“Ijo Jerawiwi ej Kōm̧m̧an Tarpok,” Kraist ej Bōktok Aeņōm̧m̧an,” Liaona Jān. 2026
Jān YA Kajjojo Wiik
Ijo Jerawiwi ej Kōm̧m̧an Tarpok, Kraist ej Bōktok Aeņōm̧m̧an
Jekdo̧o̧n ilo ioļapān tarpok an mour, Kraist emaron̄ bōktok meram, karkan, im aeņōm̧m̧an n̄an jetōb eo am̧.
Kōm̧eļeļe jān Kate Birch
Mour ekōn ke tarpok … jidik?
En̄jake juon en̄jake in tarpok ej juon men jej aolep en̄jake jān iien n̄an iien. Kapokpok ko an laļ in rej kōm̧m̧an bwe en pidodo n̄an meļo̧kļo̧k bwe kōj jej armej in jetōb ko ewōr aer en̄jake ko an mour wabanban—juon me eo jekar jab kōm̧m̧ane m̧okta.
Ruo mennin letok ko Anij ekar litok n̄an kōj rej ānbwin wabanban im anemkwoj in kāālet. Menin letok kein rej kōmaron̄ ad en̄jake, kōņaan, im jerbal n̄an kōj make. Ilo m̧ool, men ko maron̄ en̄jaki rettoon ak jab jeļā kaki kōnke kōn kāālet ko an juon kōrā ak em̧m̧aan ilo lukkuun piktokin ej jorrāān n̄an kōm̧m̧ane.
Jej aolep kōm̧m̧ani bōd ko. Bōtaab n̄e jej kakkōt kōn jerawiwi ko ak m̧wil ko me jejjab maron̄ anjo̧ ioer, jekdo̧o̧ņ ewi jon̄an ad kajjieon̄ n̄an oktak, epidodo n̄an en̄jake juon en̄jake in pok. Kōn m̧ōttan jetōb eo ilo kōj ej iuunm̧aanļo̧k n̄an lan̄ im rejet eo an kanniōk ej kūnōōrļo̧k kōj n̄an laļ in, emaron̄ āinwōt juon iien kankanto ejjab bōjrak itulowa.
Men̄e jej kakkōt ippān men ko āinwōt ruruwe, illu, ekajet ilo jab jim̧we, joļo̧k eļap iien ilo media, kōjerbal pija nana ko, ak bar men ko jet, rijum̧ae eo em̧ōkaj an kwaļo̧k jook, jeļo̧k kōjatdikdik, im āliktata, tarpok ilo jetōb.
Jeraam̧m̧an n̄an kōj, Jemādwōj Ilan̄ im Jisōs Kraist rejeļā kile kōm̧am̧ōd tarpok eo.
Kappukōt Meram̧ eo An ej Bun̄tōn eo Jinoin
Ilo Kōm̧anm̧an eo–ijjino eo an aolep men jejeļā—laļ kar kōmeļeļeik āinwōt epād ilo juon tarpok: “Laļ ejjeļo̧k wāween, im ejjeļo̧k kobban, im e marok ioon mejān lo̧meto” (Jenesis 1:2). Tarpok in im maroklep in jeļo̧k kōjaktdikdik rej kein kakeememej kōn ekōjkan an rijum̧ae eo maron̄ kōm̧m̧an bwe jen en̄jake n̄e jej jerawiwi ak kōm̧m̧ani kāālet ko bwe rej jum̧ae aorōk ko ad. E ej lem̧ōņōņō in kōm̧m̧an bwe jen lokjak im emakijkij an kōketak kōj n̄an tileekek.
Bōtāāb āiņwōt an Sister Tamara W. Runia, Rikakpilōklōk eo kein Kajuon ilo Būreejtōnji eo Eutiej an Jiron̄ ro, kar ba: “Jisōs Kraist ej leļo̧k meram n̄an ro rej jijet ilo marok. Kōn menin, ilo raan ko me n̄e kwoj en̄jake bwe ainikien eo ej jiron̄ eok n̄an tileekek, bwe kwoj aikuj tileekek ilo juon ruum̧ emarok kwe make, ij kūr eok n̄an peran im tōmak ilo Kraist! Etetal ioon im oktakļo̧k n̄an Meram eo—ad Kōjatdikdik Emeram Eweppān.”
Ium̧win tōl eo an Anij, ilo iien Kōm̧anm̧an eo men eo jinoin Jisōs Kraist ekar kōm̧m̧ane n̄an kōjepeļļo̧k maroklep an tarpok im kar bōktok meram (lale Jenesis 1:3; Moses 2:2–5). Jān ijeņ, E ekar ilo̧k n̄an karōk aolep m̧ōttan tarpok ko, jān eo lan̄ ko reļļap n̄an ine eo edik tata.
Eļan̄n̄e E emaron̄ kar bōktok kōllaajrak n̄an laļ in, ļōmņake ta eo emaron̄ waļo̧k n̄e kwoj oktakļo̧k n̄an Nejin n̄an kajoor in kemour im lo̧mo̧o̧ren kajjojo raan. N̄e kwoj en̄jake āinwōt kweinene kōn apan̄ ko am̧ im maroklep an laļ in, pukotļo̧k meram eo an Kraist ej bun̄tōn eo im̧aan tata m̧aanļo̧k n̄an aenōm̧m̧an im laajrak ekwojarjar.
Eo tok juon, Keememej Wōn Kwe
Ālkin an lan̄ ko im laļ kar ejaak im kar kaiboojoje, Jemāedwōj Ilan̄ ekar kōpooj iaļ eo n̄an an ajri in jetōb ro Nejin itok n̄an laļ im bōk ānbwin kanniōk ko. Bōtaab ilo iien eo ad ioon laļ in, rijum̧ae eo ej buuļ jerbal n̄an kōm̧m̧an bwe jen meļo̧kļo̧k wōn kōj.
