“Irooj Enaaj Tōl Eō,” Liaona, Jān. 2026.
Ainikien Armej ro Rekwojarjar ilo Raan Ko Āliktata
Irooj Enaaj Tōl Eō
Kōn tōmak, pokake, kijenmej, im jar, iaar katak bwe ij aikuj jab mijak kōn ilju im jekļaj.
Kōmeļeļe jān Allen Garns
Iaar rūttoļo̧k kōn al im jepooļ kōn al Ettōņak eo aō āinwōt juon ajri n̄an erom juon rial eo etijemļo̧k. Em̧ool ikar wiini jejjo iien jiāe al ko. Bōtaab ilo juon tōre ilo mour eo aō, ikar en̄jake an ejjeļo̧k aō ke ikar ļōmņak kōn jibadbad eo an Anij n̄an n̄a eļapļo̧k jān kile im nebar jān ro jet.
Ilo an gospel eo an Jisōs Kraist ļapļo̧k ilo mour eo aō ekar jipan̄ eō bōk tōmak ilo iien ko jab jeļā kaki. Ekar barāinwōt jipan̄ eō meļeļe bwe Jemādwōj Ilan̄ ekar kōņaan bwe in kōjerbal tōļan eo E ekar letok n̄an n̄a bwe in epaakeļo̧k E im kaiboojoj E.
Men̄e ikar bōjrak jān ettōņak eo aō, ikar en̄jake bwe ij aikuj wōnm̧aanļo̧k wōt in al im ekkatak al.
Ilo iien eo ej 25 aō iiō, iaar kadedeļo̧k aō ekkatak kōn architecture im bar ekkatak ilo BYU–Pathway Worldwide im Brigham Young University–Idaho, eo ekar jipan̄ kōkm̧anm̧anļo̧k aō maron̄ kōnono kajin pālle.
Innām juon kabwilōn̄lōn̄ ekar waļo̧k.
Ikar bōk juon kūr n̄an erom juon mijenede rial āinwōt m̧ōttan The Tabernacle Choir Gobal Participtan Būrookraam̧ eo. Ikar jab jeļā kake, bōtaab aolep men iaar kōm̧m̧ani ium̧win jet iiō ko remootļo̧k raar jipan̄ kōpooj eō n̄an iien in. Kūr in ekar uwaak in jar ko im ikdeelel ko aō. Jemādwōj Ilan̄ ejeļā jemļo̧kin eo jān jinoin im ekar kōtļo̧k aō al ippān Tabernacle Choir eo ilo Temple Square eo ilo kar Oktoba 2024 kweilo̧k eo eļap.
Kōn en̄jake in, imaron̄ kam̧ool kōn kajoor eo kōn tōl jān Jetōb Kwojarjar, kōn kijenmej, im lōke bwe Anij ewōr juon an jibadbae men̄e jemaron̄ in jab meļeļe jibadbad jab eo. Āinwōt kar kallim̧uri kōj, “emaron̄ jab alikkar iaļ eo aolep iien, ak jemaron̄ ļoor Rilo̧mo̧o̧r kōn tōmak bwe iaļ eo ad enaaj jemļo̧k ilo aiboojoj n̄an anjo̧ kōnke E enaaj tōl kōj ilo kōjparok n̄an ijo jej aikuji pād ie.”
N̄an ro rej kappukot iaļ eo aer im̧aan, jeļā bwe Irooj eaar kōpooj juon men n̄an kwe eļapļo̧k jān am̧ maron̄ ļōmņake. Eļan̄n̄e jej ļoor E, jenaaj bōk ta eo E ekar kōpooje n̄an kōj. Iaļ eo emaron̄ in jab alikkar, im mour emaron̄ in pen, bōtaab Irooj enaaj jerbali wōt menin bwilōn̄ ko n̄an ro Nejin.
Iaar katak menin bwe kōn tōmak, pokake, kijenmej, im jar, Irooj enaaj tōl eō.