“Sapos God I Bin Gat wan Jos long Wol Ia,” Liahona, Septemba 2025.
Ol Pikja blong Fet
Sapos God I Bin Gat wan Jos long Wol Ia
Mi bin talem long ol misinari blong no westem taem blong olgeta, from se mi gat ol bilif blong miwan. Be afta, mi bin lanem se ol tijing blong olgeta i go stret wetem ol bilif blong mi abaot famli, wan Papa long Heven we i gat lav, mo Jos Ia blong Sevya.
Taem mi bin yangfala, papa mo mama blong mi i bin tekem mi i go long ol defdefren jos. Afta, olsem wan yangfala, mi stat blong tanem mi i go long God mo bin stat blong ridim Baebol. Mi filim gud.
Taem mi tingbaot God mo stamba tingting blong laef, mi luksave se hem i impoten blong gat wan famli. Mi biliv se ol lida blong jos oli mas tij tru eksampol, be long jos we mi bin go long hem, ol pris oli no bin mared. Hemia i mekem mi konfius. Mi biliv se i gud blong mared mo gat wan famli.
Taem ia mi bin gat 16 yia. Mi bin gat wan gelfren we mi lavem tumas, be hem i bin lego mi. Hemia i had tumas long mi. Mi harem nogud blong kolosap wan yia. From eksperiens ia, mi bin wantem blong andastanem weaples mi bin kam long hem, from wanem mi stap long wol ia, wanem i stamba tingting blong laef ia, mo wanem i hapen afta long ded. Mi wantem blong faenem ol ansa blong ol kwestin ia miwan. Be afta we mi stap tingting long olgeta blong wan longfala taem, mi bin tanem mi i go long God bakegen mo talem long miwan se, “Krieta blong laef i save laef moa gud bitim we mi save. Mi mas faenem ol ansa we i kam long Hem.”
Blong stap ridim Baebol, mi bin lanem se Jisas i bin singaotem Ol Twelef Aposol. Mi tingting se, “Sapos God i bin gat wan jos tedei, “bae hem i mas gat Ol Aposol.” Tingting blong mi stap go moa mo plante moa long relijin mo mi wantem blong kasem baptaes.
Taem mi tokbaot God wetem papa blong mi, hem i talem long mi se God i mekem samting i fea. Hem i talem se, maet bae yu kasem baptaes blong God i sevem yu o bae yu stap long hel blong oltaem. Mi no wantem blong tingting se wan Papa long Heven we i gat lav bae i save glad blong stap sendem ol pikinini blong Hem i go long hel blong oltaem from nomo se oli no bin kasem baptaes. ?Wanem bae i hapen long olgeta we oli no bin gat wan janis blong kasem baptaes?
Long Franis, i gat sam we oli biliv. Mi gat ol fren we oli naes, be oli no bin kasem baptaes. Mi endem stori blong mitufala se, hem i no wan raet samting blong tingting se olgeta evriwan bae oli go long hel.
Afta, mi disaed blong mekem ol bilif blong miwan. Mi biliv long God we lav blong Hem i stret gud evriwan mo we Hem bae i save mekem evri samting long paoa blong Hem blong sevem ol pikinini blong Hem. Ol pikinini blong Hem oli no wantem blong kasem glori blong Hem, hemia bae i stap nomo nao long olgetawan. Be bae Hem i save givim wanem janis long olgeta.
Wan Longfala Rod We I Go Raon Long Vilej We I Lid I Go long Fasin blong Jenisim Laef
Wan dei, tu fultaem misinari we tufala i bin stap wok long vilej blong mifala i bin kasem insperesen mo filim se bae tufala i tekem longfala wokbaot i go raon long vilej blong go hom. Long rod blong tufala i go hom, tufala i mitim mama blong mi. Hem i stopem tufala mo putum wan apoenmen blong mi mit wetem tufala. Mi no glad long hemia. Mi no wantem blong toktok long tufala. Mi tingting se bae tufala i talem se, “Yu mas lisin long mitufala. Yu mas bilivim wanem we bae mitufala i talem long yu.”
Taem we tufala misinari i kam blong mitim mi, mi talem long tufala se, “No westem taem blong yutufala. Mi gat ol bilif blong miwan. Wanem we yutufala i stap mekem i gud be mi biliv se famli i impoten tumas. Mi biliv se ol lida blong jos oli mas mared. Mi biliv se jos i mas gat olgeta twelef Aposol. Mi biliv se God bae i sevem plante long ol pikinini blong Hem olsem we Hem i save mekem. Mo mi no biliv long stap smokem sikaret mo stap dring strong drink.”
Mi bin sapraes blong lanem se ol tijing blong olgeta i go stret wetem ol bilif blong mi. Tufala i bin givim wan Buk blong Momon long mi mo askem mi blong prea from buk ia. Mi filim Spirit taem mi ridim buk ia, mo filim Spirit wetem ol misinari. Be mi ting se, “Maet mi stap mekemap ol naesfala filing ia nomo.”
Mi prea mo kasem wan ansa tru long wan drim. Long drim blong mi, mi bin openem Baebol. Insaed long Baebol ia i gat ol bukmak wetem ol defdefren buk blong Baebol. Las bukmak i i gat toktok ia, “Momon.” Mesej ia i helpem mi blong andastanem se Baebol mo Buk blong Momon i gat insaed long tufalawan, semmak gospel (luk long Esekiel 37:15–19).
Testemoni blong kam moa strong tru ol narafala eksperiens blong stap ridim mo stadi long Buk blong Momon. Taem we tufala misinari i bin invaetem mi blong kasem baptaes, mi akseptem wetem bigfala glad. Mi kasem baptaes stret afta wan yia blong taem we gelfren blong mi i lego mi. Baptaes blong mi i makem wan bigfala jenis long laef blong mi. Mi lusum sam fren blong mi taem mi bin joenem Jos, be mi faenem ol niuwan long branj we mi atendem.
“Gospel ia i tekem plante laet mo hapines i kam long mi,” Nicolas i talem. “God i bin blesem mi. Mi mitim wan gudfala woman, mo mi gat tri gudfala pikinini gel.”
Gospel ia i tekem plante laet mo hapines i kam long mi. Mi fulap wetem Spirit mo bigfala glad. Mi stap tingting se, “Evri samting we mi bin harem nogud from bifo, i bin tekem mi i kam long ples ia.”
God i bin blesem mi. Mi mitim wan gudfala woman, mo mi gat tri gudfala pikinini gel. Tu long olgeta i bin givim seves long ol misin, blong stap helpem ol narawan blong andastanem wanem we mi bin kam blong andastanem plante yia i pas: “Famli hem i stap long stamba blong plan ia we Krieta i gat long saed blong fiuja ples we i no save finis, blong ol pikinini blong Hem,” “Olgeta dedman we oli sakem sin bae Lod i pemaot olgeta, tru long fasin blong obei long ol odinens blong haos blong God,” (Doktrin mo Ol Kavenan 138:58), mo Lod i singaotem ol aposol mo ol profet long dei blong yumi, blong lidim Jos Ia blong Hem (luk long Efesas 2:20).