Jemaron̄ in loe kijejeto ko an n̄an kōm̧akūt kōj jān paotok kwojarjar eo ad ilo iien eo Anij ej kōnono n̄an rikanaan Moses im ej kwaļo̧k jeļāļo̧kjeņ ippān. Ilo Moses 1, Anij ej kōnono n̄an Moses kōn etan im āliji an kūr e Nejū m̧aan.
Bōtaab ilo iien eo wōt Anij ej em̧m̧akūt, Setan ej waļo̧ktok im kūr Moses “nejin armej” (Moses 1:12), māllijon̄ e n̄an meļo̧kļo̧k wōn lukkuun e.
Setan ej kōņaan bwe jen meļo̧kļo̧k wōn lukkuun kōj. E ej katōk pere ilo maron̄ eo ad n̄an oktak. E ej kōņaan bwe jen tōmak jej armej ilo lukkuun piktokin, em̧m̧aan ro im kōrā ro ejjab okak im aolep iien naaj.
Ak Elder Patrick Kearon jān Doulul eo an Jon̄oulruo Rijilōk ro ekar kakeemejmej kōj: “Kom̧ maron̄ itok n̄an Kraist kōn lōke ilo iakwe-im jouj eo An im bōk aolep mennin letok ko An kōn lan̄lōn̄, aenōm̧m̧an, kōjatdikdik, m̧ool, revelesōn, jeļāļo̧kjeņ, im māletlet. … Kom̧ij juon leddik ejitōn bōro nejin Anij, kom̧ij juon ļaddik eaorōk nejin Anij, im Ekar letok mennin letok eo An ewāppen, Nejin Ekwojarjar n̄an pinmuur e kom̧ rie kom̧ im kakwojarjar kom̧.”
Pinm̧uur ej juon men Setan ejjamin naaj wōr an. Im n̄e jej atartar ilo paotok kwojarjar eo ad, jemaron̄ ba, āinwōt kar Moses:
“Wōn kwe? Bwe lo, N̄aij juon m̧aan [ak leddik] nejin Anij, ilo jekjekin Nejin Eaar Make Keotake. …
“Ilo̧k jān ijin, Setan; jab m̧oņe eō; bwe Anij E kar ba n̄an eō: Kwe kwōj ilo̧kan jekjekin Nejū Iaar Make Keotake” (Moses 1:13, 16).
Eļan̄n̄e mour in ej āinwōt tarpok, bōjrak. Keememej paotok kwojarjar eo am̧. Kwaļo̧k m̧ool eo, bwe kwoj juon ajri jitōnbōro nejin Anij, kūno̧o̧rļo̧k eok n̄an lan̄. Oktakļo̧k n̄an Jisōs Kraist bwe E en maron̄ jipan̄ eok bar kōjepļaak ekkar eo n̄an jetōb eo am̧.
Āliktata, Kōtļo̧k an Kraist Ukot Tarpok n̄an Aenōm̧m̧an.
Ke Adam im Iv raar em̧m̧akūt jān Jikin Kallib Iden, men eo epidodo tata raar aolep iien ekar wōr ej bōk jikin kōn juon laļ ajimakeke im aeto. Ak Jemādwōj Ilan̄ ekar kallim̧ur bwe remaron̄ bōk aenōm̧m̧an kōnke E ekar kōpooj juon Rilo̧mo̧o̧r n̄an lo̧mo̧o̧ren er jān jerawiwi ko im būrom̧ōj ko aer (lale Moses 5:7–10).
N̄e kwoj en̄jake tōrjān jon̄an kōn mour in, keememej m̧ool in: Jemād Ilan̄ ekar jeļā jenaaj kar jelm̧ae kapo ko, kōm̧m̧ani bōd ko, im jerawiwiw ilo aolepān iaļ in ad ļo̧k n̄an kapijuknen n̄an Ippān—ekar aolepān m̧ōttan karōk eo.
Ilo bar jet naan, kōn Jisōs Kraist, Jemādwōj Ilan̄ emaron̄ aolep iien jipan̄ kōj luko̧rko̧reļo̧k kajoor ko an maroklep ilo mour im bōk jikinier kōn meram. Jekdo̧o̧n ta ewi lōn̄ in iien ko jej kōm̧m̧an bōd, kōnke kōn ad Rilo̧mo̧o̧r, jemaron̄ jāniji tarpok kōn aenōm̧m̧an ilo jetōb ko ad n̄e jej ukweļo̧k.
Būreejtōn Russell M. Nelson ekar kam̧ool:
“[Jisōs Kraist] enaaj kōkajoor eok. E enaaj kōjeraam̧m̧an eok kōn aenōm̧m̧an, em̧ool ilo iien ko reppen. …
“Jisōs Kraist ekar bōk ioon E make jerawiwi ko am̧, metak ko am̧ būrom̧ōj ko am̧, im m̧ōjņo̧ ko am̧. Kwojjab aikuj make eddodo kaki! E enaaj jeorļo̧k am̧ bōd ilo am̧ ukweļo̧k. E enaaj kōjeraam̧m̧an eok kōn ta eo kwoj aikuji. E enaaj kōmour jetōb eo am̧.”
Jekdo̧o̧n ta kwomaron̄ apan̄ kake, n̄e kwoj oktakļo̧k n̄an Jemād Ilan̄ im Jisōs Kraist kōn jipan̄, Er remaron̄ aolep iien bar kōjepļaak ta eo ej pād ilo kiojaļjaļ, kanemkwoj eok jān tarpok an jerawiwi ko im kapok ko, im kaiboojoj mour eo am̧.
Er rekar kōm̧m̧ane jān iien n̄an iien.