Liahona
Manatu e 20 mo Lou Vaitau o le Eseta
Liahona Mati 2026

“Manatu e 20 mo Lou Vaitau o le Eseta,” Liahona, Mat. 2026.

Manatu e 20 mo Lou Vaitau o le Eseta

Saunia e Kimmy Badal

Mekasini a le Ekalesia

Mai le talafatu masani, e tele auala e fatu ai tu ma aga masani e faatotonugalemu ia Keriso.

aitema eseese e fesootai i le Eseta

Ata na tusia e Christina McMaster

I le taimi o lana saunoaga i le konafesi aoao ia Aperila 2023, sa fesili ai Elder Gary E. Stevenson o le Korama a Aposetolo e Toasefululua, “E faapefea ona tatou faataitaia le aoaoga ma le faamanatuina o le Toetu o Iesu Keriso, le tala o le Eseta, ma le paleni e tasi, le atoaga, ma le ’oa o agamasani faalelotu o le soifua mai o Iesu Keriso, le tala o le Kerisimasi?”

Ua taulai atili atu nei tagata o le ekalesia i le lalolagi atoa i le vaitau o le Eseta. O nisi nei o gaoioiga faigofie, lelei e faatamaoaigaina ai ma faalautele ai le Eseta—ma tapuai ai i le Faaola—mo tagata taitoatasi, vaega, ma aulotu.

Manatu o Tagata Taitoatasi ma Aiga

  1. Fatu se filifili pepa ma ni mau po o ni upusii e faatotonugalemu ia Keriso ma tomanatu i se tasi i taeao taitasi i le masina e tau atu i le Eseta.

  2. O mea faitino e mafai ona faatusa i vaega eseese o mea na tutupu i le Eseta i tusitusiga paia. Mo se faataitaiga, o nisi tagata e faalele ni maua felanulanuai e manatua ai le toetu a’e o Keriso mai le tuugamau. Vaavaai mo mea faitino e faamanatu atu ai ia te oe le Faaola i le vaitau o aso malolo.

  3. O le faia o kata o le Eseta e mafai ona avea ma se auala fatufatuai e faasoa atu ai le malamalama o Iesu. Mafaufau e tuuina atu nei foafoaga i uo po o tuaoi e te auauna atu i ai.

  4. Sa faaaoga e soo o Keriso mea manogi e faamamalu ai o Ia i le taimi o Lona falelauasiga (tagai i leIoane 19:39–40). O le faaaogaina o mea faamanogi i au kuka o le Eseta e mafai ona taiala ai ou mafaufauga i lena taimi paia.

  5. Sa soifua Keriso e auauna atu i isi, ma e mafai ona tatou manatua o Ia i lenei Eseta e ala i le faia o lea lava mea e tasi. Tuu atu i tagata taitoatasi o le aiga e filifili se igoa ma faaalu faalilolilo le Vaiaso Paia e auauna atu ai i lena tagata.

  6. O nisi tagata e faaaogaina lala olive ma suauu olive e fai ma faamanatu o le filemu ma le taulaga togiola a Keriso. Atonu e mafaufau tagata o le Ekalesia e faaaoga nei elemene i teuga po o taumafataga e atagia ai le filemu e ofo mai e le Faaola.

  7. O nisi o autu mai le Eseta e sili atu ona paia, ma o le faaaluina o le taimi i le Vaiaso Paia mo suesuega filemu ma manatunatuga o se tasi lea o auala e manatua ai na vaega.

  8. O le Eseta o se faamanatuga o le lotofaafetai mo mea uma na faia e Iesu Keriso mo i tatou. Saili se taimi i le vaitau atoa e faatumu ai se puipui po o se pepa lautele o i ai se savali i ni auala e te faafetai ai mo le Faaola.

  9. I nisi vaega o le lalolagi, e faamanatuina le Eseta i se taimi o le olaga fou, ina ia avea le vaitau lava ia o se faamanatu vaaia o le Toetu o Keriso. Vaavaai mo se avanoa e savali ai i le natura ma talisapaia lenei faatusa.

  10. O le Mamoe o se taumafataga masani o le Eseta e faatusa ia Iesu Keriso o le Tamai Mamoe a le Atua, ua faaataata mai ai le Paseka o le laveaiga e ala i le taulaga (tagai i le Esoto 12; Ioane 1:29). O le laulau atu o le mamoe o se tasi lea o auala e mafai ai e aiga ona manatua le matafaioi a le Faaola i le faasaolotoina o i tatou mai le agasala e ala i Lana Togiola.

meapueata, nota o le musika, ma isi aitema

Manatu o Uarota ma Siteki

  1. O le anapogi ma le tatalo o ni auala mamana ia e fesootai ai ma Keriso. Mafaufau e faatulaga se anapogi a le uarota i le Vaiaso Paia mo se mafuaaga e taua i tagata i le lotoifale.

  2. I le taimi o le Kerisimasi, e fiafia tagata e toe faatino le vaaiga o le Soifua Mai o Iesu. Ona o le faaaloalo, tatou te le toe faatinoina mea na tutupu mai le Eseta, ae e mafai e uarota ona faia faigalotu e faamamafa ai aoaoga a le Faaola mai le Vaiaso Paia ma talanoaina le uiga o na vaaiga.

  3. Ona o le Toetu o Keriso, o le Eseta o se taimi o le faafouga. O le faatulagaina o se vaega e faamama le fale po o le fanua o se tasi atonu o se faamanatu aoga lea o lena autu.

  4. I nisi o eria o le lalolagi, o le tafuga o afi i le taimi o le Eseta e faatusa i le malamalama ua faatoilaloina le pogisa. O le tutuina o se afi po o se moligao e mafai ona faatusa i le Faaola o le Malamalama o le Lalolagi o lē na faatoilaloina le oti ma le agasala.

  5. O se vaega o se lesona, faasoa atu upu o viiga o le Eseta. Talanoa i le mataupu faavae ma molimau i fuaiupu taitasi.

  6. Valaaulia tagata o le ekalesia e faaali atu galuega o faatufugaga po o puega ata e atagia ai autu o le Eseta.

  7. E tele suafa ma faalagiga o Iesu, ma e tofu faaalia e i latou taitoatasi se mea e ese e faatatau i Ona uiga. O le o mai faatasi o se uarota e fai se faaaliga faatufugaga e uiga i [Ona suafa ma faalagiga] e mafai ona avea o se auala sili e taulai atu ai i vaega eseese o Keriso mo le Eseta.

  8. Mafaufau e fatu se tu masani o le tapuai e ala i musika, e faaaoga ai mau ma pese e mafaufau loloto ai i le taulaga ma le alofa o le Faaola. E mafai e se uarota po o se siteki ona faapotopoto e aoao ma usu viiga o le Eseta ma faasoa atu mau e faatatau i le Eseta.

  9. O Iesu Keriso, e mafai ai ona faavavau aiga. O le fuafuaina o se gaoioiga o talafaasolopito o aiga po o se malaga i le malumalu e mafai ona faamanatu atu ai i tagata o le ekalesia e uiga i lenei mataupu faavae i le taimi o le Eseta.

  10. O le ata e tusi i penisioka o se gaoioiga malie mo vaitausaga uma, ma o se gaoioiga o ata tusi i penisioka a lotu soofaatasi mo le Eseta, e mafai ona avea o se auala fatufatuai e faasoa atu ai ma maua ai molimau ia Keriso.