“Lod i bin jusum famli blong stap olsem stamba yunit blong Jos mo blong sosaeti.”
Blong wan taosen yia, ol profet mo ol aposol oli bin talemaot hamas famli i tabu mo givim woning abaot ol hadtaem we i save daonem wanwan man o woman, ol nesen, mo wol, sapos oli no sevem mo protektem ol famli. Hemia sam long ol insperesen toktok we i kam long ol profet mo ol aposol abaot famli mo hamas “Famle: Wan Ofisol Toktok I Go long Wol, i impoten.”
Famli I Stap long Medel blong Plan Ia blong God
Presiden Russell M. Nelson
Presiden blong Jos Ia blong Jisas Kraes blong Ol Lata-dei Sent
“Impoten samting long plan ia blong God hem i famli. Wanem we i tru i we, stamba tingting blong plan ia i blong mekem famli i kam olsem ol god. Oli krietem wol ia blong mekem se yumi olsem ol spirit pikinini blong Papa long Heven we yumi bin stap laef bifo long laef blong wol ia, blong yumi save kam long wol blong kasem wan bodi blong mit blong bon. Yumi stap long ples ia blong oli traem mo testem yumi [luk long Ebraham 3:24–25 ]. Yumi fri blong ‘jusum fridom mo laef we i no save finis… o blong jusum blong kam prisena mo ded’ [2 Nifae 2:27 ]. Mo hemia we i moa gud bitim ol narawan i we, yumi evriwan oli letem yumi blong filim lav o blong lavem wan narawan, blong mared mo blong invaetem ol pikinini i kam long ol famli blong yumi” (“Faith and Families ,” Ensign , Mar. 2007, 39).
Famle Ofisol Toktok I Stap Insaed long Ol Doktrin We I No Save Finis
Presiden Dallin H. Oaks
Fas Kaonsela long Fas Presidensi
“Olgeta we oli no andastanem fulwan plan blong Papa ia we i gat lav long ol pikinini blong Hem, bae oli save tekem se famli ofisol toktok ia, i jes wan nara toktok blong polisi, we oli save jenisim. Be, long nara saed, yumi talem tru se famli ofisol toktok i stap long doktrin we oli no save jenisim, mo i talem klia kaen famli rilesensip we bigfala pat blong divelopmen blong yumi we i no save finis, i save hapen long hem” (“Lav we I Kam long Heven Insaed long Plan blong Papa ,” Liahona , Mei 2022, 103).
Famli Laef long Laef blong Wol Ia I Mekem Yumi Rere from Taem We I No Save Finis
Presiden Henry B. Eyring
Seken Kaonsela long Fas Presidensi
“Famli yunit i no stamba samting nomo long sosaeti mo long Jos be i hop ia blong yumi blong kasem laef we i no save finis. Yumi stat blong praktisim insaed long famli, smol yunit, wanem we bae i seraot i go long Jos mo long sosaeti we i ples we yumi stap laef long hem long wol ia mo afta, wanem we yumi praktisim long ol famli bae i fasem yumi tugeta blong oltaem tru ol kavenan mo fasin blong yumi blong stap fetful” (“The Family ” [Brigham Young University devotional, Nov. 5, 1995], 8, speeches.byu.edu).
Praevet Laef blong Wan Man Wetem Woman, Hem I Putum I Stap blong Wan Mared Kapol
Presiden Jeffrey R. Holland
Akting Presiden blong Kworom blong Olgeta Twelef Aposol
“Praevet laef blong wan man wetem woman we Hem i putum i stap blong wan mared kapol, from se i bigfala simbol blong tu pipol i kam wan fulwan, tufala i kam wan fulwan tru long God we i odenem mo i talemaot olsem wanem i hapen. Long Garen blong Iden i kasem naoia, mared, hem i stap, blong i rod, blong wan man mo wan woman i kam joen tugeta fulwan—hat blong tufala, ol hop, laef, lav, famli, fiuja, evri samting. … Tufala i kam joen, mo i kam fulwan nao yumi stap yusum toktok ia sil blong talem se hemia i wan promes we i no save finis” (“Personal Purity ,” Ensign , Nov. 1998, 76; Liahona , Jan. 1999, 91).
