“Komwin āinwōt Anij ilo M̧wilōmi,” ̧Liaona, Jān. 2026.
Kom̧win āinwōt Anij ilo M̧wilōmi.
(2 Piter 1:4)
Jeļā eo kōn karōk in lo̧mo̧o̧r eo ej letok kōļmenļo̧kjeņ aorōk, ej kōkōm̧anm̧anļo̧k lan̄lōn̄ ko ad, im ej kōkajoorļo̧k kōj n̄an anjo̧ ioon idajon̄jon̄ ko ad im apan̄ ko.
Kraist Ej Kūr Ruo Rijilōk, jān Gary E. Smith
Rijilōk Piter ej kakeememej kōj bwe n̄an rikaļoor ro an Jisōs Kraist, An “kajoor ear letok n̄an kōj men ko otemjej rekkar n̄an mour im kōm̧m̧an e kwōjarjar, kōn jeļā eo ear kūr kōj ilo an aiboojoj im maron̄:
“Kōn men ko Ear letok n̄an kōj kallim̧ur ko An reļaptata im aorōk: bwe ilo er kom̧win āinwōt Anij ilo m̧wilōmi” (2 Piter 1:3–4; eoon eo kar kobaiktok).
Karōk eo an Jemādwōj Ilan̄ ej kōmeļeļeik kallim̧ur ko reļļap im raorōk n̄an kōmeļeļeik kadkadid im jibadbad eo ad indeeo.
Āinwōt kar kōmeļeļeik ilo “Baam̧le Eo: Juon Kean̄ n̄an Laļ in”:
“Aolep armej otemjej—em̧m̧aan im kōrā—kar kōm̧anm̧an ilo nememein wōt Anij. Kajjojo ej juōn jetōb jitōnbōro likao im jiron̄ nejin jined im jemed ilan̄, im, ilo āinwōt, kajjojo ewōr juōn mour kwojarjar im jipadpad ippān. …
“Ilo mour eo m̧okta, jetōb likao ro im jiron̄ ro raar jeļā im kabun̄jar n̄an Anij āinwōt eo Jemeer Indeeo im kar errā ilo karōk eo An eo me ajri ro Nejin remaron̄ kar bōk juon ānbwinin kanniōk im mour ioon laļ n̄an aer eddōkļo̧k n̄an aer weeppān im kile jemļo̧k eo aer ekwōjarjar āinwōt rijolete mour indeeo.”
Jemādwōj Ilan̄ ej kallim̧uri ro Nejin bwe eļan̄n̄e rej ļoor pedped ko an karōk eo An im waanjon̄ak eo an Nejin Jitōnbōro, kōjparok kein ko An, im niknik ilo tōmak n̄an jem̧ļo̧kin, innām kōn wānōk eo an Pinmuur eo an Rilo̧mo̧o̧r eo, renaaj “bōk mour indeeo, eo ej mennin letok eo eļaptata iaan mennin letok ko an Anij (Katak im Bujen Ko 14:7).
Jerbal eo an Anij ej kalimjōk eddōkļo̧k eo im mour ijo eutiejtata an ro Nejin. Aolep jekjek ko an karōk eo An kar ejaake n̄an kōjeraam̧m̧an ļaddik ro im leddik ro Nejin kōnke “aorōk in jetōb ko ekanooj ļap ilo [Mejān]” (Katak im Bujen Ko 18:10).
Karōk eo an Jemen
Ilo ko̧o̧njeļ eo ilo mour eo m̧okta, Jemādwōj Ilan̄ eaar kwaļo̧k n̄an jetōb ro Nejin karōk eo An kōn eddōkļo̧k im m̧ōņōņō eo aer indeeo.
“Jenaaj kōm̧m̧an juon laļ eo ioon rein remaron̄ jokwe;
“Im jenaaj mālejjon̄e er kake, n̄an lale eļan̄n̄e renaaj kōm̧m̧ani aolep men ko jabdewōt Irooj aer Anij enaaj jiron̄ er;
“Im ro rekar kōjparok pād eo aer kein kajuon renaaj kobaļo̧k ioon; im ro rekar jab kōjparok pād eo aer kein kajuon reban bōk aiboojoj ilo ejja aelōn̄ in kiin̄ in wōt ippān ro rekar kōjparok pād eo aer kein kajuon; im rekar kōjparok pād eo aer kein karuo renaaj bōk aiboojoj kobaikļo̧k ioon bōraer n̄an indeeo im indeeo.
“Im Irooj eaar ba: Wōn I naaj jilkinļo̧k? Im juon ar uwaak āinwōt eo Nejin Armej: N̄a e, jilkinļo̧k eō. Im bar juon ar uwaak im ba: N̄a e, jilkinļo̧k eō. Im Irooj eaar ba: I naaj jilkinļo̧k eo m̧oktata.
