God I Bin Givim Pis long Mi

Taem we mifala i stap rere blong singsing long taem blong dedikesen sesen blong Concepción Chile Tempol long 2018, evri memba blong yang adalt kwaea we mi stap kondaktem, oli gat semmak gol: mekem miusik mo wok long saed blong spirit we i impoten blong givim bes singsing we mifala save givim.

Wetem ol memba blong kwaea, blong tu stek long siti blong Chillán, mi promesem miwan blong stap klin olsem we mi save mekem. Mi wantem blong luk mo tingting hevi long Laet blong Kraes long laef blong mi. Mi wantem se wanem we mifala i givim long God insaed long tabu haos blong Hem bae i stret gud evriwan olsem we i posibol. Mi bin save se sapos mifala i bin mekem pat blong mifala, Papa long Heven bae i save helpem mifala, mo bae mifala singsing olsem we bae mifala save singsing.

Long taem blong dedikesen, mifala i bin singsing wetem ol voes blong mifala mo ol hat blong mifala. Mi ting se ol enjel oli bin singsing wetem mifala. Saon blong kwaea i bin gud tumas. Mifala i bin filim se gladhat blong God i bin stap wetem mifala mo se Hem i glad tumas long wanem we mifala i stap givim. Filing ia i bin stap wetem mi blong wan longfala taem.

Afta long dedikesen blong tempol, filim spirit i fulumap mi mo stap wetem Papa long Heven. Mi filim wan strong koneksen wetem Hem bitim eni taem bifo we mi bin eksperiensem. Koneksen ia i bin strong we i mekem se mi filim wetem spirit mo we i lidim mi long wanem blong mi askem taem mi prea (luk long 3 Nifae 19:24).

Long taem blong dedikesen blong tempol, mi bin gat bel, mo bebi i faef manis yet. Afta sam manis i pas, mi lusum bebi blong mi we i stap insaed long bel blong mi yet. Taem ia i wan nogud taem tumas. Mi filim nogud tumas, speseli taem mi faenemaot se maet bae mi nomo save gat moa pikinini.

Be had eksperiens ia i hapen long wan taem we mi bin filim se laef blong mi long saed blong spirit i strong. Mi andastanem se mi bin rere finis from taem ia tru ol aksen we mi tekem blong stap givim wanem mifala i bin givim blong save kasem wanem we i kam long God insaed long tempol. Paoa long saed blong spirit we mi bin eksperiensem, i bin helpem mi blong winim hadtaem ia from se Papa long Heven i bin stap wetem mi mo i bin givim pis long mi.

Wan sot taem i pas, God i bin blesem mi mo hasban blong mi wetem wan merikel. Mitufala i bin fulap glad taem we pikinini boe blong mitufala, Arturo, i bin kasem wan smol sista blong hem, Daniela.

Bae mi no bin save winim ol hadtaem blong mi sapos mi no bin gat wan koneksen rilesensip we mi bin glad long hem we i blong stap kolosap wetem God. Mi bin save se evri samting bae i Oraet mo bae i folem tingting blong Hem. Blong stap tingbaot ol samting ia, i stap fulumap yet hat blong mi wetem bigfala glad mo fasin blong talem tangkyu.