Kaiafa le Faitaulaga Sili

E ui lava i lana matafaioi iloga, e laitiiti se mea ua iloa e uiga ia Kaiafa. E na o le faaiva ona ta’ua o ia i le Feagaiga Fou. Sa galue o ia o se sooupu i le va o tagata Iutaia ma tagata Roma. O ia o se Satukaio, o se vaega Iutaia i le taimi o Keriso sa le’i talitonu i le toetu (tagai i le Galuega 23:8).

Sa saunoa Kaiafa i le aufono ina ua uma ona faatuina e Keriso ia Lasalo mai le oti, o se vavega semanu e faapopoleina ai o ia ma isi Satukaio ona o o latou talitonuga.

Sa fuafuaina e le aufono afai latou te le faia se mea e tali atu ai i lenei vavega lauiloa, o le a talitonu tagata o Iesu o le Mesia, o le Tupu o tagata Iutaia, “e o mai foi tagata Roma, ona faaumatia lea o la tatou nei mea atoa ma lo tatou nuu” (Ioane 11:48).

“Tou te le iloa lava se mea e tasi,” na tali atu ai Kaiafa, “tou te le mafaufau foi, e aoga ia te i tatou, ona oti o le tagata e toatasi ma sui o le nuu, ina ia le fano le nuu uma lava” (Ioane 11:49–50).

Na tusia e le Aposetolo o Ioane e faapea na tautala Kaiafa “e lei fua mai ia te ia ona fai atu o lea mea: a ona o ia o le ositaulaga sili i lea lava tausaga, na ia vavalo ai o le a maliu Iesu e sui a’i le nuu;

“E le gata foi ona sui a’i o lea nuu, a ia faapotopotoina ia faatasi le fanau a le Atua ua taapeape” (Ioane 11:51–52).

Ua toe faaali mai le igoa o Kaiafa i le Feagaiga Fou ina ua fesiligia Keriso a o lei oo i Lona Faasatauroga.

“Ona fai mai ai lea o le faitaulaga sili, ua faapea mai ia te ia, Ou te fai atu ia te oe ia e tauto mai ia te i matou i le suafa o le Atua soifua, Po o oe le Keriso, o le Alo o le Atua” (Mataio 26:63).

Sa faamautu atu e Iesu e faapea o Ia: “O lea lava, ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o Ia i ao o le lagi” (Mataio 26:64). I le tali atu i lenei mea, sa toe teena ai e Kaiafa le Faaola. “Ona saeia ai lea e le faitaulaga sili ona lava ofu, ua faapea ane, Ua upu leaga o ia i le Atua” (Mataio 26:65).

E ui lava i le i ai faatasi ma le Faaola o le lalolagi, o le na muai faauuina e togiola mo agasala a tagata uma ma mafatia i tiga uma, faanoanoaga, ma puapuaga, sa le’i iloa e Kaiafa o Iesu o le Keriso, ma sa ia tausalaina o Ia.

Ua toe ta’ua foi Kaiafa i le Tusi Paia i le Galuega 4. O loo faamatala mai i faamaumauga le ala na faamalolo ai e le Aposetolo o Peteru se tagata sa pipili mai le fanau mai (tagai Galuega 3:1–8). Ma, a o la talai atu ma Ioane le Toetu o Keriso, sa puefaapagotaina i laua i lalo o le pule a le au Saneterini. Sa faafalepuipuiina i la’ua i le po ma aumai i luma o se aufono lea na aofia ai Kaiafa ma lona tamā faaletulafono, o Ana, le faitaulaga sili sa i ai muamua. (Tagai i le Galuega 4:1–6; tagai foi i le Ioane 18:13.)

Ina ua fesiligia po o le a le pule na la’ua faamaloloina ai le tagata, sa tali atu Peteru: “Ia iloa e outou uma, atoa ma le nuu uma o Isaraelu, o le suafa o Iesu Keriso o le Nasareta, o lē na faasatauroina e outou, o le ua toe faatuina e le Atua nai e ua oti, o ia lava ua tu mai ai lenei tagata ua malolo i o outou luma” (Galuega 4:10).

O le avanoa mulimuli lenei na tusifaamaumauina na maua e Kaiafa e talia ai Keriso. Nai lo lena, sa faamata’uina e le aufono ia Peteru ma Ioane. Ae o a latou taufaamata’u sa lei suia ai le upumoni o loo soifua Keriso. Tagai i le Galuega 4:13–22.)

E ala i le mana ma le pule a Iesu Keriso, na faamalolo ai e Peteru le tagata pipili. E faapena foi, e mafai ona tutupu vavega i aso nei e ala i le perisitua toefuataiina a Keriso ma e ala i le faatuatua i Lona suafa. O le lesona e mafai ona tatou aoao mai ia Kaiafa e faigofie lava. Na te lei taliaina Iesu o le Keriso, le Alo o le Atua, ae tatou te mafaia. Pe a tatou talitonu ia te Ia, o le a mulimuli mai faailoga, mea ofoofogia, ma vavega (tagai i le Mareko 16:17–18).