Iaar En̄jake Aenōm̧m̧an

Pija jān Allen Garns

Ke iaar bōk ruo kūr ko an Kabun̄ in āinwōt juon rikōjan̄jan̄ ilo ejja wiik eo wōt, iaar jino inepata ekōjkan aō naaj lo iien n̄an kakūrm̧ool eddo ko jet aō ilo m̧weo, jerbal, im jikuuļ. Ilo būruō, ikdeelel eo aō eļap tata ekar n̄an jerbal n̄an Irooj im bōktok Jetōb eo An n̄an armej ro ilo aō kōkōm̧anm̧anļo̧k tōļan ko aō. Ijoke, ikar en̄jake, likjab eo kōn jab maron̄ in jokāālet n̄an eō make n̄an kūr ko aō rekāāl āinwōt ikar kōņaan.

Wiik eo tok juon, aikuj eo jān n̄a ilo kom̧bani eo ijo ikar jerbal ie ekar ļap. Kōnke elōn̄ wōt iaan jerbal ko aō rekitbuuj taib, peiū im tulōn̄ in lo̧bden peiū raar jinoi metak. Iaar inepata n̄e imaron̄ kar kōjan̄jan̄ piano eļan̄n̄e metak eo aō eban jako.

Ilo Jabōt, ke ikar kōjan̄ al ko m̧okta jān jar ilo piano eo an jikin jar eo, m̧ajeļ ko aō raar jino bar metak. Iaar m̧ōkaj in jar ilo būruō, kajjitōk kōn kajoor n̄an kōjan̄jan̄ wōt.

Ilo iien kwojkwoj eo, ikar kile bwe al eo tok juon kar jikejuuļi ekar juon eo ijjan̄in kar kōjan̄e ilo juon tōre aitok. “Ke metak ko aō raar jab dikļo̧k,” iaar ļōmņak, “kiiō ij aikuj kōjan̄e juon alin jar epen.” Ej iien eo ikar riiti naan kein, eo ekar lukkuun ba ta eo ikar en̄jake.

Ke ikar riit, ikar en̄jake aenōm̧m̧an. Ikar jeļā bwe Rilo̧mo̧o̧r eo ekar jeļā metak ko aō. Ālkin aolep men, E eaar en̄taan kaki (lale Alma 7:11–12). Ijjab aikuj in kar dibuki menin makeļo̧k. Ikar jab kōtmene, bōtaab ikar en̄jake Jetōb eo an Irooj.

Ke ikar jino kōjan̄jan̄, ikar en̄jake ejjeļo̧k bar metak, im note ko rekar jejjet n̄an addi in peiū. Iaar kile bwe jerbal eo aō kōpooj iaļ eo kōn kōmour im kar kepaakļo̧k eō n̄an Jemādwōj Ilan̄.

Ilo aō kejekļo̧kjeņ kōn en̄jake eo aō ilo piano eo, ijieļā ikar jab make kōjan̄jan̄. Kar im̧we eō kōn kajoor im jouj eo an Jisōs Kraist—juon en̄jake ilo jetōb me ekar itok kōnke ikar jerbal n̄an E. Ijeļā E enaaj aolep iien pād ijeņ n̄an jipan̄ im kōkajoor kōj eļan̄n̄e jej m̧ōņōņō in jerbal n̄an E.