Tiljek im Rikanaan ro—Etto im Kiiō

Juon men kōtmene, Setan ekar aolep iien kappukot n̄an kadikļo̧k lōke eo ilo rikanaan ro im rijilōk ro. Ālkin aolepān men kein, ilo aolepān bwebwenato er raar rikam̧ool ro im̧aan tata kōn etan Jisōs Kraist n̄an aolepān laļ in (lale Katak im Bujen Ko 107:23).

Ilo tōre in ad, rijum̧ae eo ej kappukot n̄an ko̧kkure ta eo Būreejtōn Russell M. Nelson ekar ņa etan “men eo eaorōktata ej bōk jikin rainin ioon laļ in,” aintok eo an Israel, eo ej aikuj itok m̧okta jān Itok eo Kein Karuo an Jisōs Kraist. Rikanaan ro im rijilōk ro rej kabwijer ki ko ilo aintok in. Kōn menin, er rej aolep iien jelm̧ae jum̧ae.

Men̄e ilo tōre ko etto ak ilo raan kein āliktata, Setan em̧ool ekar lo wāween ko n̄an m̧oņe jet iaan ajri in bujen ro nejin Anij n̄an tariņae ņae Rijilōk ro an Lamb eo, etto im kiiō jim̧or (lale 1 Nipai 11:34–36).

Erkein rej ļalem pedped in katak ko remaron̄ jipan̄ kōj bōbrae ad po ilo aujid in.

Tōmak ilo Irooj Jisōs Kraist

Eo m̧oktata iaan pedped in katak kein ej barāinwōt pedped eo m̧oktata an gospel eo: tōmak ilo Irooj Jisōs Kraist im Pinmuur eo An.

Tōmak ej ba kajjien. Būreejtōn Jeffrey R. Holland, Ripinej jenkwan Būreejtōn eo an Doulul eo an Jon̄oulruo Rijilōk ro, kar katakin bwe tōmak ej aolep iien ba kajjien ilju im jekļaj eo.

Ilo an tōmak eo ad ilo Kraist im lōke ilo Anij ļapļo̧k, jej “reim̧aanļo̧k kōn mejān tōmak” kKallim̧ur ko Aer raar kūrm̧ool (lale Alma 5:15; bar lale Mosaia 18:21; Alma 32:40). Ilo “Kom̧in Juon” keemem in kakeememej eo an 40th anniversary eo an 1978 revelesōn eo kōn priesthood, Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar karuwaineneik aolep n̄an “reim̧aanļo̧k ilo bōro kuk an tōmak eo ad im lōke ilo kallim̧ur eo an Irooj [lale 2 Nipai 26:33].”

Pedped in erreim̧aanļo̧k in ej kōm̧akūtļo̧k kōj n̄an kakūrm̧ool kallim̧ur eo an Būreejtōn Nelson ilo ejja ilo iien in wōt kōn “aenōm̧m̧an eweppā im jokkun wōt juon” im raan ke, āinwōt an Būreejtōn Henry B. Eyring, Rikakpilōklōk eo Kein Karuo ilo Būreejtōnji eo Kein Kajuon, katak katakin, “Irooj Jeova enaaj bar ro̧o̧ltok n̄an mour ippān ro me raar erom armej ro An im naan lo aer ippā doon, kōn juon bōro, koba Ippān im Jemādwōj Ilan̄.”

Kōn keidi, Setan ej pukot n̄an kōm̧m̧an bwe en kōm̧m̧an an ro nejin Anij jab maron̄ kōņaan kōm̧m̧an, reilikļo̧k n̄an jekjek ko etto, ennaan ko, ak katak ko—em̧ool jekdo̧o̧n ko kar kōmeļeļeik jān rikanaan ro im rijilōk ro raan kein. Āinwōt “em̧ōj jolaļļo̧k ri kinaakļo̧k ro jeim im jatōm̧ … raan im bon̄” (Revelesōn 12:10), ej jino kōraatt eo indeeo kōn rikanaan ro im rijilōk ro an Anij im katak ko aer. Menin ej ewejepedik an mere kadikļo̧k tōmak eo ilo jibadbad eo an kam̧ool eo aer, Jisōs Kraist—ej jibadbad ļapļap eo an.

