“Blong Taem blong Yumi,” Liahona, Septemba 2025.
Blong Taem blong Yumi
Teti yia i pas, afta we oli bin introdiusum ofisol toktok abaot famli i go long wol, ol tabu prinsipol blong hem oli talem stret wanem we bae i hapen long fiuja mo oli tru bitim eni samting.
Presiden Gordon B. Hinckley i stap givim toktok long wan kongregesen long Santiago, Chile
Long Septemba 23, 1995, Presiden Gordon B. Hinckley (1910–2008) i stap givim toktok long wan kam tugeta blong ol sista blong Rilif Sosaeti mo introdiusum “Famle: Wan Ofisol Toktok I Go long Wol.” Hemia i sam long ol komen blong hem long taem ia:
“Mi biliv se hemia i mas stap olsem wan blesing long evri pikinini we oli bon i kam long wan hom we long ples ia nao, oli welkamem olgeta, lukaot gud long olgeta, lavem olgeta mo gat blesing ia blong gat wan papa mo mama, we tufala i stap fetful long tufalawan mo long ol pikinini blong tufala. …
“Taem yu sua gud mo mekem ol pikinini blong yu oli olsem wan tresa tru long ol wei blong gospel blong Jisas Kraes, wetem lav mo gat hae save long wanem we yu wantem olgeta blong kam olsem, bae i olsem se oli gat moa pis long laef blong olgeta. …
“Wetem fulap giaman tingting we i mekem yumi no luksave trutok, wetem fulap giaman toktok abaot ol standet mo ol valiu, wetem fulap temtesen we i luk naes we i stap pulum tingting blong yumi sloslo i go long wol, yumi filim blong wonem o givim woning bifo. Blong talem moa long hemia, mifala long Fas Presidensi mo Kaonsel blong Olgeta Twelef Aposol i pablisim wan ofisol toktok i go long wol olsem wan dikleresen mo blong talem strong bakegen ol standet, ol doktrin mo ol samting we ol famli oli stap mekem oltaem we ol profet, sia mo ol reveleta blong jos ia oli gohed blong stap ripitim truaot long histri blong hem. …
“Mifala i askem i go long evriwan blong ridim gud, tingting hevi mo prea from ofisol toktok ia. Paoa blong eni nesen i hang strong insaed long ol wol blong ol hom blong hem. Mifala i askem strong long ol pipol blong mifala long evri ples blong mekem ol famli blong olgeta i kam moa strong long bilif, wetem ol valiu we i nidim blong respektem folem taem.”