Blesing We I Kam Tru long Prishud Atoriti mo Paoa

Jisas Kraes, Hem i hed blong Jos. Jos hem i tul ia we Hem i bin krietem blong mekem i hapen nid blong pemaot evri man long las gospel dispensesen ia, olsem long dispensesen we Hem i bin stap laef long wol ia. Tru long Jos:

• Hem i save talemaot gospel blong Hem raon long wol.

• Hem i save givim baptaes mo evri narafala kavenan—iven wan rod blong kavenan we i go long selestial kingdom blong Hem.

• Hem i save mekem famli i kam wan blong taem we i no save finis.

• Hem i save givim presen blong sevem man, iven long olgeta we oli bin ded we oli no bin kasem.

• Hem i save givhan long ol pikinini blong God long ol nid blong olgeta long saed blong bodi long taem blong tedei.

Blong mekem i hapen ol bigfala stamba tingting ia, mo blong rere from taem we Sevya bae i kambak bakegen, Jos i nidim daereksen.atoriti mo paoa blong God we i stap gogohed. Jos hem i “tru mo i laef” (Doktrin mo Ol Kavenan 1:30) from se Kraes i putum insaed long hem, lidasip mo paoa blong Hem tru long prishud blong Hem, “Tabu Prishud we i folem Oda blong Pikinini blong God.” (Doktrin mo Ol Kavenan 107:3).

Be sapos i no tabu prishud ia, Jos bae i wan nomol oganaesesen we i nogat bilif, we i stap mekem gud long wol be i no gat paoa blong kasem stamba tingting ia blong stap mekem rere ol pikinini boe mo gel blong God blong kasem glad blong laef we i no save finis long ples we Hem i stap long hem. Wetem prishud ia mo ol ki blong daerektem ol wok blong prishud ia, i gat tugeta, atoriti mo oda insaed long Jos.

“Insaed long Jos, evri prishud atoriti, oli yusum anda long daereksen blong olgeta ia we oli holem ol ki blong prishud.

“Olgeta we oli ol man mo memba blong Jos mo oli klin inaf, oli kasem prishud atoriti tru long prishud we oli pasem i kam long olgeta, mo tru long odinesen long ol prishud ofis ia. Evri memba blong Jos oli save yusum atoriti ia we oli pasem i kam long olgeta taem we oli setem olgeta apat, o taem oli kasem wok blong help mekem wok blong God i kamtru.”

Tru long ol ki blong prishud, ol samting we God i putum faswan bae oltaem oli win. I no gat wan we i save gohed blong mekem tingting blong hemwan we i no go stret wetem daereksen blong Hem. I no gat wan we i save kasem save mo mekem ol samting olsem wan pris taem hem i stap lukaotem samting blong gud blong hemwan o blong oli stap presem hem.

Prishud i mekem tu wan impoten wok insaed long hom blong ol memba blong Jos. Presiden Dallin H. Oaks, Fas Kaonsela long Fas Presidensi i bin tijim se, “Prinsipol ia, se prishud atoriti, bae oli save yusum nomo anda long daereksen blong wan we i holem ol ki blong wok ia, i stamba fandesen insaed long Jos, be hem i no olsem insaed long famli.” Ol papa oli prisaed mo oli yusum prishud long famli blong olgeta blong—stap givim kaonsel, mekem ol famli miting, stap givim prishud o blesing blong hiling long ol memba blong famli o ol narawan, mo sam moa—be i no blong wan narawan we i holem prishud i givim raet o daereksen.

“Semfala prinsipol ia, oli yusum tu taem wan papa i no stap mo mama i lida blong famli. Mama i prisaed long hom blong hem, mo i nambawan blong tekem paoa mo blesing blong prishud i kam insaed long famli blong hem tru long endaomen mo siling blong hem insaed long tempol.”

Prishud: Paoa blong Givim Blesing

Long wan toktok, stamba tingting blong prishud atoriti mo paoa we Jisas Kraes i bin putumbak i blong blesem. Hemia i mekem ol memba blong Jos oli save yusum paoa blong God blong stap givim seves mo stap givim blesing long ol narawan insaed long Jos, long hom, mo raon long wol. Ol memba oli joen wetem Sevya blong stap mekem wok blong Hem blong fasin blong sevem man i hapen mo stap yusum ol tabu presen mo paoa i go moa bitim blong olgetawan blong helpem kingdom blong God i gro mo fulumap wol (luk long Doktrin mo Ol Kavenan 65:2, 5–6).

Lod i bin eksplenem se, “prishud ia we i moa hae [Melkesedek Prishud] i lukaotem gospel, mo i holem ki blong ol sikret blong kingdom, we i ki blong kasem save long saed blong God.

“Taswe, insaed long ol odinens blong hem, i gat paoa we i olsem hemia blong God i kamaot.

“Mo sapos i no gat ol odinens blong prishud ia, mo atoriti blong prishud, paoa we i olsem hemia blong God i no kamaot long man taem oli gat bodi blong mit mo bun” (Doktrin mo Ol Kavenan 84:19–21).

Yes, ol odinens oli ol prishud seremoni we oli stap mekem o ol sakramen we tru long olgeta, yumi mekem ol kavenan wetem God, stat wetem baptaes mo stap gogohed tru long ol kavenan we yumi kasem insaed long haos blong Lod. Hem i tru long taem yumi stap kipim ol kavenan ia we i mekem yumi jenis aot long “ol man [mo woman] blong wol” i kam ol sent (luk long Mosaea 3:19) tru long gladhat blong atonmen blong Kraes mo tugeta yumi save se yumi no gat rong tru long gladhat blong Lod mo kam tabu—no gat sem mo no gat mak—long fored blong God (luk long Doktrin mo Ol Kavenan 20:29–31; 3 Nifae 27:16–20).

Kwot ia insaed long “Restoresen blong Gospel blong Jisas Kraes we I Fulwan: Tu Handred Yia Ofisol Toktok,” we i kam long Fas Presidensi mo Kaonsel blong Olgeta Twelef, i talemaot wan sot toktok abaot evri samting we i stap long toktok ia:

“Mifala i stap talem se Jos Ia blong Jisas Kraes blong Ol Lata-dei Sent, we i bin oganaes long 6 Epril 1830, i Niu Testeman Jos blong Kraes, we oli putumbak. Jos ia i angka long stret laef blong jif konaston blong hem, Jisas Kraes, mo long Atonmen blong Hem, we i no gat en, mo long stret Laef Bakegen long Ded blong Hem. Wan moa taem bakegen, Jisas Kraes i bin singaotem Ol Aposol, mo i bin givim olgeta atoriti ia blong prishud. Hem i stap invaetem yumi evriwan blong go long Hem mo long Jos Ia blong Hem, blong kasem Tabu Spirit, ol odinens blong fasin blong sevem man, mo blong kasem glad ia we i stap oltaem.”