Ennaan ko an bōro kuk, aenōm̧m̧an, im jokkuun wōt juon jān Rijilōk ro raan kein rej kalikkar bwe ilo an Setan wejepedik ilo jino kōm̧m̧an akweel im bōro jepel, en̄in ej iien eo n̄an aolep ajri in bujen ro nejin Anij (lale 1 Nipai 11:34–36) n̄an erom juon wōt ilo dāpij im jerbali m̧ool ko indeeo Anij ej kwaļo̧ki kōn rikanaan im rijilōk ro An. Kōn kōm̧m̧ane aindein, jemaron̄ erom juon wōt, m̧ōņōņō, kajoor, bujen, kumi in armej eobrak kōn tōmak kōn ejjeļo̧k kalijōkļo̧k kōn kil, kadkad in m̧aan ak kōrā, oktak in armej, ak ro jet rejjab jokkuun wōt juon.

Katak ko an rikanaan ro im rijilōk ro rej im̧we bōro kuk in im tōmak pen ilo Jisōs Kraist, eo enaaj aolep iien kōm̧akūt m̧aanļo̧k kōj.

Loe tōre in ad, Moronai ekar katakin ekōjkan ad maron̄ bōbrae jān erom kōrraate rikanaan ro im rijilōk ro: pedped in katak eo an jab liaakeļo̧k ak ekajet.

“Jab liaakeļo̧k eō kōnke aō jab wānōk,” Moronai eaar ba, ”im jab Jema, kōnke an jab wānōk, im jab er ro raar jeje im̧aan e; ak ijello̧kun in leļo̧k kam̧m̧oolol ko n̄an Anij bwe Eaar kōm̧m̧an im kaalikkar n̄an kom̧ jab wānōk ko ami, bwe kom̧in maron̄ jeļā n̄an jeļāļo̧kjeņļo̧k jān kar kōm” (Mormon 9:31; naan ko kar kobaiktok).

Ilo naan ko jet, jej mijōk im katak jān katak ko an rikanaan ro im rijilōk ro im kam̧ool kōn Kraist im gospel eo An im jab kalimjōk jab wānōk eo aer. Ilo aolepān bwebwenato, Anij eaar kwaļo̧k jet iaan jab wānōk kein n̄an em̧m̧an eo ad im n̄an jipan̄ kōj katak n̄an lo̧ļeļo̧k. Ij leļo̧k kam̧m̧oolol n̄an E kōn kōm̧m̧ane ainden.

Jekdo̧o̧n ta eo jej kab kōm̧m̧ane, jej aikuj mejmejkaruo. Ilo Eprōļ 2019 kweilo̧k eo eļap, Būreejtōn Eyring eaar kouti katak eo an Būreejtōn Geroge Q. Cannon (1827–1901), Rikakpilōklōk eo Kein Kajuon ilo Būreejtōnji eo Kein Kajuon: “Anij ekar kālet rikarejar ro An. Ej watōke āinwōt jim̧we eo An n̄an kakkure er, eļan̄n̄e rej aikuj in kakkure. Ejjan̄in letok menin n̄an kōj kajjojo n̄an kōnanaiki im kakkure er. Ejjeļo̧k juon armej, jekdo̧o̧n n̄e emaron̄ pād ilo tōmak eo, jekdo̧o̧n uteej in ilo Priesthood eo, emaron̄ kōnono nana kōn eo Irooj ekar kapit e im pukot ruwōn ippān ritōl ro routiej an Anij ioon laļ in ilo an jab kōm̧m̧an An jab m̧ōņōņō. Jetōb Kwojarjar eo enaaj em̧m̧akūt jān e jān armej eo, im enaaj etal ilo maroklep. Ilo jekjek in, kwoj ke loe an lukkuun aorōk bwe jen lukkuun tiljek?”

