“Ol Odinens Blong Tempol Oli Yunaetem, Konektem mo Silim,” Liahona, Septemba 2025.
Ol Lukluk blong Histri long Haos blong Lod
Ol Odinens Blong Tempol Oli Yunaetem, Konektem mo Silim
Histri blong tempol wok long ol las dei ia i soem bigfala intres mo revelesen blong tijing folem tijing abaot baptaes long bihaf blong olgeta dedman.
Pikja droing i kam long Dan Burr
Betsy King Duzette i traehad blong wokbaot i go tru long kolkol wota blong Misisipi Reva. Wido we i gat 58 yia mo i konvet long Connecticut i kasem baptaes afta, blong ol angkel blong hem, palika mo step papa blong hasban blong hem.
I no longtaem i pas, Profet Josef Smit i bin tijim Ol Sent long Ogis 1840 abaot doktrin blong baptaes long bihaf blong ol dedman. Wetem bigfala glad, oli mekem ol baptaes long reva, stat long taem we oli no komplitim Nauvu Tempol. Ol woman oli bin baptaes long bihaf blong ol man mo ol man long bihaf blong ol woman. Kwiktaem, be Lod i talemaot long Josef Smit se baptaes blong olgeta bubu we oli ded finis oli mas mekem insaed long ol tempol we oli dediketem (luk long Doktrin mo Ol Kavenan 124:28–35). Mo long 1845, Brigham Yang i anaonsem se ol woman oli mas kasem baptaes long bihaf blong ol woman mo ol man long bihaf blong ol man.
Hasban blong Betsy, Philemon Duzette, i bin ded sikis yia i pas. Hem i gat strong tingting blong wantem kasem baptaes long kolkol wota long bihaf blong ol narafala famli blong hem we oli ded finis mo tu, ol stret famli blong hemwan. Hemia i tekem tu baptaes blong step papa blong Philemon, Jesse Peas, we i bin ded 50 yia i pas taem we Betsy i bin wan yangfala gel. Maet Betsy i neva bin mitim hem, be Betsy i save smol samting abaot hem mo i save nem blong hem mo rilesensip blong Philemon wetem mama blong hem, Martha Wing. Betsy i bin save Martha taem we hem i bin stap laef yet.
Betsy i bin kasem baptaes long bihaf blong Jesse, kwiktaem blong stap folem ol revelesen abaot baptaes blong ol dedman. Mo hem mo hasban blong hem i putum nem blong wan long ol pikinini blong tufala, Jesse. Stret papa blong Philemon, we nem blong hem tu, Philemon, i ded taem we hem i wan smol pikinini, mo Jesse Peas i kam olsem step papa blong hem taem we Philemon i bin gat tri yia mo helpem Martha blong lukaot long hem i kam bigwan.
Blong stap olsem ol step paren i bin stap oltaem, stat long ol yia eitin mo naentin long Amerika. Ol hae ret blong laef long wol ia mo hae namba blong ol man mo woman we oli stap mared bakegen i minim, se plante long pipol oli bin stap laef wetem ol step famli o ol famli we oli traem blong lukaot long olgeta. From hemia, famli blong Duzette-Peas i bin konek tu taem : faswan long taem we mama blong Philemon i bin maredem Jesse Peas mo nambatu taem, i tru long baptaes long bihaf blong olgeta we oli ded finis.
Stap droem ples blong baptaes insaed long fas Tempol blong Nauvu
Stap Sevem Olgeta We Yumi Lavem
Fasin ia blong stap mekem baptaes long bihaf blong wan we i ded, i tekem olgeta we oli stap laef blong joen tugeta wetem olgeta long wan wei we bae i stap strong kasem taem we i no save finis. Olsem we Josef Smit i bin raetem abaot baptaes blong ol dedman i wan “ring blong jen” we i joenem olgeta we oli laef wetem olgeta we oli ded, “from we yumi, sapos i no gat olgeta, yumi no save kam stret gud evriwan; mo semmak, olgeta, sapos i no gat yumi, oli no save kam stret gud evriwan” (Doktrin mo Ol Kavenan 128:18).
