“Jokane ilo Jepļaaktok eo an Gospel eo an Jisōs Kraist,” Liaona, Jān. 2026.
Kōrā in Bujen ro
Jokane ilo Jepļaaktok eo an Gospel eo an Jisōs Kraist
Iaļ eo n̄an jepļaakļo̧k n̄an Anij ej lukkuun alikkar eļan̄n̄e jej tōmak im lōke ilo ad Rilo̧mo̧o̧r.
Kōn wōt likjab ko ad im jejkjek ko an mour in, jemaron̄ aolep jebwābwe jān Anij eo jaar jeļā im iakwe ilo mour eo ad m̧okta. Paotok eo an mour wabanban. Im kōn menin, E ekar letok n̄an kōj wāween ko n̄an lukwōj wōt kōj n̄an E, n̄an liāpe būruōd n̄an E, im n̄an jipan̄ kōj em̧m̧akūt jokane in wōt eo emaron̄ ilo kauwōtata ko an mour wabanban.
Ilo tōrein bata ko reļļap an laļin, jarin tariņae ro rekōn ņooji mine ko, ak kein kappokoļo̧k ko, ium̧win bwidej. Ekar wōr meļaaj ko reļļap jikin mine ko ņooji, im juon jarin tariņae emaron̄ m̧aajļok ilo aer jaje kōn meļaaj in mine ko im rej ebbokoļo̧k.
Ālkin pata ko, taujin mine ko rekar jab ebbokoļo̧k rej pād wōt, im elōn̄ armej ro ekoba ajri ro, kar jako mour ko aer ak ra ko ke raar etal n̄an meļaaj in mine ko ilo aer jaje. Doulul ko kar joļo̧k iien n̄an kappukot im kakōļļeik mine ko ilo meļaaj in mine ko kar kōjparok elōn̄ mour.
Mour in ej āinwōt juon meļaaj an mine. Rijum̧ae eo elukkun jeļā kapinjake kauwōtata ko bwe ren āinwōt jab jab kōmmetak im karuwainene, āinwōt juon jikin kallib aiboojoj. Ewōr an taujin iiō in imminene ilo kōm̧m̧ane menin. E ej juon ritijem̧ļo̧k ilo kōm̧m̧an bwe iaļ ko ren karuwainene me rej tōlļo̧k n̄an men ko rej waļok rōkauwōtata im kōmmetak.
Kar Tōl ilo Jokane n̄an M̧weo
Jemād ilo Lan̄ ejeļā ekōjkan dāpij kōj ilo jokane im ekar kakōļļeik iaļ eo n̄an tōlļo̧k kōj ilo jokane n̄an mweo. Aeet, elōn̄ kauwōtata ko im men ko reppen rej m̧ōttan wōt imminene eo ad ilo mour in. Bōtaab jemaron̄ joļo̧k kāālet ko me remaron̄ bōktok eddo ko im metak ilo bōro ko jejjab aikuj.
En̄in ej etke Jemād ekar letok n̄an kōj kien ko, menin letok eo an Jetōb Kwojarjar, rikanaan ro n̄an tōl kōj, im kajoor in bujen ekkejel ko Ippān im ad Rilo̧mo̧o̧r kōn kain̄i ko im bujen ko an tampeļ. Ijin wōt ilo Kabun̄ eo an Jisōs Kraist jej lo aolep kakōļļe ko rekajoor im kōjparok ko me maron̄ jokane tōl kōj n̄an m̧weo.
Elōn̄ kōjeram̧m̧an ko reļļap ilo an wōr rikanaan ro raan kein. Būreejtōn Hugh B. Brown (1883–1975), kar juon rikakpilōklōk ilo Būreejtōnji eo Kein Kajuon, ekar ba kōn juon iien ekōņono kar an ippān juon membōr in British House of Commons me ekar m̧oktaļo̧k juon riekajet. Em̧m̧aan in ekar ba ekar lōmņak Anij ejjan̄in kar kōnono n̄an armej ro ioon laļ in jān kar epepen eo kein kajuon, im Būreejtōn Brown ekar uwaak kōn kōmeļeļeik n̄an lein kōn Josep Smith im Jepļaaktok eo.
“Riekajet eo ekar jijet im kanooj ron̄jake,” Būreejtōn Brown ekar ba. “Ekar kajjitōk jet kajjitōk ko rekanooj in alikkar im n̄an etali, im ilo jem̧ļo̧kin intōrpiu eo ekar ba, ‘Mr. Brown, ij ļōmņak eļan̄n̄e armej ro am̧ rej kam̧oolol kōn aorōk in naan in am̧ Kwoj ke? … Eļan̄n̄e ta eo kwoj jiron̄ eō ej m̧ool, ej juon ennaan eo em̧m̧antata im ekar itok n̄an laļ in jān ke enjeļ ro raar kōjjeļā kōn ļotak eo an Kraist.’”
Anij ej kūr rikanaan ro kōnke E ej iakwe ro Nejin. Kōn ro Rikarejeran, rikanaan ro, E ekar kwaļo̧k karōk in lo̧mo̧o̧r eo An, karōk in m̧ōņōņō eo An n̄an tōl ro Nejin. Irooj ej kwaļo̧k n̄an rikanaan ro, rilolo ro, im ribōk revelesōn ro men ko ro jet rejjab loe. Rej riwaj ro ioon tawōr eo (lale Ezekiel 33:1–7) eo emaron̄ lo jān ettoļo̧k im kōjan̄ juon ainikien kakkōl n̄an aolep ro me renaaj ron̄jake, emakijkij iiō ko m̧oktaļo̧k. Ewōr juon aer jekjek karreilo̧k ejjeļo̧k ippād kōn wōt aer kōnono ippān Anij āinwōt ro Rikarejeran kar kōmālim. Ej kanooj in aorōk bwe jen aolep bōk naan in kam̧ool ko rem̧wilal, kōn rikanaan ro, rilolo ro, im ribōk revelesōn ro ad kiiō.
