Lod I Bin Lidim Mi I Go Hom

Pikja foto i kam long Deved Malan

Taem mi bin stap wok from dokta digri blong mi mo stap tijim miusik long Yunaeted Stet, mi traehad blong laef folem gospel mo filim paoa blong God insaed long laef blong mi. Mi bin stap longwe long hom mo wanwan taem mi filim se mi stastap miwan, be mi bin filim lav blong Hem mo voes we i stap lidim mi long ol desisen blong mi.

Wan dei wan filing i kam long mi se mi mas gobak long hom blong mi long Bolivia. Blong stap gobak hom i no wan isi desisen. Ol samting i bin stap go gud. Be afta we mi stap prea, mi filim strong se mi mas gobak from se i gat wan impoten samting we i stap wet long mi.

Afta we mi gobak, i gat wan bajela program blong miusik i open long wan long ol top yunivesiti blong Bolivia, long ples ia, mi faenem wan wok olsem wan profesa.

Insaed long hom wod blong mi, kwiktaem mi bin mitim wan yang woman we mi bin neva luk hem bifo. Papa blong mama blong hem i bin konvet i kam long Jos taem mi bin stap rere blong lego Yunaeted Stet sam yia bifo. Mitufala i stat blong fren mo bin kasem mared, we i bin bigfala blesing long laef blong mi.

Tu yia i pas, oli bin faenemaot se bubuwoman blong mi i gat kansa. Mitufala i gat strong rilesensip. Taem mi bin yangfala, bae hem i talem long mi se “Bae oltaem yu stap wetem mi, mo mi save save se bae yu lukaot gud long mi.”

From se mi bin kambak hom, mi stap long taem ia we hem i nidim mi, blong stap spendem taem wetem hem evri dei long ol las manis blong hem. Hem i no bifo we hem i ded, be hem i laekem tumas Liahona magasin, Buk blong Momon mo jeneral konfrens. “Mi bilivim evriwan,” hem i bin talem.

Biaen, mi bin gat blesing ia blong stap insaed long Cochabamba Bolivia Tempol wetem papa mo mama blong mi taem we bubuwoman blong mi i bin sil i go wetem hasban blong hem, we hem i bin ded taem hem i yang. Hem neva mared bakegen. Mi bin filim se tufala i bin stap long ples ia long tempol wetem mifala, hapi mo stap tugeta bakegen. Blong luk papa mo mama blong mi long siling rum we tufala i stanap olsem proksi blong tufala, i wan naesfala samting blong stap lukluk long tufala.

Mifala i no save se laef blong mifala bae i kam olsem wanem. Be Lod i save weaples mifala i mas stap long hem. Mo tu, Hem i save olsem wanem blong blesem mifala, mo Hem bae i lidim mifala blong tekem aksen long ples blong Hem blong blesem ol narawan. Sapos yumi gat tras long waes tingting mo daereksen blong Hem, mi save se Hem i save moa samting long laef blong yumi bitim we yumi save mekem yumiwan.