Josef Smit i bin tijim se sapos i no gat ring blong jen ia, bae wol ia bae oli kilim wetem wan strong nogud tok, wan samting we blong westem taem nomo, mo oli krietem be i no gat wan stamba tingting (luk long Doktrin mo Ol Kavenan 128:17–18). Blong agensem strong anaonsmen ia, i gat revelesen blong Josef we i fulap long glori abaot paoa blong joenem evri pikinini blong God tugeta blong taem we i no save finis.
Blong ademap long ol impoten samting abaot ol proksi odinens long bihaf blong ol memba blong famli we oli bin ded, Josef i tokbaot plante se, hem i blong gud blong olgeta tu we oli stap laef: “Mo nao, ol gudfala brata mo sista blong mi we mi lavem tumas, letem mi talem stret long yufala se ol prinsipol ia long saed blong olgeta we oli ded mo olgeta we oli laef, bae yumi no save tingting nating long hem, hemia long saed blong fasin blong sevem yumi.” (Doktrin mo Ol Kavenan 128:15).
Long Josef Smit, ol revelesen ia oli bin tajem hemwan bigwan. Fasbon brata blong hem, Alvin, i bin ded long 1823, mo Josef i bin filim filing ia blong lusum wan long laef blong hem. Long wan revelesen blong 1836, Josef i bin gat wan visen abaot “selestial kingdom blong God, mo glori blong hem,” mo “get we i naes i bitim mak,” mo “ol naesfala rod blong kingdom ia.” Long medel blong bigfala visen ia abaot selestial kingdom, hem luk tu wanwan memba blong famli we hem i bin save mo lavem olgeta, we i gat tu, brata blong hem Alvin. Hem “sapraes tumas” se Alvin we i bin neva kasem baptaes, i bin stap pat blong “selestial kingdom blong God.” (Luk long Doktrin mo Ol Kavenan 137:1–6.)
Bifo long Stat blong Wol Ia
Koneksen bitwin olgeta we oli stap laef mo olgeta we oli bin ded, i stap soem naesfala mak ia blong stap sevem wanwan man o woman, blong olgeta we “oli ded bifo oli kasem save long gospel” (Doktrin mo Ol Kavenan 128:5) oli bin save olgeta mo rod blong olgeta blong sevem olgeta, oli bin givim bifo oli bin kam long wol ia. I tru, baptaes blong ol dedman, oli bin stanemap “blong sevem [yumi], bifo long stat blong wol,” (Doktrin mo Ol Kavenan 128:8). I bin gat ol narafala revelesen abaot ol odinens blong siling we i oli kam afta long ol revelesen abaot baptaes blong ol dedman. Blong stap silim ol pikinini i go long papa mo mama i bin kasem wan hae mak blong odinens we i givim mo joenem evriwan we oli eva laef long wol ia (luk long Doktrin mo Ol Kavenan 138:47–48).
Long wan naesfala toktok blong jeneral konfrens blong Epril 2018, Elda Dale G. Renlund blong Kworom blong Olgeta Twelef Aposol i bin tokbaot ol paoa blong ol siling koneksen ia:
“God, long bigfala paoa blong Hem, i silim mo i hilim ol man, woman mo famli nomata ol aksiden, ol lus, mo hadtaem.
“Tru long sakrifaes blong Hem we i pem praes, Jisas Kraes i givim ol blesing ia long evriwan, olgeta we oli ded mo oli laef.”
Semmak olsem Betsy King Duzette i bin bilivim mo trastem taem hem i gohed strong i go insaed long kolkol wota blong Misisipi Reva long bihaf blong step papa blong hasban blong hem, yumi, evriwan, i save stap joen, sil, fasem tugeta mo weldem yumi i kam tugeta blong taem we i no save finis.