“Ol Lesen We Mi Lanem Taem Mi Stap Invaetem Kraes blong Raetem Stori blong Mi,” Liahona, Septemba 2025.
Ol Woman blong Kavenan
Ol Lesen We Mi Lanem Taem Mi Stap Invaetem Kraes blong Raetem Stori blong Mi
Yumi gat ol defdefren eksperiens, be sapos yumi letem God i win long laef blong yumi, bae yumi faenemaot mo mekem i hapen stamba tingting blong kriesen blong yumi long ol wei we yumi neva save tingting long hem.
Wan smol pat blong Protekta long Dei mo long Naet, i kam long Caitlin Connolly, oli no save mekem kopi
Long 2016—long medel blong kolosap 30 yia blong mared mo blong stap tekem i kam long wol, stap lukaot mo stap lavem ol trifala pikinini boe blong mitufala, blong stap praktisim fultaem loa, stap givim seves long ol koling blong Jos, mo stap givhan long ol nid blong ol nara famli blong mifala—hasban blong mi, Doug, mo mi, oli bin singaotem mitufala blong givim seves blong tri yia olsem ol misin lida long Arequipa, Peru. Mitufala i aot long semmak taem we apupikinini boe blong mitufala i bon i kam long wol.
Mitufala i kambak hom long 2019 long tu niufala apupikinini gel. Tufala bigfala pikinini boe blong mitufala i bin mared, mo yangfala wan i faenem wan mo i no longtaem bae hem i mared. Mi gobak blong praktisim loa, mo fevret koling blong mi i bin olsem wan mama mo wan bubuwoman.
Mo afta, singaot ia i bin kam blong givim seves olsem Praemeri Jeneral Presiden. Stori blong mi we mi laekem mo we mi bin raetem blong miwan i blong stap spendem taem wetem famli blong mi, wan narafala ten yia blong stap praktisim loa blong mekemsua se i gat sekiuriti long saed blong faenens, mo stap givim seves long wod blong mi o insaed long tempol.
?Wanem bae i hapen sapos mi stak wetem stori ia we mi laekem?
Bae mi bin stap gat gudtaem blong stap spendem moa taem wetem ol apupikinini blong mi mo bae mi gat tras se mi gat inaf mane blong sapotem mifala. Mo bae mi bin mestem wan eksperiens we blong givim seves i go moa, i lukaotem sol mo i stap bildimap fet. ?Long top blong hil? Yes. ?Bae i gat praes? !O yes!
Mi givim witnes blong mi se “from se [Sevya] i save stret hamas paoa yumi gat, mo bae Hem i tekem yumi i go long ol ples we yumi neva tingting long hem yumiwan.” Mi gat tras se Hem bae i tekem yu i go long ol ples we yu neva tingting long hem yuwan, mo seves blong yu bae i go aot moa. Letem God i lidim yu blong wokbaot long saed blong wan we i nidim yu.
Maet bae yu luksave se yu stap tijim ol adalt blong rid. O maet yu stap givim seves long olgeta we oli muv i kam long kantri blong yu blong stap. Maet bae yu lidim wan grup blong komuniti blong mekem ol pak oli sef blong ol famli. Taem yumi letem God i win, Hem bae i tekem yumi i go long ples we Hem i nidim yumi long hem mo long ol ples we yumi neva tingting long hem yumiwan.
Presiden Russell M. Nelson i talemaot se yumi “kasem moa fet taem [yumi] mekem wan samting we i askem moa fet.”
Mi save se hemia i tru. From se, blong stap letem God long laef blong mi, i blong stap letem Hem i raetem stori blong mi, fet blong mi long Jisas Kraes i bin kam antap.
?Afta, olsem wanem nao bae yu letem Hem i win?
?Olsem wanem nao yumi save luksave hemia long wan yang man o woman we i wokhad from wan edukesen mo wantem blong mared mo gat wan famli? Presiden Dallin H. Oaks, Fas Kaonsela long Fas Presidensi i bin eksplenem se, joes i no stap bitwin famli o edukesen o wok. Hem i talem se: “Wanem taem nao hem i wanem we yumi mas jusum, mo lukaotem insperesen we i kam long Lod mo ol tijing blong ol wokman blong Hem blong mekem hemia.”
Blong stap tokbaot topik ia, mi wantem blong tokbaot moa olgeta we oli gat wan tru hat mo wan tingting blong hat we i stastap oltaem blong mared mo gat ol pikinini long laef ia mo we oli singgel. Mi luksave plante we oli stap olsem papa o mama we i stap hemwan from se patna i ded o divos. Mi save long plante kapol we oli mared mo we oli wantem tumas blong gat ol pikinini mo oli stap safa from woman i no save gat bebi mo woman we bebi i nogud insaed long bel. Mi save se yu stap safa. Yu wantem taem blong i jenis. Hemia i no stori we yu raetem abaot yuwan. Hat blong mi i soa from yu.