Sevya, Hem I Save Hilim Ol Rilesensip blong Papa mo Mama Wetem Pikinini
Elda Dieter F. Uchtdorf
Blong Kworom blong Olgeta Twelef Aposol
Lav blong wan papa mo mama long wan pikinini i wan long ol paoa we i strong tumas long laef. Hem i wan long ol samting long wol ia we i save stap blong wan taem we i no save finis.
“Maet bae yu filim se rilesensip blong yu wetem pikinini blong yu i no stret tumas. Hemia nao ples we Sevya i kam insaed long hem. Hem i hilim sik, mo Hem i save mekem ol rilesensip oli kam oraet. Hem i mekem bred mo fis i kam plante, mo hem i save mekem lav mo glad i kam plante insaed long hom blong yufala” (“Jisas Kraes I Paoa blong Ol Papa mo Mama ,” Liahona , Mei 2023, 56).
Mekem Ol Koneksen blong Famli I Kam Moa Strong, Nomata Taem Sam Oli Brokbrok
Elda David A. Bednar
Blong Kworom blong Olgeta Twelef Aposol
“Long yufala [ol yang adalt] we yufala i bin eksperiensem soa blong hat from wan divos long famli blong yu o filim harem nogud blong tras we i brok, plis tingbaot !i stat wetem yu bakegen! Ating wan joen long laen blong jeneresen blong yu i bin brok, be i gat ol nara stret mo gud joen mo laen we i stap oli impoten semmak long taem we i no save finis. Yu save ademap paoa long laen blong yu mo ating, yu save help tu blong putumbak ol joen we oli brok. Wok ia ba i hapen wan afta wan” (“A Welding Link ” [worldwide devotional for young adults, Sept. 10, 2017], Gospel Library).
“Ol woman mo ol man oli gat ol rol we i blong olgeta nomo, olsem we i stap long ‘Famli: Wan Ofisol Toktok I Go long Wol,’ be wok we oli mekem, i ikwol long valiu mo i impoten. Oli gat ikwol paoa blong kasem revelesen from famli blong olgeta. Taem oli wok tugeta wetem lav mo stret mo gud fasin, bae desisen blong olgeta, heven i blesem” (“Bigfala Lav long Ol Pikinini blong Papa blong Yumi ,” Liahona , Mei 2019, 79).
Ol Papa mo Mama Oli Mas Lidim Ol Pikinini i go from wan Hop long Kraes
Elda D. Todd Christofferson
Blong Kworom blong Olgeta Twelef Aposol
“God i odenem se man mo woman i mas mared mo gat ol pikinini, from hemia, blong stap krietem, patnasip wetem God, ol bodi blong mit mo bun oli ki blong tes blong laef long wol mo i impoten long glori we i no save finis wetem Hem. Hem i odenem tu se ol papa mo mama oli mas bildimap ol famli mo karem olgeta i kambak long laet mo trutok [luk long Doktrin mo Ol Kavenan 93:36–40 ], stap lidim olgeta i go long wan hop long Kraes” (“From Wanem Mared, From Wanem Famli ,” Liahona , Mei 2015, 51).
Ol Prinsipol blong Famle Ofisol Toktok Oli Joen long Naesfala Wei
Elda Neil L. Andersen
Blong Kworom blong Olgeta Twelef Aposol
“Sapos yumi jusum sam pat nomo we yumi akseptem long ofisol toktok, yumi blokem lukluk ia blong yumi we i go long taem we i no save finis, mo lukluk fulap nomo long ol eksperiens blong yumi long ples ia mo naoia. Taem yumi stap tingting hevi wetem prea abaot ofisol toktok tru long ae blong fet, yumi andastanem moa hao ol prinsipol ia oli joen gud, oli sapotem olgetawan mo soemaot plan blong Papa blong yumi blong ol pikinini blong Hem” (“Ae blong Fet ,” Liahona , Mei 2019, 35–36).