M̧ool ilo Jisōs Kraist
Ej penļo̧k n̄an kile ta in m̧ool ilo laļ in ad rainin. Ekanooj in lōn̄ ainikein ko rej itok jān elōn̄ jikin ko—Instagram, TikTok, Facebook, X, podcasts, cable news, im ko jet. Im kiiō kōn artificial inteligence, ak AI, ilo aolep men, em̧ool ej penļo̧k n̄an kile ta eo ej m̧ool im ta eo ejjab—ak em̧ool ta eo ej lukkuun! Pija in alooj ko rejjab m̧ool in remaron̄ kōm̧m̧an bwe en waļo̧k bwe juon ekar ba ak kōm̧m̧ane juon men me rejjan̄in kar kōm̧m̧ane. Enaaj lukkuun in pen n̄an kile m̧ool jen riab ilo iiō ko rej itok.
Ilo kweilo̧k eo an kein kajuon āinwōt Būreejtōn eo an Kabun̄ in ilo Eprōļ 2018 eo, Būreejtōn Russell M. Nelson ekar katakin:
“Ij lo̧udin̄din̄ kōn ilju im jekļaj eo. … Bōtaab ij barāinwōt kile kōn raan ko repād im̧aan. Jej mour ilo juon laļ eo me oktak in m̧wil im eļapļo̧k jab errā. Emakijkij an waļo̧k ilo social media im jerbal in etale ko im nuuj ko ilo kajjojo 24 awa rej jum̧ae kōj kōn naan ko rekakjon̄jon̄. Eļan̄n̄e jekōņaan bwe en wōr ippād jabdewōt kōjatdikdik ej etale juon men n̄an lale aorōk in elōn̄ meļeļe ko im katak ko an armej rej jum̧aeik m̧ool eo, jej aikuj in ekkatak n̄an bōk revelesōn.
“Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok. Jenaaj lo kakōlkōl ko rekabwilōn̄lōn̄ me Anij Jemed im Nejin, Jisōs Kraist, ej tōl Kabun̄ in ilo kautiej im aeboojoj. Ak ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar. …
“… Ij akweļap ippāmi n̄an kōļapļo̧k maron̄ in jetōb eo ami n̄an bōk revelesōn. … Kālet n̄an kōm̧m̧ane jerbal eo ekwojarjar emenin aikuj lan̄lōn̄ kōn menin letok eo an Jetōb Kwojarjar im eo̧ron̄ ainikien Jetōb eo emakijkijļo̧k im alikkarļo̧k.”
Ilo Kallm̧ur M̧okta bok in Amos 3:7 jej riit, “Ilo m̧ool Irooj Jeova ej jab kōm̧m̧an jabdewōt n̄e ab Ej kwaļo̧k pepe eo An n̄an ro ri karijeran, rikanaan ro” Āinwōt an anikien ko an laļ in eļaaj im ļapļo̧k an kareel, kōj kajjojo en emakijkijļo̧k im alikkarļo̧k ad aikuj maron̄ ron̄ ainikien eo emera an Jetōb bwe jen ron̄ im ļoor tōl eo an Irooj kōn rikanaan ro remour.
Anij ej Iakwe Aolep Ajri ro Nejin
Ilo jim̧or Kallim̧ur Ekāāl im Bok in Mormon, jej riit bwe Anij ej āinwōt juon inne, rainin, im indeeo (lale Hibru 13:8; Mormon 9:9). Anij ej iakwe aolep ajri ro Nejin ilo raan kein ad jon̄an wōt kar iakwe ro Nejin ilo iien ko etto, im kōnke E ej iakwe aolep ajri ro Nejin, E ej kōm̧m̧ane kiiō ta eo E ekar kōm̧m̧ane etto. E ej kakōļļeik meļaaj in mine eo an mour wabanban kōn kien ko n̄an kōjokaneik wōt kōj ilo iaļ eo; rikanaan ro n̄an kōjan̄ ainikien kakkōl eo ilo aer lo kauwōtata ko im̧aan; im bujen ko an priesthood me rej kobaik kōj ilo jokaneļo̧k n̄an Anij.
Ilo ad likūt ad tōmak ilo Rilo̧mo̧o̧r im lōke E, E enaaj tōl kōj ilo jokane n̄an m̧weo kōn unoojdikdik ko an Jetōb Kwojarjar, kōn jeje ko etto im raan kein; kōn ainikien ko an rikanaan ro, rilolo ro, im ribōk revelesōn ro raan kein; im kōn ekkejeļ ko rem̧wilaļ Ippā im Jemād ilo Lan̄ kar kapidodoik kōn kain̄i ko im bujen ko an tampeļ.
Ejjeļo̧k bar juon ewōr kain tōl im ba kajjien eobrak, jokane im kōjparok, im kadeeor, kaenōm̧m̧an, im kōjatdikdik ilo Kraist jān ijin ilo gospel eo kar kōjepļaaktok an Jisōs Kraist im ilo Kabun̄ eo An kar kōjepļaaktok.