Kappukot Kraist im Bujen ko: Kōttōpar eo an Nipai n̄an Riiti Kallim̧ur M̧okta

Moses im Jedpānit Bronze eo,, jān Judith A. Mehr; Kraist ioon Debwāāl, jān Carl Heinrich Bloch

Anij eo an Kallim̧ur M̧okta

Kōnke jejeļā kōn revelesōn ko raan kein bwe Jisōs Kraist ej Anij eo an Kallim̧ur M̧okta (lale Katak im Bujen Ko 110:3–4), jemaron̄ loe kajoor eo An ilo Kōm̧anm̧an eo im āinwōt Rikain̄i eo ioon Toļ Sainai katakin Israel ekōjkan erom āinwōt Anij. Jej katak kōn jouj eo An ilo lo̧mo̧o̧rān jān kōm̧akoko ilo Egypt, E ej iakwe ilo kea kōn armej ro An ilo āne jem̧aden im kadiwōjļo̧k er n̄an ānen kallim̧ur, im inepata eo An ekar wōnm̧aanļo̧k wōt kōn jilkinļo̧k rikanaan ro im leļo̧k jeorļo̧k bōd n̄an Israel ke rekar ukweļo̧k jān jerawiwi ko aer.

Eļōn̄ jekjek in (ak men ko rej bōk jikin) Jisōs Kraist ilo bwebwenato ko ilo Kallim̧ur M̧okta, elōn̄ wōt iaer rej kanaan kōn itok eo An iljj im jekļaj āinwōt kar je ilo Kallim̧ur Ekāāl im Bok in Mormon. Bwebwenato eo kōn Ebream im Aisak rej kanaan kōn an Anij Jemān katok kōn Nejin M̧aan, Jisōs Kraist. Josep ekar lo̧mo̧o̧ren ļōm̧aro jein jān n̄ūta an kanniōk, ejja wōt an Jisōs Kraist lo̧mo̧o̧ren kōj jān n̄ūta an jetōb. Moses ekar kanemkwoj armej ro doon jān kōm̧akoko āinwōt an Jisōs kanemkwoj kōj jān jerawiwi. Irooj ekar katakin ro nejin Israel kajoor in tōmak eo ilo E im Pinm̧uur eo An ilo bwebwenato eo kōn jedpānit bronze eo ilo āne jem̧aden Ilaija im Ilaisha kar waanjon̄ak kōn Rilo̧mo̧o̧r eo ke raar kōmour rinan̄inmej im kar kōjerkak rimej.

Ebream im Aijak, jān Harold Copping, © Look And Learn / Bridgeman Pija ko

Jisōs Kraist ej kakōļļe in bwebwenato ko ilo Kallim̧ur M̧okta im kien Moses. Bwebwenato ko kōn Kwojkwoj in kijoone eo im katok eo ilo kien Moses rej kaiookļo̧k Kraist. Kanaan kōn mijen eo an Jisōs, rikanaan ro an Kallim̧ur M̧okta rekar kōmour rinan̄inmej im kōjerkak rimej. Kōn rikanaan eo Jeremaia, Irooj ekar kallim̧uri kōj juon “bujen ekāāl” (Jeremaia 31:31; lale bar eoon 32).

Ilo Kallim̧ur Ekāāl, Jisōs ej itok āinwōt juon kakūrm̧ool an kien eo im rikanaan ro ilo Kallim̧ur M̧okta. E ekar kwaļo̧k bujen eo ekāāl ilo Katak eo Ioon To̧l im kōkaļļe ko kōn bujen in ilo Kejota eo Āliktata. Jisōs ekar katakin kōj n̄an iakwe im jerbal n̄an doon āinwōt An kar kōmour rinan̄inmej im kōjerkak rimej. E ekar lo̧mo̧o̧ren kōj jān jerawiwi im mej kōn Pinm̧uur eo An, im E ekar kajutak Kabun̄ eo An ioon laļ in. N̄e jej kile Jisōs āinwōt Anij eo an Kallim̧ur M̧okta, emaron̄ em̧m̧anļo̧k ad meļeļe E ilo Kallim̧ur Ekāāl.

