Ukweļo̧k Ejjab Wōt Kōn Anjo̧ Ioon Jerawiwi

M̧okta jān mijen eo aō, mour eo aō ekar jab weppān, bōtaab ekar em̧m̧an. Ekar em̧m̧an ippa college im ekar ejaake juon jemjerā eo em̧m̧an tata ejjan̄in wōr aō. Ikar lukkuun m̧ōņōņō.

Ikar jeļā bwe jerbale juon mijen enaaj kar iadjon̄jon̄. Mekarta, ekar wōr ippa kōtmene in bwe jerbale juon mijen enaaj kar allōn̄ ko 18 rem̧m̧an tata in mour eo aō—kōn jejjo apan̄ jiddik.

Bōtaab ilowaan allōn̄ ko jiljino, m̧are eo an eo m̧ōtta ekar erom men eo ekāāl tata ilo laajrak in juon laajrak in men ko reppen ikar jab kōtmene. Em̧m̧akūtļo̧k n̄an bar juon laļ ilikin im katak juon kajin kāāl ekar kōm̧m̧an aō ajimakeke im kijooror. En̄jake in jab bōk āinwōt m̧ōttan mour in mijenede ekar kam̧ōkm̧ōk ilo ļōmņak. Em̧ool, ikar kōņaan ro̧o̧l n̄an ijo jikū.

Ikar m̧ōk im inepata, im ikar jab en̄jake āinwōt Anij ekar letok n̄an eō kōjatdikdik im m̧ōņōņō eo me ikar kanooj aikuji. Ālkin lali jekjek ko jet ikar oktakļo̧k n̄an juon kallim̧ur jān kōjeraam̧m̧an in petriak eo aō: bwe inaaj en̄jake iakwe eo an Jemādwōj Ilan̄ kōn jeje ko rekwojarjar.

Iaar likūr jeje ko rekwojarjar, iaar lo aō make keidik n̄an bwebwenato eo an Iv. Liin kar kadiwōjļo̧k jān paradise im n̄an juon āne jem̧ade emarok im aeto, eo ekar āinwōt wāween aō kar en̄jake. Ainļo̧k wōt en̄jake eo aō, oktak eo an Iv ekar itok kōnke kōn juon kāālet ejenolo̧k. Iaar ļōmņak eļan̄n̄e liin ekar baj būrom̧ōj kōn kāālet eo an, āinwōt aō kar jino būrom̧ōj kōn kāālet eo aō n̄an jerbal.

Bōtaab Iv ekar ewōr juon an erreim̧aanļo̧k elo̧ļeļo̧k jān n̄a. Em̧ool men̄e liin ekar jerwane aolep men, ke liin ekar katak bwe ewōr juon an Rilo̧mo̧o̧r, liin ekar “m̧ōņōņō, im ba: Eļan̄n̄e ar jab kōn bōd eo ad … jamin naaj kar jeļā em̧m̧an im nana, im lan̄lōn̄ kōn lo̧mo̧o̧ren eo ad” (Moses 5:11).

Liin ekar jab būrom̧ōje kāālet eo an. Liin ekar kam̧m̧oolol kake! Men̄e liin im Adam kar diwōjļo̧k er jān paradise, m̧ōņōņō eo kōn kar lo̧mo̧o̧ren ekar em̧m̧anļo̧ke jān metak im jako eo an. Ilo m̧ool, ekar āinwōt lo̧mo̧o̧ren ekar bōkļo̧k n̄an e eļapļo̧k lan̄lōn̄ jān eļan̄n̄e ekar jab aikuj n̄an lo̧mo̧orene ļo̧k wōt n̄an jidik.

Ekōjkan an maron̄ in kar?

Jemaron̄ in ļōmņak bwe ukweļo̧k ej n̄an wōt kōm̧akūļo̧k jerawiwi ko im m̧wil ko renana jān mour ko ad. Jekjek in kōm̧akūtļo̧k jab in emaron̄ in pen im jān iien n̄an iien kōmmetak, kōm̧m̧an an pidodo n̄an kobaik juon en̄jake nana n̄an naan eo.

Bōtaab ukweļo̧k ejjab kōn wōt erom dikļo̧k jerawiwi. Ej barāinwōt n̄an erom āinwōt Kraist.

Oktakļo̧k n̄an E—ukōt m̧wil ko ad im kōjjepaan wōt erreim̧aanļo̧k eo ad ippān eo An—ej juon jekjek in ukweļo̧k barāinwōt.

Iaar kile bwe aō illu im ajimakeke, errim̧aanļo̧k eo aō ekar aidikļo̧k. Ikar kanooj kalimjōk wōt ta eo ikar jako jāne jon̄an ikar likjab in lo ta eo ikar bōke: juon jemjerā epaakeļo̧k aō Rilo̧mo̧o̧r.

Iaar kile iaar aikuj in ukweļo̧k kōn nana eo an m̧wiliū. Ekar bōk iien, bōtaab ke ikar akweļap kōn jipan̄ eo an aō Ripinmuur, kar kallim̧uri eō bwe “ilo mour in inaaj lan̄lōn̄” (Moses 5:10).

Iaar būrom̧ōj wōt bwe iaar jako jān kōm̧are eo an eo m̧ōtta, bōtaab ilo iien eo, Irooj eaar uwaakijar ko aō. Ikar kanooj m̧ōņōņō kōn eo m̧ōtta, im ikar lo ekanooj ļap lan̄lōn̄ ilo naan in kam̧ool eo aō bwe Jemādwōj Ilan̄ ej lukkuun lo im iakwe aolep kajjojo ajri ro Nejin. Ikar bōk ekanooj ļap jān jon̄an eo ikar jako jāne.

Sister Kristin M. Yee, Rikakpilōklōk eo Kein Karuo ilo Doulul eo Eutiej an Kōrā ro, ekar kwaļo̧k “Ukweļo̧k ej kōm̧m̧an bwe jen maron̄ en̄jake iakwe eo an Anij im n̄an jeļā im iakwe E ilo wāween ko jeban kar maron̄i.”

Kōn wōt ukweļo̧k, ijeļā kiiō bwe n̄e ij epaakeļo̧k Kraist, “Ear kōm̧m̧an āne jem̧aden ie bwe en āinwōt Iden, im [aō] āne jem̧aden in bwe en āinwōt jikin kallib an Jeova; renaaj lo lan̄lōn̄ im aenōm̧m̧an ilowaan” (Aiseia 51:3).

Ke ikar jepļaak n̄an ijo jikū jān mijen eo aō, ikar jab ro̧o̧lļo̧k n̄an paradise. Mour eo ālkin mijen ej kiiō juon āne jem̧aden kāāl n̄an n̄a n̄an jelm̧ae. Ejjab pidodo, im jet iien ij on̄ļo̧k wōt kōn mour eo aō m̧okta jān mijen.

Bōtaab ijeļā bwe kōnke kōn Kraist, aō lan̄lōn̄ naaj kam̧wilaļļo̧k jeļā eo kōn lo̧mo̧o̧ren eo aō.