Ol Kwestin mo Ol Ansa abaot Helt blong Tingting

K: ?Ol jalenj blong mi long saed blong sik long tingting oli ol risal blong wan sin?

A: “Hem i impoten blong luksave se [sik long tingting] hem i no kam from wan i no strong, o from se wan i mekem sin. Tugeta, yumi save brekem ol klaod ia blong stap yuwan mo no akseptem samting, mekem se ol hevi blong sem ia bae i kamaot mo ol merikel blong hiling i tekem ples.”

K: ?From wanem mi no kam oraet taem mi stap mekem wanem we i raet?

A: “Yu no mas tingting se yu save fiksim evri samting, be fiksim wanem we yu save mekem. Sapos olgeta ia oli ol smol viktri nomo, stap glad long olgeta mo gat longfala tingting. Plante taem insaed long ol skripja, Lod i givim komanmen long wan blong ‘stanap kwaet’ o ‘stap kwaet’—mo wet. Stap gat longfala tingting blong stap strong blong go tru long sam samting, hem i pat blong edukesen laef blong yumi long wol ia.”

K: ?Olsem wanem bae mi save se mi stap kasem ansa blong ol prea taem we sik blong mi long saed blong tingting i mekem i had blong luksave olgeta?

A: “Aot long plante samting we yumi no sua long olgeta mo ol jalenj we yumi stap fesem long laef blong yumi, God i nidim yumi blong mekem bes blong yumi, blong tekem aksen mo i no blong samting i tekem aksen long yumi, (luk long 2 Nifae 2:26), mo blong trastem hem. … Oltaem yumi muv i go fored mo stap hop mo stap prea—be i no gat stret hop—se yumi stap tekem aksen folem tingting blong God. Be taem yumi onarem ol kavenan blong yumi mo obei ol komanmen, taem yumi traehad moa strong blong mekem gud oltaem mo blong kam moa gud, yumi save wokbaot wetem tras se God bae i lidim ol step blong yumi.”

K: ?Olsem wanem nao mi save filim glad insaed long gospel taem we bigfala sik long tingting i mekem i had blong filim glad?

A: “Taem yu stap lukaotem toktok blong God blong kasem wan save we i moa klia long plan blong God, mo traehad blong wokbaot long Wei blong Hem, bae yu eksperiensem ‘pis blong God, i bitim save blong yumi’ [Filipae 4:7], nomata long taem blong sore. Bae yu filim lav blong God we i bigwan bitim mak, i stap solap long hat blong yu. Laet blong heven bae i kam tru long ol tudak blong ol hadtaem blong yu, mo bae yu stat blong eksperiensem ol glori mo sapraes blong kingdom blong heven we i stret gud. Bae yu filim se spirit blong yu i flae i go antap aot long paoa blong wol ia.”

K: ?Olsem wanem nao mi save lanem blong trastem mo dipen long Kraes taem mi filim olsem se mi no save trastem miwan from ol jalenj blong mi long saed blong sik long tingting?

A: “Moa yu lanem abaot Sevya, moa i isi blong yu trastem sore blong Hem, bigfala lav blong Hem we i no gat en, paoa blong Hem we i mekem man i kam strong moa, i kam oraet, mo i pemaot man.

“… Sapos evri samting mo evri narawan long wol we yu trastem i mas foldaon, Jisas Kraes mo Jos blong Hem bambae oli neva letem yu stap daon.

K: ?Kraes i save stret wanem we mi stap filim?

A: “Ating bae i no gat wan memba blong famli, fren, o prishud lida—nomata wanwan long olgeta i luklukgud long yu mo respektem yu—we oli save gud wanem filing yu stap gat o oli gat stret toktok blong helpem yu blong kasem hiling. Yu mas save hemia se: i gat Wan man we i save gud wanem yu stap go tru long hem, Hem i ”moa strong bitim ful wol’ [1 Nifae 4:1], mo Hem i save mekem ol bigbigfala wok we i bitim mak olgeta, long wanem [yu] stap askem mo yu stap tingbaot’ [Efesas 3:20].”

K: ?God i stap lavem mi yet nomata se mi gat ol jalenj long saed blong sik long tingting?

A: “Ating bae i gat ol kores blong ol voes blong pulum daon tingting, mo tudak i fulumap ol tingting blong yu, ol mesej we oli stap talem long yu se yu safa tumas mo konfius, yu wik tumas mo oli no wantem save long yu, yu defren o yu lus blong gat raet ia blong kasem stret lav ia blong heven. Sapos yu harem ol tingting ia plis harem hemia: ol voes ia oli rong evriwan. Yumi save gat bigfala tras blong save karemaot ol samting we oli brokbrok long eni wei we oli mekem yumi no kwalifae from lav we i kam long heven.”

K: ?From wanem God i no tekemaot jalenj ia?

