O Le Paseka ma le Eseta
Vaai pe mafai faapefea e elemene o le Paseka ona faasino atu i tatou i le taulaga togiola a Iesu Keriso ma a tatou feagaiga ma le Atua.
O le Paseka e faamanatu ai le laveaiina e le Alii o le nuu o Isaraelu mai le mala mulimuli o le faafanoga i Aikupito. E ala mai ia Mose, na ta’u atu ai e le Alii ia i latou e faatino ni faatinoga patino ina ia laaloa le agelu o le faafanoga ia i latou ma faasaoina lo latou ulumatua. Ona laveaiina lea o i latou e le Alii mai le nofopologa ma auina atu i latou i le nuu folafolaina. (Tagai Eseto 12.)
O elemene eseese o le Paseka ua faatusa i le taulaga togiola a Iesu Keriso mo a tatou agasala, faapea foi a tatou feagaiga ma le Atua.
Tamai mamoe
O se tamai mamoe poa e tausaga le matua e aunoa ma se pona.
Sa tapeina ona tunu lea i le afi, atoa—leai ni ponaivi na gau ma le ulu, vae, ma vaega e aina i totonu o loo pipii ai. Sa tatau ona aina i le po o le Paseka, e leai se mea na totoe i le taeao. Afai e i ai se mea na totoe, o le a susunuina.
Uiga e ono i ai: O Iesu Keriso o se taulaga e leai se agasala mo agasala; o le suamalie o le o mai ia te Ia e faatusatusa i le oona o le agasala; O le tuuto atoa o Keriso i Lana misiona; o le tuuto e manaomia mai ia i latou o e ua osifeagaiga ma le Atua.
Toto i luga o Laau Faalava ma Pou
O Hyssop (o se vao na faaaoga mulimuli ane i sauniga faamama) sa fufui i le pesini o le toto mai le tamai mamoe, ona tuu ai lea o le toto i luga o le laau faalava ma pou o le faitotoa.
Uiga e ono i ai: O se faailoga e faailoa ai le nuu o le feagaiga a le Atua; faamamaina e ala i le toto o Iesu Keriso, lea na faamaligiina e togiola ai mo a tatou agasala.
Areto e le Faafefeteina
O falaoa e faia e aunoa ma le fefete po o se isi mea faafefete, e foliga mai o le saito o le emmer, o le barley, po o le sorghum i Aikupito anamua. O le mea faafefete e faamalūlū ai le falaoa ae e sili atu foi ona faigofie ona leaga. Ma le isi, o paluga faafefeteina e manaomia le taimi e fefete ai, o lea e umi ai ona fai.
Sa aina mo aso e fitu. O le mea faafefete (lea sa fesootai ma le pala) sa tatau ona aveesea mai aiga taitasi i le taimi lea (tagai Esoto 12:19).
Uiga e ono i ai: Mama a’ia’i; faanatinati o le solaaga mai le faatagataotauaina; O Keriso o le Areto o le Ola (tagai 1 Korinito 5:7).
Laauafu Oona
Na aofia ai kapisi vai, lakisi, salaki oona, lakisi faamanogi, ma atonu foi ma isi laau-afu ma se tofo oona.
Sa latou taumafaina faatasi ma le tamai mamoe.
Uiga e ono i ai: Oona o le pologa ma le faatagataotauaina i Aikupito; oona o le pologa i le agasala; oona o mafatiaga o Keriso mo a tatou agasala.
Fusia Sulugatiti, Seevae, Tootoo i le Lima, Tutulai a o Aai
Uiga e ono i ai: Saunia mo le faavavevave o le solaaga mai le faatagataotauaina; manao mo le saolotoga mai le agasala.