Prea mo Tabu Wok

Tina Fealofani, we i gat 15 yia mo i kamaot long Sydney Australia Mortdale Stek, hem i semmak olsem plante yangfala we oli traehad blong laef folem gospel long wan wol we i fulap long temtesen. Nomata long ol jalenj we hem i fesem, hem i kasem paoa taem hem i tingbaot se hem i wan pikinini blong God. “Mi save se Jisas Kraes mo Papa long Heven, tufala i stap oltaem wetem yumi . . . long enitaem yumi nidim help,” hem i talem. Fet ia i gaedem hem tru long ol had desisen blong hem long skul, insaed long famli blong hem, mo long wokbaot blong hemwan long saed blong spirit.

Wan long ol bigfala jalenj we Tina i fesem hem i blong stanap strong agensem presa we i kam long ol fren mo famli. Long skul blong hem, plante studen oli pat long ol aktiviti we i go agensem ol gospel prinsipol, olsem smok. “Taem mi statem hae skul, mi no sua spos bae mi fren wetem sam man from oli no mekem ol gud joes oltaem,” Tina i talem. Hem i no akseptem, mo i disaed blong folem ol fren we oli sapotem ol standet blong hem. “Mi wantem stap long wan ples we i helpem mi blong jusum raet. Mi no wantem oli fosem mi blong mekem ol samting we mi save se i no stret,” hem i eksplenem.

Wan narafala wei blong hem blong kasem paoa hem i tru long ol prishud blesing we papa blong hem i givim long hem long ol fas dei blong skul. “Evri taem mi filim nogud, mi tingbaot blesing blong papa blong mi. Mi tingbaot hem i talem se, Bae ‘yu save mekem ol had samting long yia ia,’ mo hemia i helpem mi, hem i talem. Ol blesing ia oli rimaenem hem se God i save hem mo bae i gaedem hem tru long ol jalenj blong hem.

Be i gat wan spesel eksperiens we i mekem testemoni blong Tina long saed blong prea i kam strong moa. Wan dei, Tina wetem ol smol brata mo sista blong hem, oli stap pleplei long yad blong jos mo oli mestem afta oli lokem olgetawan insaed. “Mifala i stap pleplei nomo, mo afta mifala i luksave se doa i lok, mo mifala i nomo save kamaot. Mifala i stat blong seksek from i nogat man long jos blong harem mifala,” Tina i talem. Smol brata blong hem i save se oli nidim paoa blong God, mo i disaed blong prea. “Hem i talem nomo se, ‘Papa long Heven, plis mekem wan man i harem mifala mo openem doa’ Mo afta, hem i talem, i no longtaem nomo, bisop i pas aotsaed mo i harem mifala!” Bisop i openem doa kwiktaem mo oli go fri. Tina i talem, “Eksperiens ia i tijim mi se Papa long Heven i lisin long yumi.”

Eksperiens ia i mekem andastaning blong Tina abaot paoa blong prea i bigwan. Hem i faenemaot se semmak olsem we Papa long Heven i helpem hem long taem ia, Hem i rere oltaem blong gaedem mo givim kamfot taem hem i askem. “Long dei ia, mi lanem se prea i no blong ol bigfala samting nomo. Hem i blong evri samting. Long ol smol samting tu, Papa long Heven i lisin,” hem i talem. Stat long taem ia, hem i mekem prea i kam wan moa impoten pat long laef blong hem, wetem save ia se prea i wan long ol spesel janis blong stap olsem wan pikinini blong God.

Rilesensip blong Tina wetem smol brata blong hem i kam strong moa tru long eksperiens ia. Hem i luk fet blong brata blong hem we i go wetem aksen, mo hemia i helpem hem blong trastem God moa. “Blong luk brata blong mi i prea wetem plante fet i rimaenem mi se yumi no nid blong go tru long ol jalenj yumiwan. Yumi save tanem yumi i go long Lod oltaem,” hem i talem. Tufala i gohed blong leftemap tingting blong tufalawan, speseli taem tufala i stap traehad blong stap strong long gospel. Taem wan long tufala i no gat strong tingting blong atendem jos o seminari, narawan i kam mo leftemap tingting blong hem. “Sapos mi no gat strong tingting blong go, bae brata blong mi i talem se ‘Kam yumitu go.’ Mo sapos hem i no wantem go, bae mi talem long hem semmak samting, hem i talem.

Tru long ol jalenj mo eksperiens blong hem, Tina i kam blong andastanem se blong save se hem i wan pikinini blong God i moa long wan tingting blong kamfot—tingting ia i givim paoa. Hemia i helpem mi blong save se mi save mekem ol gud joes, se mi save prea enitaem, mo se mi gat wan famli blong sapotem mi, hem i eksplenem. Testemoni blong hem i gohed blong gro taem hem i luksave se laef long gospel i kam wetem ol tru blesing, speseli taem hem i tanem hemwan i go long Papa long Heven wetem fet. Taem hem i akseptem tabu aedentiti blong hemwan mo paoa blong prea, Tina i stap lanem se hem i neva wokbaot hemwan long laef.

Stori blong Tina i stap olsem wan rimaenda long evri yut se fet long God i kam wetem daereksen mo pis long ol taem we yumi konfius. Eksperiens blong hem long yad blong jos, hao hem i dipen long ol prishud blesing, mo ol evri dei prea blong hem i sapotem trutok ia se Papa long Heven i stap kolosap oltaem. Tina i gohed blong mekem fet blong hem i gro, mo hem i hop se ol narawan tu bae oli kam blong filim glad taem oli luksave tabu aedentiti blong olgetawan mo bigfala lav blong Papa long Heven. 

Toktok blong Pikja: “Krismas holidei long Samoa 2023–2024; Tina wetem ol smol brata mo sista blong hem: Seuteva, Faytino mo Epati Jr.”