“Im eo kein karuo eaar illu, im kar jab kōjparok pād eo an kein kajuon; im, ilo raan eo, elōn̄ rekar ļooreļo̧k e” (Ebream 3:24–28).
Keememej bwe juon wōt kar karōk kar kwaļo̧k e ilo ko̧o̧njeļ eo ilo mour m̧okta—karōk eo an Jemen. Jemādwōj Ilan̄ ekar jab kwaļo̧k kajjitōk eo, “Ta eo jenaaj kōm̧m̧ane?” E ekar jab pukot uwaak, bōk kakkobaba ko jān juon, ak kajjitōk elmakot ko. Ijello̧kin, E ekar kwaļo̧k m̧ōttan ko im̧aan tata an karōk eo An im kar kajjitōk, “Wōn eo Inaaj jilkinļo̧k?” Aorōk tata eo an kajjitōk eo An ekar pedped ioon wōn eo kar aikuj in jilkinļo̧k n̄an kōm̧m̧ane koņ ko im ļam̧lam̧ ko an karōk eo An.
Kaje ko an jum̧ae eo an rijum̧ae eo rej barāinwōt kōmeļeļeik ilo jeje ko rekwojarjar.
“Kōn menin, kōnke men in Setan eaar jum̧ae Eō, im kappukot n̄an ko̧kkure anemkwōj in kāālet eo an armej, Iaar … leļo̧k n̄an e, im barāinwōt, bwe In leļo̧k n̄an e kajoor eo Aō make … , Iaar kōm̧m̧ane bwe ren jolaļļo̧k er;
“Im eaar erom Setan, … devil eo, eo jemān aolep riab otemjeļo̧k im n̄an m̧oņ im n̄an kapiloik armej raņ, im n̄an tōlļo̧k er n̄an rikōm̧akoko ilo ankilaan, em̧ool jon̄an wōt eo enaaj jamin eo̧ron̄ Ainikiō” (Moses 4:3–4; eoon eo kar kobaiktok).
Lucifer ekar jab kwaļo̧k juon karōk me kar kōjekdo̧o̧ne jān elōn̄ wōt ro raar bōk koņaer ilo ko̧o̧njeļ eo ilo moue eo m̧okta. E ekar jab baj juon eo ejjeļo̧k an meanwōd jān jabdewōt. E ekar jum̧ae! Utiej bōro, kabbil, im ļōmņak kōn e make ekar kōm̧m̧an bwe en ellowetak in jum̧ae karōk eo an Jemād.
Karōk eo an Jemād im Gospel eo an Rilo̧mo̧o̧r
Karōk eo ej kōmeļeļeik jerbal ko an Jemān im Nejin me ej kōm̧m̧an bwe en wōr n̄an aolep armej kōjeraam̧m̧an ko an mour indeeo.
Gospel eo an Jisōs Kraist ej ejaake juon wāween me jemron̄ bōk kōjeraam̧m̧an ko kar kallim̧ur kaki ilo karōk eo an Anij, em̧ool katak eo, pedped in katak ko, kain̄i ko, im bujen ko m̧aan im kōrā ro rej aikuj tōmak im ļoori. “Ejjeļo̧k bar juon āt ium̧win lan̄ ijello̧kun wōt in Jisōs Kraist … bwe armej ren mour” (2 Nipai 25:20). Ilo m̧ool, Irooj Jisōs Kraist ej “iaļ eo, m̧ool eo, im mour eo: ejjeļo̧k armej ej itok n̄an Jema, eļan̄n̄e jab kōn [E]” (Jon 14:6; eoon eo kar kobaiktok).
Būreejtōn Russell M. Nelson eaar kōmeļeļeiki:
“Karōk eo ekar aikuji Kōm̧anm̧an eo, im bwe erro jim̧or aikuji Wōtlo̧k eo im Pinmuur eo. Erkein rej m̧ōttan ko jilu raorōk tata an karōk eo. Kōm̧anm̧an an juon laļ aiboojoj kar itok jān Anij. Mour in im mej raar itok n̄an laļ in kōn wōt Wōtļo̧k eo an Adam [lale 2 Nipai 2:25; Moses 6:48]. Mour jab wabanban im maron̄ mour indeeo kar letok kōn Pinmuur eo an Jisōs Kraist [lale 2 Nipai 2:21–28]. …
“… Jej itok n̄an laļ in ilo juon iien ekadu, dipuki mālijjon̄ ko im idajon̄jon̄ ko ad, im pojak n̄an wōnm̧aanļo̧k im lōn̄ļo̧k n̄an juon iien koba ippān doon aiboojoj [lale Sam 116:15; Alma 42:8]. Ļōmņak ko im jerbal ko ad ilo ad pād [ilo mour wabanban in] naaj ilo m̧ool ļap wūnin eļan̄n̄e jej meļeļe karōk eo an Anij im rej kam̧m̧oolol kōn im pokake kien ko An” [lale Katak im Bujen Ko 59:20–21].”