Kwe im n̄a ewōr ippād kōjeraam̧m̧an eo im kean̄ eo an Irooj ikkijien katak ko an rikanaan im jerbal ko, ekoba jabdewōt eo jemaron̄ in lo epen n̄an meļeļe ak bōke:

“Kom̧ naaj eo̧ron̄ aolep naan ko im kien ko an ko enaaj liwōj n̄an kom̧ āinwōt an bōki, etetal ilo kwōjarjar otemjej Im̧aō;

“Bwe naan an kom̧ naaj bōke, āinwōt n̄e jān Lo̧n̄iiū make, ilo aolep kōmmaanwa im tōmak” (Katak im Bujen Ko 21:4–5; naan eo kar kobaiktok).

Bar juon alen, jab liaakeļo̧k ak ekajet (lale Matu 7:1–2). Ke ikar bun̄m̧aanļo̧k kōn tōmak ilo Jisōs Kraist im kam̧m̧oolol kōn kōjeraam̧m̧an eo kōn rikanaan ro im rijilōk ro, em̧ōj aō kanooj jeraam̧m̧an eļap (lale Katak im Bujen Ko 21:6).

Pedped in katak eo bar juon aorōk ej n̄an bōbrae eļļāļo̧k jān mālim eo ad ak ļōmņak kōn eddo ko ejjeļo̧k ippād. Jekjek in ļōmņak kein rej m̧oņe kōj n̄an kanooj kaorōk ļōmņak ko ad make, eo ekka an waļo̧k n̄e jej kanooj kōjaorōk katak ko an rikanaan ro im rijilōk ro. Liakeeļo̧k rikanaan ro im rijilōk ro, ekoba ro m̧okta, ealikkar ej eļļāļo̧k jān mālim eo ad, ilo an Irooj dāpij maron̄ in n̄an E make. Ij lukkuun lōke bwe Rilo̧mo̧o̧r eo ad ejeļā men otemjeļo̧k, iakwe, im meanwōd ekar kōmeļeļeik ak naaj kōmeļeļeik im kijooror in meļo̧kļo̧k jabdewōt bōd ko ak jab wānōk ko an etto, ilo ad kōjatdikdik E enaaj kōm̧m̧ane n̄an kōj kiiō.

Bar juon waanjon̄ak kōn eļļāļo̧k jān mālim eo ad ej n̄an ļōmņak n̄an jiron̄ rikanaan ro im rijilōk ro āinwōt ta m̧akūtkūt ko Kabun̄ in ej aikuj būki ak ekōjkan an aikuj kakien e. En̄in ej jerbal eo an Irooj, ejjab ad Katak im Bujen Ko 28:2–7). Mekarta ewi jon̄an an em̧m̧an jibadbad eo ad maron̄ in, liaakeļo̧k im ļōmņak n̄an jiron̄ rikanaan ro im rijilōk ro jim̧or rej tōprak in utiej bōro im tōlļo̧k n̄an m̧oņ im likjab n̄an ļoor mālim eo an rikanaaan.

Jān 1820 n̄an kiiō, Irooj ekar wōnm̧aanļo̧k wōt in katak in rikanaan ro, rilolo ro im ribōk revelesōn ro An ilo jekjek eo revelesōn me E ej tōl Kabun̄ eo An.

Būreejtōn Nelson ekar katakin:

N̄e jej koba ippān doon āinwōt juon Ko̧o̧njeļ an Būreejtōnji eo Kein Kajuon im Doulul eo an Jon̄oulruo Rijilōk ro, ruum̧ in kweilo̧k ko am rej erom̧ ruum̧ in revelesōn. Jetōb eo ej alikkar an pād ie. … Men̄e jemaron̄ oktak ilo kōļmenļo̧kjeņ ko am ilo jinoin, iakwe eo jej en̄jake n̄an doon ej emakijkij. Bōro kuk eo ad ej jipan̄ kōj n̄an jeļā ankilaan Irooj kōn Kabun̄ in An.

