N̄an Rilo̧mo̧o̧r Kwoj Jab Jebwābwe

Kōmeļeļe jān Allen Garns, kōn mālim n̄an kwaļo̧k jin̄a eo an Del Parson The Lost Lamb (Lamb Eo Ejebwābwe)

Juon membōr in baam̧ļe im ļeo pāleen rekar jokāālet ejjab etto n̄an ilo̧k jān Kabun̄ in, ippānļo̧k ajri ro reddik nejier. Ennaan eo ekar kanooj kabūrom̧ōjm̧ōj n̄an baam̧le eo am. Ilo wiik ko tok jet, kōm kar kajjion̄ pukot juon bar wāween mour kāāl.

Raan ko tok ālkin kōjjeļā eo aer kar obrak kōn metak, kōmejaaļaļ ko, im jar ko an bōro n̄an Jemādwōj Ilan̄. Juon iaan uwaak ko em̧ōkaj an uwaake jar ko aō ekar bwe ij aikuj in kabun̄-jar ilo tampeļ aolep wiik. Āinwōt juon rijikuuļ im lio pālele im m̧am̧a, ikar loe bwe uwaak eo ekar āinwōt epen, bōtaab ikar kije n̄an pokake jon̄an wōt eo imaron̄e n̄an pokake.

Juon jota ālkin kar baj juon iien ilo jikin jerbal epen, ikar lukkuun en̄jake bwe ikar aikuj in kar etal n̄an tampeļ baj joteen eo. Ikar kajjitōk ippān ļaddik eo nejū n̄an itok ippatok n̄an kōm̧m̧an jerbal in initiatory.

Ke kōm kar tōparļo̧k ilo tampeļ eo, kōm kar jenolo̧k jān doon. Ke ikar jerbal in pinej jenkwan jet sister ro im kar ron̄jake kōjeraam̧m̧an ko aer kar kallim̧ur kake, ikar obrak kōn en̄jake. Ikar jab maron̄ bōkļo̧k ro uwaan baam̧le eo am rejebwābwe jān ļōmņak eo aō.

Ālkin aō dedeļo̧k, ikar jānij aō nuknuk kar etal n̄an ruum̧ in kōttar eo, im jijet. Ejjab to, ijo wōt ke, ikar en̄jake bwe ikar aikuj in jāniji jikin jijet ko aō bwe in maron̄ lo ļeo nejū n̄e ediwōjtok jān ruum̧ in jānij eo an em̧m̧aan.

Ikar em̧m̧akūt bōtaab ekar jab po būruō kōn aolep jikin ikar jijet ie—m̧ae iien eo āliktata ikar jijet ioon juon kauuj ej jitļo̧k n̄an dipin m̧weo iturinļo̧k kōjam in deļo̧n̄tok an tampeļ. Ej kab m̧ōj aō jibwetok jeje ko rekwojarjar, kajjion̄ kaeņōm̧m̧an būruō, ke ij reilo̧k lōn̄ļo̧k n̄an kiin m̧weeo.

Ijo, ikar lo juon enan̄in kilepān wōt likio in Rilo̧mo̧o̧r eo ej jibwe juon lamb edik ilo Pein. Jetōb eo ekar m̧ōkaj in kar kakeememej eō bwe ilo an ro uwaan baam̧le eo aō jitōnbōro raar jako jān ippa, er rejjab jako jān ad Rilo̧mo̧o̧r.

‟Armej ōt iaami jibukwi sip ippān, eļan̄n̄e juon iaer ejako, e jab likūt ruwatimjuonn̄oul im ruwatimjuon ilo āne jem̧aden, im ilo̧k ilokōnļo̧k eo e jako, n̄an tōre eo enaaj lo e?

“Im n̄e ej lo e, ej likūt e ioon aeran, im lan̄lōn̄.” (Luk 15:4–5).

Jej wōnmaanļo̧k wōt n̄an iakwe im jar kōn ro me em̧ōj aer jebwābwe. Bōtaab n̄e būrom̧ōj ej kalbubuik eō, ij keememej en̄jake eo, kōjatdikdik bwe juon raan, ro me raar jako naaj lo iaļ eo aer ļo̧k kōn jipan̄ jān juon Rilo̧mo̧o̧r em̧m̧an.