Yu Bin Mekem Bubuwoman blong Yu I Hapi

Blong stap groap wetem wan papa mo mama we sora blong tufala i fas, mi bin kam blong save gud se famli blong mi defren. Taem we mi bin yang, i no gat wan blong intepret blong papa mo mama blong mi long ol Jos miting o ol aktiviti, mekem se plante taem mifala i no stap go.

Oltaem mi stap filim olsem wan aotsaed we i stap lukluk i go insaed, mo stap wantem wanem we ol narafala memba long wod blong mi oli gat—wan famli we oli prea mo stadi tugeta.

Kolosap long en blong senia yia blong mi long hae skul, mifala i kam moa aktiv insaed long Jos nomata long situesen blong mifala. Papa mo mama blong mi i bin sil insaed long Mesa Arizona Tempol, mo tu aot long fo brata mo sista blong mo mi i bin sil i go long tufala.

Faef yia i pas, mi bin stap rere blong endao mo mared insaed long tempol. Naet bifo long tempol siling blong mi, brata blong mi mo waef blong hem i bin atendem tempol blong mekem proksi wok blong papa mo mama blong mama blong mi blong stap rere from siling blong tufala long nekis dei. Mama blong mi i bin wan konvet blong kolosap 20 yia long tetaem ia, mo hem i wantem tumas blong statem famli histri mo tempol wok blong hem.

Long nekis dei, bubuman mo bubuwoman blong mifala tufala i bin sil i go long tufala, brata mo waef blong hem, tufala bakegen i stanap olsem proksi blong tufala. Hemia i dei blong mared blong mi, yes, be hemia i givim wan ekstra impoten samting long mi. Bubuman mo bubuwoman blong mi, tufala we mi neva mitim bifo, tufala i stap serem spesel dei ia wetem mi.

Sam dei i pas, taem mi mo hasban blong mi i stap openem ol presen blong mared, mitufala i bin openem wan spesel presen we i kam long fas kasen blong bubuwoman blong mi. Hem i wan woman we i gat strong bilif, we hem i bin gat strong rilesensip wetem bubuwoman blong mi. Presen ia i bin wan pikja blong bubuwoman blong mi long taem blong mared blong hemwan. Wan kad we i kam wetem i talem se, “Bubuwoman blong yu i glad tumas wetem yu mo i stap lukluk i kamdaon long yu.”

Kasen ia i no save hamas mesej blong hem i minim wanem long mi. Mo tu, hem i no save abaot tempol wok we oli jes mekem blong bubuwoman blong mi i no longtaem. Mi save insaed long hat blong mi long stret taem ia se, bubuwoman blong mi i bin glad tumas wetem mi mo hapi se famli blong mifala i bin stat long impoten rod ia blong famli histri mo tempol wok.

Mifala i bin wan famli blong oltaem naoia, long rod ia blong stap karem i kam tugeta ol bubu blong mifala mo we mama blong mi i bin lidim, blong save stap blesem famli blong mifala long narasaed blong vel.