Sa Liua Lo’u Faavauvau i le Olioli

Ata na tusia e Briana Kranz

Ina ua 18 o’u tausaga, sa maliu ai lo’u tamamatua i le itu o lo’u tina. I lena taimi i lo’u olaga, e lei maliu lava se tasi e latalata mai ia te a’u. Sa ou iloa o le a tupu i se aso, ae ou te lei faamoemoeina e tupu faafuasei.

Sa lelei le soifua maloloina o lo’u tamamatua, ae e aunoa ma se lapataiga, sa mafatia o ia i le pe o le tino. Sa vave ona ave o ia e lo’u tinamatua i le falemai, ae na maliu o ia i le fa o aso mulimuli ane.

O le maliu faafuasei o se tasi mo le taimi muamua e tiga. O se mea uiga ese le auai o lo’u tamamatua i mea taua uma na tutupu i lo’u olaga ona mou ese atu lea o ia.

Ina ua mavae le falelauasiga, sa ou maua se auala e faamamalu ai le manatuaina o lo’u tamamatua ma lo ma taimi faatasi. Sa fiafia o ia e galue i lana loli ma faia isi galuega faatino. O le mea moni, ina ua puapuagatia o ia i lona mai stroke, sa i ai o ia i lona fale taavale o loo uuina se talafaamaunati i se tasi o ona lima, o loo galue e pei ona masani ai.

Sa ou filifili o le a ou galue foi i taavale. O le faia o lena mea e fesoasoani ou te lagona ai le latalata atu ia te ia. Sa ou liliu atu foi i le tatalo ma tusitusiga paia, lea na ou maua ai le filemu e agai ai i luma ma le faatuatua ma le faamoemoe i lona toesea ai.

“O loo i ai se toetu,” na faamanatu mai e le perofeta o Apinati ia te au, “o lea ua leai ai se manumalo i le tuugamau, ma o le tui o le oti ua faatoilaloina ia Keriso” (Mosaea 16:8).

O le maliu o lo’u tamamatua na fesoasoani ou te maua ai se vaaiga lea na atili anoa ai le Togiola a Iesu Keriso i lo’u olaga. E pei lava ona ou faamamaluina lo’u tamamatua e ala i le galue i taavale, sa ou iloa ai tatou te faamamaluina Iesu Keriso—ma mafai ona lagona le latalata atu ia te Ia—a o tatou taumafai e ola e pei ona sa Ia soifua ai, suesue i Ana afioga, faasoa atu Lana talalelei, ma faia “galuega a [Lona] Tama” (Ioane 10:37). O le faia o lena mea e aumaia ai se uiga loloto i le Togiola a le Faaola ma faateleina ai lo tatou faalagolago ia te Ia.

“Pe a tatou fetagisi i le faanoanoa po o le olioli, e malamalama lelei lava Iesu Keriso,” na aoao mai ai Elder Gerrit W. Gong o le Korama a Aposetolo e Toasefululua. E mafai e Ia ona i ai i taimi e sili ona tatou manaomia ai meaalofa maoae a le faavavau: le Togiola a Iesu Keriso, Toetu, Toefuataiga.”

Ua liua e Iesu Keriso lo’u faavauvau i le olioli. Ona o Ia ma Lana Togiola, ua ou iloa ai o le a ou toe vaai i lo’u tamamatua.