“Kolosap KOVID I Pulumaot Tingting blong Hem long Tabenakol Kwaea Drim blong Hem,” Liahona, Septemba 2025.
Kolosap KOVID I Pulumaot Tingting blong Hem long Tabenakol Kwaea Drim blong Hem
Blong stap long kwarantin, taem ia i bin tijim wan naesfala lesen: Lav olsem hemia blong Kraes long olgeta we oli stastap olgetawan.
Long fol blong 2024, i no longtaem afta we oli bin singaotem hem olsem eria oganaesen advaesa long Yurop Sentrol Eria, Laura Echarri Hermoso i bin travel blong moa long 8047 kilomita long hom blong hem long Pamplona, Spen, blong singsing olsem wan ges memba blong Tabenakol Kwaea long Tempol Skwea.
Hem i bin stap long Sol Lek Siti, Yuta, YSA blong tri dei nomo taem oli testem blad blong hem mo faenemaot se hem i positif long KOVID-19 mo putum hemwan i stap long kwarantin. Janis blong hem blong singsing long kwaea blong jeneral konfrens we i stap kam, i luk olsem se bae i wan had samting blong mekem.
Long taem we hem i stap hemwan mo stap long rum blong hem long hotel, hem nildaon mo prea. Hem i hop blong kasem hiling. Hem i wantem tumas blong save singsing. Hem i holemtaet fet blong hem.
Wan Yia we I Jes Pas
Long wan hadtaem blong lus, taem we ol tritmen blong helpem hem blong save gat bebi we i pruvum se i no gat wan sakses, mo mama blong hem i stap safa long sik blong lusum memori long tingting, sista Echarri i no save faenem voes ia blong hem blong singsing olsem we bifo hem i bin save stap singsing. I bin had from se oltaem miusik i bin wan impoten pat long laef blong hem. Hem i talem se, “Hemia i wan nid we oltaem mi gat taem mi bin stap olsem wan yang gel.
Sista Echarri (lefsaed) wetem mama blong hem, María.
Taem hem i stap prea, wan tingting i kam se hem i nidim blong singsing wetem moa pipol. Wan wik i pas, wan Jos atoriti i kondaktem hem mo gat wan intaviu wetem hem. “Hem i tokbaot wan miusik projek we Jos i stap statem mo we oli stap lukaotem ol singga,” Sista Echarri i talem.
Hem i no talem stret stamba tingting, be afta long nambatu intaviu, atoriti ia i talemaot se Jos i wantem ol ges singga blong Global Paticipant Program blong Tabenakol Kwaea blong singsing long jeneral konfrens.
Hem i talem se “Mo mi stat blong krae from mi no save wanem i stap hapen, be mi filim se Lod i bin stap long ples ia mo we Lod i save gud mi, mo hemia i wan samting we mi neva, eva tingting long hem bifo.”
Rod We I Go long Jeneral Konfrens
Intaviu ia i bin wan fas samting blong mekem mo i folem wetem wan nambatu intaviu wetem ol narawan. Sista Echarri tu i mas rekodem hemwan we i stap singsing mo sabmitim sam long ol rekoding ia. Afta, hem i gat wan faenol intaviu wetem miusik asisten daerekta blong Tabenakol Kwaea, Ryan Murphy. Hem i talem se, “Mi bin wari bigwan”.
Long en, oli bin jusum hem wetem 13 narawan raon long wol blong singsing long jeneral konfrens, mo long Septemba 2024, hem i go long plen blong go long Yunaeted Stet. Afta long taem we hem i kasem Yunaeted Stet, oli faenemaot se hem i kasem KOVID-19 mo taem ia nao oli stat blong putum hem i stap long kwarantin.
Filing ia blong filim se mi stap miwan longwe long hom i bin tijim mi wan naesfala lesen: Sevya bae i givim kamfot long ol taem we wan i stap hemwan (luk long Jon 14:26–27). Hem i talem se, “Mi ting se bae mi no save joen ia long taem ia”. “Tingting blong mi i foldaon bigwan, be mi bin gat fet. Long semmak taem, mi no filim gud tu. Naoia wan long ol stamba tingting blong mi blong lukaotem olgeta we oli we maet filim filing ia blong stap olgetawan mo traem blong givhan long olgeta.”
Afta long eit dei we hem i stap long kwarantin hemwan long wan rum, helt mo voes blong hem i kam gud bakegen, mo hem i bin praktis wetem kwaea. Hem i joenem voes blong hem wetem handred singga long fored insaed long Konfrens Senta mo i bin singsing long Oktoba 2024 jeneral konfrens.
“God i stap laef. Hem i talem se, “God i save gud, wanwan long yumi.” “Miusik hem i hiling, i gat paoa blong hiling mo yumi nidim blong fulumap laef blong yumi wetem miusik. Hemia i impoten tumas. Mi filim se hemia i wan samting we Lod i stap traem blong talem long mi: Fulumap laef blong yu wetem miusik.”