“Ilo kweilo̧k ko am, ro rellōn̄ rejjāmin tōl! Kōmij ron̄jake doon im kōnono ippān doon m̧ae iien kōmij juon wōt bōro.”

Elder D. Todd Christofferson jen Doulul eo an Jon̄oulruo Rijilōk ro ekar loe menin: “Kōttōpar eo ejjab kōn ro uwaan ko̧o̧njeļ eo ak revelesōn jān Anij. Ej juon jibadbad ekitbuuj jim̧or kōttōpar im tōmak n̄an bōk ļōmņak im ankilaan Irooj.”

Jepļaaktok in, pād wōt ilo pedped in kōjparok eo ej kōļapļo̧k lōke ilo maron̄ eo kōn ritōl ro ad kiiō n̄an aolep iien tōl Kabun̄ in ekkar n̄an ankilaan Irooj.

Aaet, Jisōs Kraist ej jutak ijōbbōran Kabun̄ eo An, im E ej tōl rikanaan ro An. Ta eo jemaron̄ bōke āinwōt jab wānōk ko ilo naan ko aer ak jerbal ko aer maron̄ in, ilo m̧ool, ej kwaļo̧k jab wānōk ilo maron̄ in kile eo ad ak meļeļe eo ad ilo mour in. Keememej bwe iaļ ko an Irooj re eutiej jān iaļ ko ad im bwe ļōmņak ko An re eutiejjān ļōmņak ko ad (lale Aiseia 55:8–9) ekōm̧m̧an bwe jen joļo̧k ekajete rikanaan ro, ekoba ro m̧okta. M̧wiļ ettā in ej kōmaron̄ ad ron̄jaki wōt naan ko an rikanaan ro remour “ilo aolep kōmmaanwa im tōmak” (Katak im Bujen Ko 21:5; bar lale 1:28).

Ej barāinwōt jipan̄ kōj bōk eļapļo̧k revelesōn, kōjatdikdik, im tōmak ilo Kraist ilo juon laļ eo eļapļo̧k an pen. Jekab ekar katakin, “Kōmij lin̄ōri rikanaan ro, im ewōr ippān elōn̄ revelesōn ko im jitōbōn kanaan; im kōn aolep kam̧ool kein repād ippām kōmij bōk juon kōjatdikdik, im am̧ tōmak jab maron̄ idiki” (Jekab 4:6). Eļan̄n̄e jej ettā, en̄jake kein rekwojarjar remaron̄ bōkļo̧k jen kōj jabdewōt ikdeelel n̄an lo bōd an rikanaan ro im rijilōk ro, ekoba ro m̧okta Katak im Bujen Ko 88:124; 136:23). Ettā ej ipan̄ kōj “lin̄ōri rikanaan ro” n̄an m̧ool ko me rej kōļapļo̧k lan̄lōn̄ im aenōm̧m̧an eo ad im n̄an jab pukot jab wānōk ko.

Ilo mejatoto jab in, ij kam̧ool kōn m̧ool im kam̧ool ej iakwe bwe rikanaan ro jān Josep Smith m̧aantak raar rikanaan ro an Anij ilo juon juon kōllaajrak ekar jab rup an ribōk jikin eo juon n̄an im ekoba Būreejtōn Russell M. Nelson. Ekar juon jeraam̧m̧an eļap n̄an n̄a n̄an “lin̄ōri rikanaan ro” im n̄an epaakļo̧k Anij kōn katak ko an kajjojo iaer.

Ij kwaļo̧k kam̧ool bwe ro kar kūr n̄an doulul kwojarjar eo an rijilōk ium̧win tōl eo an rikanaan rein raar im rej rikam̧ool ro rein juon kōn etan Jisōs Kraist ilo aolepān laļ in. Ej juon kōjeraam̧m̧an n̄an reilo̧k im bun̄ wōnm̧aanļo̧k n̄an Jisōs Kraist kōn katak ko an rikam̧ool rein.