanuiaga uma o loo i ai i le Alii mo oe—e oo lava i vavega—o le a mulimuli mai. O le mea lena o le a faia e faaaliga faaletagata lava ia mo oe”

O le aafiaga o Toma ua faaali mai ai ia i tatou o le faatuatua e le o se taunuuga ae o se faagasologa. E faamamalu e le Atua lena faagasologa ma faamanuia i tatou a o tatou tumau i Lana taitaiga ma saili atu i le molimau o lo o aumaia le filemu i o tatou loto (tagai i le Mataupu Faavae ma Feagaiga 88:63).