N̄e Anij Ej Ukōt Būrom̧ōj n̄an Lan̄lōn̄

Eta in Le Van N’gon Yolann. 14 iiō aō iiō, rūtto tata ilo baam̧le eo aō. Ewōr juon jatū ļaddik, im ewōr juon jatū leddik eo ekar mej ke ekar juon iiō im jimettan rūtto in jān kar juon nan̄inmej eļap.

M̧okta jān an leddik eo jatū kar ļotak, taktō ro raar jiron̄ kōm bwe liin ewōr juon an jorrāān in menono im bwe liin enaaj kar mour ium̧win jejjo wōt awa ko ālkin an ļotak. Ke kōm kar ron̄ ennaan in, baam̧le eo aō im n̄a kar bukwelōlō ilo jar, kajjitōk ippān Irooj eļan̄n̄e E emaron̄ kōtļo̧k bwe aitokļo̧k jidik an pād ippām. Aolep bon̄, kōm kar wōnm̧aanļo̧k wōt n̄an kōm̧m̧ane ejja kajjitōk in wōt.

Ilo Pāpode 13, 2019 eo, jinō ekar keotak leddik eo edik jatū. Awa ko raar eļļāļo̧k, im liin ekar pād wōt ippām. Raan ko im wiik ko raar eļļāļo̧k, im liin ekab de pād iturum. Taktō ro rekar jab maron̄ kōmeļeļeik kabwilōn̄lōn̄ in.

Ium̧win 18 allōn̄ ko, leddik eo jatim ekar bōktok eļap lan̄lōn̄ n̄an baam̧le eo am. Kōm kar kaorōk aolep raan ko am ippān leddik in.

Innām, ilo O̧kwōj 28, 2020 eo, leddik eo jatū ekar jako. Ikar būrom̧ōj—būruō ekar rup, im ikar jab kōņaan bōk jako eo an. Ikar jab kōņaan kwaļo̧k n̄an jabdewōt ewi jon̄an aō kar kakkōt, ak kōņaan kōnono kōn ekōjkan aō kar en̄jake.

Ekar bōk iien n̄an n̄a n̄an meļeļe, ak jidik kōn jidik ikar jino lo bwe Irooj ekar wōr an uwaak n̄an jar ko am E ekar letok n̄an kōm allōn̄ ko 18 raorōk—ekanooj ļapļo̧k jān an kar taktō ro kar ba enaaj kar pād ippām. Innām juon men em̧ool eļapļo̧k an kabwilōn̄lōn̄ ekar waļo̧k.

Ilo O̧kwōj 28, 2022—lukkuun ruo iiō ko ālkin an leddik eo jatū mej—jema ekar peptaij. Ikar obrak kōn lan̄lōn̄ bwe ļein ekar kōm̧m̧ane jokāālet in ālkin an m̧ōttan Kabun̄ in ium̧win 15 iiō ko. Alooje kabwilōn̄lōn̄ eo kōn mour eo an leddik eo jatū kar ukōt būruōn ļein. Ekar maron̄ in ukōt raan in ekkōmetak—O̧kwōj 28—n̄an juon eo elan̄lōn̄ n̄an baam̧le eo am.

Rainin, jinō im jema, ļaddik eo edik jatū, im n̄a kōmij m̧aanjabpopo n̄an deļo̧n̄e m̧weo im̧ōn Irooj bwe kōmin maron̄ liāp n̄an leddik eo edik jatū im erom juon baam̧le indeeo. Kiiō ij meļeļe bwe jako eo an leddik eo jatū ekar jab juon jem̧ļo̧k—ekar ijjino in iaļ eo an baam̧le eo am m̧aanļo̧k n̄an indeeo.

Ijeļā bwe Anij emour, bwe kōn Nejin, Jisōs Kraist, jemaron̄ aolep kajoorļo̧k ilo iien mālijjon̄ ko im apan̄ ko jej jelm̧ai (Pilippai 4:13).