Taitōļ ko an Karōk eo ilo Bok in Mormon
Jej katak m̧ool ko raorōk kōn kile im ekkatak elōn̄ taitōļ ko rooktak jān doon n̄an karōk eo an Jemād ilo Bok in Mormon: Bar Juon Kallim̧ur kōn Jisōs Kraist. N̄an waanjon̄ak, ļōmņak kōn waanjon̄ak in taitōl kein:
“Karōk in tūriam̧okake eo an Rikōm̧anm̧an Eļap” (2 Nipai 9:6).
“Karōk eo an ad Anij” (2 Nipai 9:13).
“Karōk in Lo̧mo̧o̧r eo” (Jarom 1:2; Alma 24:14).
“Karōk in Lo̧mo̧o̧r” (Alma 12:25, 26, 30, 32, 33; 42:11, 13).
“Karōk in jepļaaktok eo” (Alma 41:2).
“Karōk in m̧ōņōņō” (Alma 42:16).
“Karōk eļap an tūriam̧o kake” (Alma 42:31).
Kajjojo iaan taitōļ kein rej jipan̄ kōj ļapļo̧k an alikkar ad meļeļe kallim̧ur ko m̧oktaļo̧k an karōk eo an Jemād im ej kōkōm̧anm̧anļo̧k ļōmņak eo ad kōn jibadbad ko im meļeļe eo an mour wabanban ko ad.
Men eo aorōk tata, taitōļ eo emakijkij tata kar kōjerbalen̄an karōk eo an Anij ilo Bok in Mormon ej pedped ioon pinmuur eo ekar kapidodoik kōn Pinmuur eo an Jisōs Kraist.
Alma ekar kwaļo̧k, “Eļan̄n̄e en kar jab kōn karōk in lo̧mo̧o̧r, eo kar pād jān jino in laļ, enaaj kar jamin wōr jerkakpeje an ro remej; bwe eaar wōr juon karōk in lo̧mo̧o̧r ejaake, eo enaaj kakūrm̧ool jerkakpeje an ro remej, eo kar kōnono kake” (Alma 12:25).
Alma ekar ba, “Jino tōmak ilo Nejin Anij, bwe enaaj itok n̄an lo̧mo̧o̧ren armej ro An, im bwe enaaj en̄taan im mej n̄an pinmuur kōn jero̧wiwi ko aer, im bwe enaaj bar jerkak jān ro remej, eo enaaj kakūrm̧ool jerkakpeje, bwe aolep armej renaaj jutak Im̧aan, n̄an ekajet ilo raan eo āliktata im raan in ekajet, ekkar n̄an jerbal ko aer” (Alma 33:22).
Iaļ Eo Kar Kōpooje
Jetōb ko ad rej aikuj en̄jake juon en̄jake ekajoor im eddōkļo̧k kōn kam̧m̧oolol ilo ad ļōmņake karōn in lo̧mo̧o̧r eo eļap an Anij, pinmuur eo, jepļaaktok eo, meanwōd, im m̧ōņōņō. Jeļā eo kōn karōk in lo̧mo̧o̧r eo ej letok kōļmenļo̧kjeņ aorōk, ej kōkōm̧anm̧anļo̧k lan̄lōn̄ ko ad, im ej kōkajoorļo̧k kōj n̄an anjo̧ ioon idajon̄jon̄ ko ad im apan̄ ko.
Jemādwōj lan̄ ej jan̄unwaade n̄an ad bar ro̧o̧l n̄an kapijukene eo Ippān. E ej karuwainene im ej kallimūr kōn kōjeraam̧m̧an ko, bōtaab E ejjāmin n̄an jidik kipel, kiel, ak jiron̄ ilo kipel ad kōjerbal anemkwoj in kāālet eo ad ilo mour in E ekar letok n̄an kōj. Jej aikuj m̧akūtkūt im kāālet n̄an bar ro̧o̧l n̄an Ippān kōn ļoor waanjon̄ak eo an Nejin Jitōnbōro.
His Hand Is Stretched Out Still [Pein ej Eerļo̧k Ļok], jān Elizabeth Thayer
“Iaļ eo kar kōpooje, im eļan̄n̄e jenaaj reilo̧k jemaron̄ mour indeeo” (Alma 37:46; naan eo kar kobaiktok).
Ij m̧ōņōņō in kam̧ool bwe Jemādwōj Ilan̄ ej rikōm̧m̧ane karōk eo ekwojarjar n̄an ro Nejin. Jisōs Kraist ej ad Ripinmuur im ad Rilo̧mo̧o̧r. Im āinwōt juon Rijilōk ro an Irooj ilo raan kein āliktata, ij kam̧ool bwe E ej lukkuun “iaļ eo, m̧ool eo, im mour eo” (Jon 14:6; naan eo kar kobaiktok).