?Wehem Ol Blesing Blong Mi Taem Mi Stap Pem Taeting?

Tingting blong God oltaem bae i no olsem tingting blong yumi (luk long Aesea 55:8–9). From hemia, ol blesing blong God bae oltaem oli no kam long yumi folem tingting blong hat o wei we yumi wantem. Olsem wan eksampol, Elda Bedna i givim sam eksampol blong ol blesing we yumi no tingting long hem we i kam tru long taem we yumi stap pem taeting: “Samtaem yumi askem God blong gat sakses, mo Hem i givim long yumi paoa long saed blong bodi mo spirit. Maet yumi askem strong blong kam rij, be yumi kam blong luksave samting moa mo yumi kam antap long fasin blong gat longfala tingting, o yumi askem blong gro long saed blong spirit mo oli blesem yumi wetem presen we i gladhat. Hem i save putum long yumi stret save mo biliv long yumiwan taem yumi traehad blong fufilim ol gol we oli gud. Mo taem yumi askem blong yumi kamaot long ol hadtaem long saed blong bodi, tingting, mo long spirit, Hem bae i leftemap yumi blong gat strong tingting mo stanap strong kasem en.”

Elda Bedna i talem tu se samtaem “blesing we i kam long yumi tru long ol windo blong heven bae i bigfala paoa moa blong jenisim laef stael blong yumi be i no blong ting se laef stael blong yumi bae i jenis tru long wan nara man o samting.” Luk long eksampol ia, olsem wanem wan hasban mo waef long Ajentina tufala i bin filim hemia long laef blong tufala long stori ia“Why Do You Still Pay Tithing?” (Liahona, Maj 2013, 37).

Yumi save lanem tu blong trastem se ol blesing bae oli kam folem taem mo wei blong God Hemwan.

Elda Michael John U. Teh blong Olgeta Seventi: “Taem yumi obei long loa blong taeting, yumi … no mas givim wan las deit we Lod i mas mekem wanem yumi askem. I gat wan fasin we sam man i gat taem olgeta i stap wantem blong kasem ol materiol blesing, long wan stret taem folem tingting blong olgeta. Hemia i olsem wanem ia nao oli stap lusum tras blong olgeta long ol promes blong Hem. Oli fetful long stat be afta, oli stop blong obei afta sam taem i pas we oli no kasem wanem we oli tingting long hem. Yumi nid blong luksave se evri samting oli hapen folem tingting blong Lod mo taem blong Hem mo i no folem taem blong yumi.”

Blong stap andastanem se taem blong God i defren long taem blong yumi, i save helpem yumi luksave moa gud se, from nomo se yumi no kasem wan kwik merikel, i no minim se yumi no kasem blesing.

Presiden Dallin H. Oaks, Fas Kaonsela insaed long Fas Presidensi i bin tijim se, “Wan i bin talem wan taem se, laef hem i wanem we i stap hapen long yumi taem yumi stap mekem ol narafala plan. From ol samting we yumi no gat paoa blong save kontrolem, yumi no save mekem plan mo mekem i hapen evri samting we tingting blong hat blong yumi i wantem long laef blong yumi. Plante impoten samting bae oli hapen long laef blong yumi we yumi no mekem plan from, mo bae yumi no akseptem tu sam long olgeta.”

Long laef blong yumi long wol ia, iven long olgeta we oli stap obei long loa blong taeting, bae oli save gat eksperiens ia blong traehad long saed blong faenens from oli no wok, oli gat ol imejensi we oli no tingting long hem, oli no lukaot gud long mane o gat wan inkam we i no stap gro i kam bigwan. Blong save se Lod i gat paoa blong kontrolem samting, i save helpem yumi blong gro long fet mo gat longfala tingting taem yumi lukaotem ol gudgudfala blesing we man i no save luk we i kam tru long taeting. Maet sam long ol hadtaem ia oli rili ol blesing we bae i helpem yumi blong kam antap tru long ol hadtaem ia.

Elda Hugh B. Brown blong Kworom blong Olgeta Twelef Aposol (1883–1975) long wan taem i bin serem wan lesen we hem i bin lanem taem i stap katem klinim gud wan bus blong ol tri blong beri frut long wan fam long Kanada.

Taem hem i stap go raon blong stap klinim mo stap mekem gud propeti blong hem, hem i bin kam krosem wan bus blong ol tri blong beri frut we oli bin gro ova long wan mita i go antap mo no stap karem eni frut blong ol beri. From hemia, hem i katemaot ol branj blong mekem se oli gro gud bakegen, mo lego sam i stap, mo terem sam stamba mo blong sepem. Wei we yu luk i olsem se bus blong ol beri tri ia oli stap krae, mo Elda Brown i ting se i harem bus ia i stap talem:

“?From wanem yu mekem olsem long mi? Mi bin stap gro gud tumas. … Mo naoia yu katemdaon mi. … Mi ting se yu nao yu man blong lukaot long ples ia.”

Elda Brown i ansa, “Luk smol bus blong beri tri, mi mi man blong lukaot long bus long ples ia, mo mi save wanem we mi wantem yu blong kam. Sapos mi letem yu go folem rod we yu wantem blong folem, bae yu neva karem eni samting. Be sam dei, taem yu hevi wetem frut, bae yu tingting bak mo talem se, ‘Tangkyu, Mista. Man blong lukaot long bus blong stap katemdaon mi, blong stap lavem mi inaf blong mekem mi harem nogud.’”

Taem yumi stap traehad long saed blong mane, mo no luk ol promes blesing blong stap pem taeting, maet wetem wota fulap long ae, bae yumi askem God long semmak fasin, “?From wanem yu mekem olsem long mi? Mi stap mekem evri samting we yu bin askem long mi. Mo naoia, yu bin katemdaon mi.”

Long ol kaen taem olsem, yumi save tekem smol taem blong tingting se ol hadtaem we yumi stap fesem bae i tru se oli tekem ol blesing we i kam tru long ol lesen we yumi lanem folem rod ia. Yumi save lanem blong trastem moa fulwan Man blong Lukaot long Bus mo ol blesing we Hem i bin sevem i stap blong yumi taem yumi stap kolosap long Hem.

Ol gudgudfala blesing we man i no save luk we i kam long God, we Hem i stap givim long yumi tru taem yumi stap pem taeting, i save helpem yumi blong winim ol hadtaem blong wol. Papa blong yumi long Heven we i gat bigfala lav bae i sepem gud long wei we i stret mo gud evriwan, ol blesing blong helpem yumi blong kam antap mo kam moa olsem Hem. Taem yumi praktisim fet blong stap luksave mo akseptem evri blesing we i kam, yumi save luk se promes blong Malakae i stap kam tru.

Taem we i gat tu tingting mo fasin blong lusum hop i girap tru ol traehad blong yumi long saed blong mane, sapos yumi krae mo askem kwestin ia sapos yumi gat blesing, !yumi no mas givap long hop! Be, yumi save prea blong luk ol gudgudfala blesing we man i no save luk we Lod i bin givim long yumi mo gat fet long plan blong Papa long Heven we i gat long yumi.

Olsem we Elda Andersen i bin testifae se, “Mi promesem yu se taem yu trastem Lod, ol blesing blong heven bae i folem.”