Stori blong Evriwan I Defdefren
Mi stap wokhad i go from wan edukesen, tugeta wan we i no graduet mo wan loa digri. Mi bin mared tru long medel blong edukesen blong mi. Mi bin gat fas bon pikinini boe blong mi afta we mi pasem ol skul eksam blong mi. Mi gat ol bebi mo hasban blong mi mo mi i lavem mo lukaot long olgeta long taem we mitufala tugeta i stap wok. Hem i bin wan bisi taem, i bisi tumas; paoa blong mitufala i nomo gat mo samtaem, mitufala i taet. Mi sapotem hem, mo hem i sapotem mi. Famli i bin, mo stap yet olsem fas samting blong lukluk long hem. Mi mo hasban blong mi i bin lukaotem insperesen long ol joes ia mo long wanem stret taem blong mekem ol samting ia. Hem i bin wanem we mitufala i filim mo tingting blong mekem. Mitufala i bin stap traem blong letem God i win.
Stat long wan lukluk long saed blong faenens mo wok, bae i moa gud blong stop blong stap gat pikinini kasem taem we mi kam antap gud long wok blong mi. Be blong stap letem Lod i raetem stori blong yumi, samtaem, yumi mekem ol samting we wol i no save mekem i kam moa gud. Mi wokhad long taem we mi gat bel, blong bonem, stap lukaot long ol pikinini, arenjem huia blong draev long wanem dei, smol spot mo ol samting blong mekem wok blong mi i gohed gud. Hem i ol gudfala plan blong mekem wetem glad, mo bae mi no save jenisim. Mitufala i bin trastem ol plan ia from se, mitufala i bin stap letem God i win.
Plis no andastanem rong. Mi no stap talem se evriwan bae i folem ol plan ia blong mi. Ol stori blong yumi oli no semmak. Mi serem blong mi from se hem i wanem we mi save. Be, wan samting ia we yumi evriwan i gat we i semmak, paoa ia we i pusum yumi blong: letem God i win.
Blong stap olsem wan mama hem i samting we mi putum i kam faswan. Hemia nao bigfala glad blong mi. God i talem long [Adam mo Iv], I gud yutufala i gat plante pikinini blong yutufala, blong olgeta we bambae oli kamaot biaen long yutufala bambae oli save go stap long olgeta ples long wol” (Jenesis 1:28). Fasfala komanmen we God i bin givim long Adam mo Iv hem i blong save kam hasban mo waef, mo tu olsem wan papa mo mama.”
Fas wok we oli soem long mi i blong go from fasin blong stap wan mama. Fas wok ia i go stret nomo wetem ol samting we mi stap mekem blong mekem edukesen blong mi i go gud. Oli komandem yumi blong lukaotem blong stap lanem samting—sam long olgeta i kam tru taem yumi stap wokhad from edukesen. Mo tu, hemia i kam long taem we yumi stap olsem wan papa mo mama, long ples ia yumi lanem blong kam olsem god taem yumi wok wetem ol fasin blong gat lav, sore mo gat longfala tingting.
Blong stap letem God i win i tekem tu fasin blong stap invaetem Hem blong stap pat long ol taem blong ol joes we yumi stap mekem.
Mi talem tangkyu oltaem blong kasem insperesen we i kam long Lod mo daereksen we i kam long ol profet blong helpem hasban blong mi mo mi long taem blong stap mekem ol joes blong invaetem ol pikinini i kam insaed long famli blong mitufala long taem we mitufala i bin plan from. O mi talem tangkyu tumas se mi bin tekem aksen folem ol kwaet toktok blong spirit mo no letem ol paoa blong wol i winim mi, ol isi samting, fasin blong givim ona o mane i blokem rod blong ol joes blong mekem i hapen tabu paoa ia blong stap bonem ol bebi i kam long wol ia mo fasin blong stap lukaot long olgeta.
Ol Woman we oli gat mo no gat Pikinini, i kam long Caitlin Connolly, oli no save mekem kopi long hem
Mekem Samting I Hapen Kasem Mak blong Kriesen blong Yumi
Sapos ol man mo ol woman oli stop blong gat mo lukaot long ol pikinini, eksperiens blong laef long wol ia i en. Hemia i impoten tumas, afta, maet yumi no akseptem o sakemaot tabu responsabiliti blong wan papa mo mama.
Plante long ol infomesen blong sosol saens we i soem ol desisen, ol nogud risal we i hapen long ol nesen mo ol tingting we man i developem blong stopem blong gat pikinini. Long plante ples raon long wol, haf blong namba blong ol pikinini we oli bon i kam long wanwan woman i no bitim tu pikinini. Hemia i minim se yumi no stap riplesem yumi wanwan.