Bujen eo an Ebream ekar juon kōro̧ro in kallim̧ur ko im kōjeraam̧m̧an ko kar liļo̧k n̄an Ebream me rej wōnm̧aanļo̧k wōt n̄an rainin ilo “bujen eo ekāāl im ejjeļo̧k jem̧ļo̧kin” kar kōjepļaaktok jān Rikanaan Josep Smith (lale Katak im Bujen Ko 132:30–31). Būreejtōn Nelson ekar katakin:

“Irooj ekar waļo̧k ilo raan kein āliktata n̄an kōkāāl bujen eo an Ebream. N̄an Rikanaan Josep Smith, M̧aajta eo kar kean̄:

“‘Ebream eaar bōki kallim̧ur ko kōn ro ineen, im kōn leen lo̧jeen—eo kwe kwōj jān lo̧jeen, … karejera Josep. …

“‘Kallim̧ur in ej ami barāinwōt, kōnke kom̧ij jān Ebream’ [Katak im Bujen Ko 132:30–31].”

Kōn bujen in, Irooj ekar ejaake juon baam̧le ewānōk ijo E emaron̄ in katakin gospel eo An im bōktok ro Nejin n̄an Jisōs Kraist. Rijilōk Paul ekar katakin kōj bwe eļan̄n̄e jej itok n̄an Kraist, jej erom m̧ōttan baam̧le eo an Ebream: “A eļan̄n̄e kom̧ ro doon Kraist, innām kom̧ ineen Ebream, ri jolōt ekkar n̄an kallim̧ur” (Galetia 3:29; bar lale eoon 27). Kōn bujen eo an Ebream, membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata rej erom m̧ōn Israel im rijolōt ro n̄an kōjeraam̧m̧an ko an bujen eo an Ebream.

Jemaron̄ katak kōn eddo eo ad ilo bujen in kōn etale mour ko an ro ilo Kallim̧ur M̧okta, kōn ekkatak kōn kalllim̧ur ko kar kōm̧m̧an i jān Irooj n̄an ro Nejin ilo kien ko, im kōn ron̄jake rikanaan ro etto me raar akweļap ippān ro nejin Isreal n̄an ukweļo̧k im pokake bujen ko aer.

N̄e jej riiti Kallim̧ur M̧okta, jemaron̄ pukot kakōļļe ko kōn an Irooj dāpij kallim̧ur ko kar kōm̧m̧ani ilo bujen eo an Ebream. Kōjeraam̧m̧an ko jilu mālij tata jeļā kaki rej āne, eo ej kakōļļe in juon jolet ilo aelōn̄ in kiin̄ eo an Jemādwōj Ilan̄; ineen, eo ej juon kallim̧ur kōn eddōkļo̧k indeeo; im kōjeraam̧m̧an ko an gospel eo im priesthood eo, “ko rej kōjeraam̧m̧an ko in lo̧mo̧o̧r, em̧ool mour indeeo” (Ebream 2:11).

Kar kallim̧uri Ebream bwe kōn ineen “nukun otemjej i laļ renaaj jeraam̧m̧an” (Jenesis 12:3). Menin ekar meļeļe in bwe Jisōs Kraist enaaj kar itok n̄an laļ kōn menmenbwij eo eo an Ebream im kōjeraam̧m̧an aolep laļ ko an laļ in kōn Pinmuur im Jerkakpeje eo An (lale Galetia 3:16).

Meļeļe jān Getsemane, jān J. Kirk Richards, maron̄ jab kape

Ta kōjeraam̧m̧an kwoj loe ilo mour eo am̧ rainin kōnke kōn wōt bujen eo an Ebream?

Ippānļo̧k kōjeraam̧m̧an ko, erom m̧ōttan bujen eo an Ebream ej kitbuuj jet eddo ko. Kōn ekkatak Kallim̧ur M̧okta, jej loe ewi wāween mour kōn bujen ko ad. Āinwōt baam̧le eo an Ebream, membōr ro an Kabun̄ in rej kūr n̄an aintok Israel. N̄e jej bōk koņaad ilo jerbal in mijinede, jerbal in karejar, jerbal in tampeļ, kūr ko an Kabun̄ in, im katakin im karuttoļo̧k baam̧le ko ad, jej aintok Israel kōn ad kepaaktokļo̧k ro jet n̄an Kraist.

Būreejtōn Nelson ekar katakin, “Jabdewōt iien kwoj kōm̧m̧ane jabdewōt men me ej jipan̄ jabdewōt armej—ilo jim̧or jait ko an rōn̄ōl eo—bōk juon bun̄tōn m̧aanļo̧k n̄an kōm̧m̧ani bujen ko ippān Anij im aer bōk kain̄i ko an peptaij im tampeļ ko remenin aikuj, kwoj jipan̄ aiintok Israel.”