Ikar Mijak in Kōnono ippān Bisop eo Aō—Elmen An Naaj En̄jake?

Ilo jinoin, iaar jab kea. Ikar watōke bwe kakien ko an Kabun̄ in rej kōbojrak anemkwoj ko ad. Iaar etal wōt im jar, bōtaab itulowa tata ikar en̄jake jab erreo im kar bōjrak jān bōk kwojkwoj eo ium̧win allōn̄ ko.

Innām Covid-19 eaar bōk jikin, ekar kabōjrak aolep kōttōpar ko aō. Ilo ejja iien eo wōt, ikar katak juon men ekōļo̧kjeņaō, rekar kakkajiririk eō. Ro jinō im jema rekar jab ba n̄an n̄a, im ikar pok jidik kōn lukkuun wōn n̄a.

Iaar en̄jake ettoļo̧k jān aolep men ko me ikar tōmaki. Ikar jeļā ij aikuj pukōt wōn eo lukkuun kar n̄a bar juon alen. Ke āliktata ikar ro̧o̧l n̄an kapijuknen, ikar kwaļo̧k aolep men n̄an ro jinō im jema—ekoba kāālet ko ikar kōm̧m̧ani. Ijello̧kin aer luki n̄a, raar uwaak kōn iakwe. Raar kakeememej eō wōn eo lukkuun n̄a: nejier m̧aan im m̧aan jitōnbōro nejin Anij.

Ikar kōņaan oktak. Ro jinō im jema raar rōjan̄ eō bwe in kōnono ippān bisop eo aō, jino jerbale ukweļo̧k, im pedped ioon pinmuur eo ekajoor an Rilo̧mo̧o̧r.

Ak ikar mijak! Iaar inepata kōn kaje ak ekajet kōn kāālet ko aō. Ekkā aō jab watōk ta eo armej rej ļōmņak kōn n̄a, bōtaab bisop eo aō ekar juon em̧m̧aan eo ekabwilōn̄lōn̄, im ikar jab kōņaan kainepatik e im ba ta ko ikar kōm̧m̧ani.

Ak ke Elder Scott D. Whiting jān Jiljilimjuonn̄oul eo ekar kwaļo̧k: “Jab kittileek jān ro renaaj iakwe im jipan̄ kom̧; ijjelo̧kin, ettōr n̄an er. Bisop ro rem̧m̧an, branch būreejtōn ro, im ritōl ro remaron̄ jipan̄ kom̧ tōpar kajoor in kōmour eo an Pinmuur eo an Jisōs Kraist.”

Bisop ro “rej kabwijer kii ko n̄an bōk jikin Irooj ilo aer jipan̄ ro uwaan Kabun̄ in ukweļo̧k.” Ijello̧kin jelm̧ae ekajet kōmmetak ke ikar kōnono ippān, men eo de eo ikar en̄jake ilo opiij eo an bisop eo ekar kaenōm̧m̧an. Iaar kile bwe Irooj ej leke e n̄an jipan̄ eō, im iaar en̄jake aō maron̄ bar leke e.

Bisop eo aō ekar kōketak eō n̄an katak kōn Rilo̧mo̧o̧r im Pinmuur eo An kōn kalōk imminene ko ilo jetōb. Ikar kweilo̧k ippān bisop eo aō jān iien n̄an iien, im ekar kūrtok eō aolep wiik n̄an eoron̄ ennaan. Ikar kanooj en̄jake iakwe aolep iien ikar kōnono ippān.

Āliktata, kōn jipan̄ eo an bisop eo aō, ikar bōjrak jān aō kōm̧m̧ani men ko rejjab em̧m̧an. Ikar ikūm̧kūm̧ wōt kōn bōk kwojkwoj bar juon alen. Ikar ke lukkuun erreo—men̄e ālkin ukweļo̧k eo ikar kōm̧m̧ani?

Bōtaab bisop eo aō ekar kallim̧uri eō. Ekar kakeememej eō bwe ijjab aikuj in weppān—in pokake wōt. Iaar kōm̧m̧ane ijo em̧m̧an tata ippa, im Rilo̧mo̧o̧r ekar jeļā men in im naaj kar wōnm̧aanļo̧k wōt in jeorļo̧k aō bōd ilo aō pedped ioon An menin letok an ukweļo̧k.

Sister Tamara W. Runia, Rikakpilōklōk eo Kein Kajuon ilo Būreejtōnji eo Eutiej an Doulul eo an Jiron̄ ro, ekar kwaļo̧k “Itok n̄an Kraist ej ba, ‘Kwonaaj ke jipan̄ eō?’ kōn kōjatdikdik, juon kam̧ool kwaļo̧k bwe pā ko Pein rej eļļo̧k n̄an kwe aolep iien.”

Ālkin en̄jake in, iaar jino bar kōkāāl bujen ko aō kōn kwojkwoj eo kōn lōke. Iaar en̄jake āinwōt juon armej kāāl, kōn juon ļōmņak kāāl kōn wōn lukkuun n̄a im ta eo imaron̄ kōm̧m̧ane kōn jipan̄ eo an Irooj. Men̄e ikar etal im mijen kōnke ālkin kam̧oole ewi jon̄an an menin letok eo an pinmuur eo an Rilo̧mo̧o̧r kar ukōt mour eo aō, ikar kōņaan jipan̄ ro jet lo kōjatdikdik eo E ej letok n̄an eō aolep raan.

Kien ko rejjab kōbōjrak anemkwoj ko ad—rej pād kōnke Anij ekōņaan bwe jen jeraam̧m̧an, n̄an eddōkļo̧k, im n̄an deoor jān aujiid an jerawiwi. Dilepān gospel eo an Jisōs Kraist ej iakwe eo An im Jemādwōj Ilan̄ n̄an kōj. Kōnke ikar en̄jake iakwe jab in eweppān, ij kajjion̄ in erom̧ āinwōt Er.

Menin letok eo Aer kōn ukweļo̧k eaar kobrak mour eo aō kōn lan̄lōn̄.