Olsem ol lida insaed long Jos, mifala i wari abaot ol jenis we i stap hapen tedei long mared mo wei blong kontrolem namba blong ol pikinini we bae oli bon i kam long wol. Long Yunaeted Stet, 30 yia i pas, ol lida oli bin luk eit o naen pesen blong namba blong ol sitisen we oli mared mo oli bin mared long wantaem, i stat blong godaon. Ol namba ia oli “ripresentem wan problem raon long wol.” Taem ol pipol oli no mared, bae i gat smol namba blong ol pikinini nomo we oli bon i kam long wol ia.
Yunaeted Stet, naoia i kasem wan “wan mak we namba blong ol adalt we oli gat 18–55 yia we oli stap singgel mo no gat ol pikinini bitim namba blong ol mared man mo woman we oli gat ol pikinini.”
Ol pikinini oli impoten long divelopmen blong wan kantri. Oli impoten long plan ia blong hapines we i fulap long glori. Komanmen we Lod i givim long yumi we i blong oli kam plante mo fulumap wol ia, “i stap yet naoia.”
Wan smol pat blong pikja ia Yumi wetem Olgeta mo Olgeta wetem Yumi, i kam long Caitlin Connolly, oli no save mekem kopi blong hem
Letem Lod i Raetem Stori blong Yu
Mi save se tingting blong hat blong plante i maet se oli wantem blong mared, gat pikinini mo lukaot long ol olgeta. Be yet, fulap oli singgel o safa from oli no save gat pikinini. Fren blong mi we mi laekem tumas, we i neva bin mared mo gat pikinini blong hemwan, i bin lavem mo kea long ol pikinini blong mi. Hemia i no blong tekem ples blong ol pikinini blong hemwan. Hemia i wan pruf se, fas responsabiliti blong hem i stap gohed yet blong kam wan mama.
Pikinini boe blong mi mo woman blong hem, i bin wokhad tru long ol jalenj blong lusum pikinini we i stap yet insaed long bel plante taem. Tingting blong hat blong tufala i stap stret mo gud. Tufala i stap lukaotem blong God i win long laef blong tufala. Tingbaot, taem yumi askem wetem fet blong letem Jisas Kraes i stap olsem Man blong raetem mo finisim stori blong yumi, yumi mas rere blong plei pat blong wan stori we i no gud we i givim hop long wan we, i fesem hadtaem, mo long en, i kam moa gud mo moa selestial bitim we yumi save tingting long hem.
Long medel blong ol dia fren blong mi, i gat wan kapol tufala i no gat pikinini mo mared, be afta tufala no save gat pikinini. Tufala i askem wetem fet sapos bae tufala i mas adoptem ol pikinini. Tufala i filim mo tingting blong adoptem fo sista be i no wan bebi nomo—oli gat 5 kasem 7 yia. Yes i tru tumas, blong talem stret, hemia i no stori we tufala i bin raetem blong tufalawan. Be o, hamas wan stori olsem i naes tumas we Hem i bin raetem tugeta wetem tufala.
Nomata ol wanem kaen situesen blong yumi, yumi evri i pat blong famli ia blong God, ol memba blong wan famli long wol ia, mo stap rere blong stap olsem ol papa mo mama blong taem we i no save finis. Ol blesing blong fasin blong kam olsem wan god oli save kam long yumi tru long Sevya, Jisas Kraes we i blong ol pikinini blong yumi tu. From hemia, nomata sapos yumi bin sil mo bonem ol pikinini i kam long wol ia long laef ia o long nekis laef, stamba tingting blog yumi i blong kam olsem wan god—we i save kam blong yumi sapos yumi mekem mo kipim ol kavenan. Taem yumi mekem wan kavenan rilesensip wetem God, oli fasem yumi i go stret long Hem, mo yumi neva stap yumiwan. Hem i blesem yumi wetem “ekstra lav mo sore blong Hem.”
Olsem ol kavenan pipol, yumi mekem plan mo rere from mared mo blong gat mo lukaot long ol pikinini. !Hem i wan tabu koling! Yumi lavem, lidim mo givhan mo stap olsem papa mo mama blong soem lav blong yumi long God mo ol pikinini blong Hem—from se yumi wantem Hem blong win long laef blong mi.
Taem ia hem i wan taem we i fulap long glori blong stap laef mo mekem kavenan insaed long Jos ia blong Jisas Kraes blong Ol Lata-dei Sent. Blong stap andastanem wok, stamba tingting mo responsabiliti blong yumi insaed long plan ia blong hapines, hem i wan ona, givim hop mo glad. Blong stap save se yumi gat wan profet we i stap laef we i stap mekem yumi rere from wanem we i stap kam we i tekem pis mo iven givim hop long mi long medel blong ol taem we yumi no sua long hem. Kavenan rilesensip blong mi wetem God nao i givim hop long mi. Kavenan tras blong mi i stap long Jisas Kraes.
Mi testifae se Hem i stap laef, se Hem i soem lav blong Hem taem Hem i givim laef mo Atonmen blong Hem from wanwan long yumi.