O Soo i le Ala i Emau: O Se Malaga o Faaaliga ma le Aloaiaina

Saunia e Shaun Stahle

Mekasini a le Ekalesia

E talitutusa ma mea na oo i ai nei soo, e mafai ona mu o tatou loto i totonu o i tatou o se molimau i le Togiola ma le Toetu o le Faaola.

o soo o loo talanoa, ma Iesu o loo savali i tua atu

I le Aso Sa, o le aoauli o le Toetu, sa savavali ai soo e toalua i maila e valu (13 km) mai Ierusalema i Emau. Sa o se aso ootia—o ni nai aso ootia.

Na mafatia o la’ua loto. Sa faaosofia o la’ua mafaufau i le ofo ma le faanoanoa. Sa la’ua talanoa e uiga ia Iesu o Nasareta—Lona maliu, o tala o Lona toetu, ma le le mautonu o lona uiga atoa.

A o la savavali, sa faifaimalie ona auai atu se tagata ese i la la’ua talanoaga. O Iesu, e ui la te lei iloaina o Ia. Sa ufitia o la’ua mata ma sa puaoa lo la’ua malamalama. Na fesili atu le tagata ese, “O a ea ia upu ua oulua felafolafoai ai, o oulua o savavali, ma ua mata faanoanoa?” (Luka 24:17).

Sa tali atu se tasi o le au soo, o Kaleopa, ma le le talitonu i le mafai e soo se tasi ona matuā le iloaina, leai se iloa o mea maoae na tutupu lea na luluina ai Ierusalema i le faaiuga o lena vaiaso. “Pe na o oe ea lē aumau i Ierusalema, ma le le iloa o mea ua tutupu ai i ona po nei?”

“O a mea?” Sa fesili atu ai Iesu.

O la la’ua tali sa mai le loto ma vave: “O mea ia Iesu le Nasareta, o le perofeta lea sa malosi i mea na na faia, ma ana upu i luma o le Atua ma le nuu uma” (Luka 24:18–19). Sa la’ua fai mai sa la’ua faatuatua o le a togiola e Iesu Isaraelu, ae lea ua aso tolu talu ona maliu o Ia. Ma e ui ina sa lipotia mai e nisi o fafine se asiasiga a agelu o tautino mai o loo soifua o Ia, ae o Aposetolo o e na o atu e suesue sa lei vaai ia te Ia.

Ona fetalai atu lea o Iesu—e le o se tagata ese ae o se aoao. “O tagata valea, ma loto faigata ona talitonu i mea uma ua fai mai ai e le au perofeta” (Luka 24:25). Sa Ia faamalamalama atumau ia i la’ua, mai ia Mose e oo atu i perofeta uma, ma faaali atu mea e faatatau ia te Ia lava. Vaai faalemafaufau i le savavali mo le tele o itula faatasi ma le Alo o le Atua, le Alii o le ola, ma faalogo ia te Ia o faaliliu valoaga faaMesia. Sa amata ona masii ese lo la’ua faanoanoa, suia i le maofa ma le faagaeetia i totonu.

Nonofo ma i Ma’ua

A o latou latalata atu ia Emau, sa faia e Iesu e peiseai o le a afio mamao atu o Ia. Ae sa la augani atu ia te Ia “Tatou te nonofo ma i ma’ua nei: aua ua taugagaifo le la, ua lata i le afiafi” (Luka 24:29). Sa nofo o Ia faatasi ma i la’ua, saifau, ma tofitofi le areto.

E faatatau i le mea na sosoo ai, na tusia ai e Elder James E. Talmage (1862–1933) o le Korama a Aposetolo e Toasefululua: “Atonu sa i ai se mea i le faatauanau o le faamanuiaga, po o le ala i le tofitofiga ma le tufatufaina atu o le areto, na toe faate’iina ai manatuaga o aso na mavae atu; pe, atonu foi, sa la’ua iloa atu lima na tuia; ae, po o le a lava le pogai vave, sa la’ua tilotilo atu ma le toto’a i le la Malo Faaaloalogia, ‘ma sa pupula o la‘ua mata, ma sa la‘ua iloa o ia; ona mou ese lea o ia mai la la‘ua vaai’ [Luka 24:31].”

I le taimi na sosoo ai, sa laua liliu atu le tasi i le isi ma fai atu, “E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?” (Luka 24:32). O lena mu sa le o se fenumiai po o le fefe—o se faailoaga. “O lagona o loo faamatalaina ai o le molimau faaiu lea o le tulaga paia o le Alo paia,” na aoao mai ai Elder Bruce R. McConkie (1915–85) o le Korama a Aposetolo e Toasefululua.

O Le Tatou Lava Auala Patino i Emau

“O le a Lana fetalaiga ia te oe pe afai e mafai ona e savali ma talanoa ma Ia?” na fesili ai Elder Patricio M. Giuffra o le Fitugafulu.

E pei o le au soo, atonu tatou te le iloa o loo savali faatasi le Faaola ma i tatou, o lana tala lea. “Atonu tatou te le vaaia pe faapefea ona nofo o Ia faatasi ma i tatou, tauivi faatasi ma i tatou, galulue faatasi ma i tatou, ma tagi faatasi ma i tatou.” O mea faalavefau o le olaga—pe o tofotofoga po o manumalo—e mafai ona punitia ai Lona i ai.

E taitasi i tatou ma savavali i la tatou lava ala i Emau. I lena auala, tatou te feagai ai ma ma’i, vaivaiga, faaletonu tautupe, po o le faamaualuga lea e mafai ona oo mai ma manuia. Ae e le tatau lava ona tatou savavali na o i tatou, o le saunoaga lea a Elder Giuffra. “E mafai ona tatou valaaulia le Faaola e faatasi ma i tatou.”

A o tatou aoao e uiga ia Keriso, usitai i Ana poloaiga, tatalo, suesue i tusitusiga paia, mulimuli i perofeta soifua, ma valaaulia o Ia e mau faatasi ma i tatou, e amata ona tatou iloa Lana uunaiga. O le aioiga a le au soo—“Tumau ia i tatou”—e tatau ona fai mo i tatou lava, o le saunoaga lea a Elder Giuffra. Ma pe a oo i ai, o le a mu foi o tatou loto i totonu ia i tatou.