A: “Taem wan i traehad blong kasem pis mo andastaning long ol had poen ia, hem i impoten tumas blong tingbaot se yumi stap laef—mo yumi jusum blong laef—long wan wol we i no stret, wan ples we bae ol hadwok blong stanap from ol tabu samting mo kam olsem wan god, bae oli testem, mo bae oli traem yumi bakegen mo bakegen. Bigfala tras long plan blong God, i we i gat promes blong wan Sevya, wan Ridima, we tru long fet blong yumi long Hem, bae i mekem yumi kam antap mo winim ol tes mo hadtaem ia, nomata praes blong hem bae i bigwan tumas long tugeta, Papa we i sendem Pikinini, mo Pikinini ia we i bin kam. Hem i wan glad nomo from bigfala lav ia we bae i mekem se smol safaring blong yumi bae i isi blong tekem, afta yumi andastanem, mo i pemaot yumi.”

K: Sapos mi save se long nekis laef bae i moa gud, ?from wanem mi mas gohed blong stap laef long laef long wol ia?

A: “Nomata wanem wari blong yu, o samting we i had, ded tru long fasin blong tekemaot laef blong yuwan, i no ansa. Bae i no helpem harem nogud ia we yu stap filim o we yu ting se yu stap givim. Long wan wol we i nidim tumas evri laet we hem i save karem, plis, yu no daonem laet we i no save finis we God i bin putum insaed long sol blong yu bifo wol ia i stat. Toktok long wan. Askem help. Yu no aotem wan laef we Kraes i bin givim laef blong Hem blong holemtaet gud. Yu save tekem ol had samting blong laef long wol ia from se bae mifala i helpem yu blong tekem olgeta.”

“Nomata wanem faet blong yufala, ol brata mo sista blong mi—long tingting, long filing o long bodi o wan narawan—!yufala i no vot agensem laef mo traem katemaot laef ia! Trastem God. Hang strong long lav blong Hem. Yu mas save se, wan dei, laet bae i brok delaet mo evri tudak blong wol bae oli ronwe.”

K: ?Olsem wanem mi save sapotem olgeta we mi lavem we i stap fesem ol jalenj long saed blong sik long tingting?

A: “Blong stap tijim yumiwan abaot sik blong tingting, i mekem yumi rere blong helpem yumiwan mo ol narawan tu we maet oli stap gotru long hadtaem. Ol open mo ones storian wetem wanwan long yumi, bae i help blong man i luksave mo tokbaot impoten topik ia. Afta long evri samting, infomesen i kam faswan long insperesen mo revelesen. Ol jalenj ia, we fulap taem man i no stap luksave, i save spolem eniwan, mo taem yumi stap gotru long hem, bae i luk se i bigwan tumas blong winim.

“Wan long ol fas samting we yumi nidim blong lanem hem i we, yumi no stap yumiwan. Mi invaetem yu blong stadi long topik blong sik blong tingting long seksen blong Help long Laef long Gospel Laebri ap. Blong stap lanem samting bae i lidim yu andastanem moa, akseptem moa, gat moa sore, gat moa lav. Hem i save mekem hadtaem long laef i kam moa smol, mo long semmak taem, hem i helpem yumi blong developem mo skelem gud ol helti tingting mo helti lukluk.”

K: Wan long olgeta we mi lavem i tekemaot laef blong hemwan from ol jalenj blong helt blong tingting. ?Wanem nao bae i hapen long olgeta?

A: “I gat wan kristin bilif se fasin blong tekemaot laef blong yuwan i wan sin mo wan we i [ded tru] long fasin ia bae i go stret long hel blong oltaem. Hemia i wan bigfala giaman toktok. Mi biliv se plante long ol kes olsem bae oli faenem se wanwan man o woman ia oli bin stap laef long wan gudfala laef mo se fasin ia blong tekemaot laef bae i no talemaot fasin blong olgeta o wanem samting bae i hapen long laef blong olgeta long taem we i no save finis.”

Stap Muv I Go Fored mo Stap Lukluk I Go Antap

Sam long ol ansa we God i stap givim long yumi oli defren long wanem we yumi stap hop from, mo sam ansa bae oli no kam long laef ia. Taem yumi no save evri samting naoia abaot from wanem plante long yumi i stap faet wetem ol jalenj blong helt blong tingting, yumi save tekem insaed long hat blong yumi promes ia se wan dei bae yumi gat wan andastaning we i stret gud evriwan abaot evri samting. Ol efot blong yumi—nomata se wanwan taem i no gat wan gudfala risal—bae evriwan i gat praes (luk long Galesia 6:9; Doktrin mo Ol Kavenan 58:3).

Elda Dieter F. Uchtdorf blong Kworom blong Olgeta Twelef i bin tijim se: “Fet i naes from hem i gro iven taem ol blesing oli no kam olsem we yumi hop from. Yumi no save luk fiuja, yumi no save evri ansa, be yumi save trastem Jisas Kraes taem yumi stap go fored mo antap, from Hem i Sevya mo Ridima blong yumi.”

Olsem we yu mo olgeta we yu lavem i faenem i had tumas long sik blong tingting, tingbaot se evri samting we i no stret abaot laef bae oli mekem i kam stret tru long Jisas Kraes. Gohed blong stap muv i go fored mo lukluk i go antap—wetem Hem long saed blong yu, oltaem yu save gohed strong wetem hop.