“Ol Bonsai Tri Oli Naes Tumas,” Liahona, Septemba 2025.
Ol Bonsai Tri Oli Naes Tumas
Wanwan testemoni i wan presen we i no gat praes we i nidim bigfala fasin blong stap fetful mo gat fet blong mekem se i save stap strong olsem wan samting we i naes mo givim glad.
Hem we i raet i glad blong givim pikja ia
Long medel blong Tokio, Japan, mi luk wan samting we i naes tumas long garen long pak we i mekem mi sapraes tumas. Long saed blong wan rod we i go tru long pak, i gat wan wol we i stanap long ples ia we oli strapem wetem moa long twelef pot plan, wanwan long olgeta i gat wan bonsai tri. Wanwan tri i spesel mo naes tumas mo i gat oli gat wan saen we i soem hamas yia blong olgeta. Plante long olgeta oli gat ova long 100 yia.
Wan i gat 390 yia mo i gohed yet blong karem frut. Wan narawan i gat tru stamba we tufala i joen—wan i ded mo narawan i laef. Hem i wan tri we i gat 590 yia mo i wan bigfala sapraes.
Mi pikjarem long maen blong mi olsem wanem oli mas bin lukaot gud mo katem klinim wanwan bonsai tri ia wetem bigfala strong paoa long tingting mo glad. Mekemse, ol tri ia oli kam ol samting we oli gat bigfala valiu mo oli save pasem i godaon folem jeneresen i go long narafala jeneresen. Mi tingting long ol papa mo mama we oli stap givim long ol pikinini blong olgeta responsabiliti blong lukaot long famli bonsai tri wetem kea, protektem i stap sef aot long eni nogud samting mo kipim i stap gud blong ol fiuja jeneresen.
Ol smosmol tri ia [bonsai tri] long Tokio oli bin laef i stap yet truaot long ol rabis wo mo ol taem blong pis, truaot long ol taem blong bigfala win mo ren mo ol taem we weta i kwaet. Olgeta oli testifae abaot fasin blong stap fetful, oli olsem wan tradisen mo oli soem fasin blong stap givim kea mo lav.
Wan Naesfala Presen
Taem mi bin luk ol bonsai tri ia, mi bin gat intres wetem tingting ia se, i gat plante famli insaed long Jos Ia blong Jisas Kraes blong Ol Lata-dei Sent we i stat wetem wan memba paeonia famli we i stap kasem wan naesfala testemoni blong gospel we i bin kambak.
Testemoni blong wanwan niufala memba blong Jos i stat taem oli “givim ples” blong trutok o planem toktok blong God insaed long hat blong olgeta mo afta, lukaot gud long hem (luk long Alma 32:28). Taem we testemoni i stap gro, ol aksen blong niu memba ia oli jenis mo kam gud i go folem wan defren wei blong laef.
Truaot long plante hadtaem mo strong win blong laef, wan testemoni abaot Jisas Kraes mo Jos Ia blong Hem we oli fidim gud, bae i gro i kam moa strong. Olsem wan bonsai tri, oli serem mo pasem i godaon wan testemoni olsem wan naesfala presen blong ol jeneresen blong oli gat sakses, mo tu blong mekem testemoni ia i gro mo fidim gud.
Wanwan jeneresen i gat bigfala responsabiliti blong mekem testemoni ia i kam blong olgetawan. Hem i wan presen we i no gat praes be i isi blong lus. Blong hem [testemoni] i save stap strong kasem en olsem wan samting we i naes mo givim glad, i nidim fasin blong yuwan blong stap fetful oltaem mo fet.
Yumi no save hamas tri ia we Lihae i bin luk long drim blong hem, i bigwan olsem wanem. Be yumi save nomo se i naes tumas mo we hem i no save wet blong serem ol frut blong hem wetem famli blong hem (luk long 1 Nifae 8). Famli blong Lihae oli kam wan klia eksampol blong wan famli we i stap gro i kam plante—samtaem i gat sakses long fasin blong stap pasem ol tradisen we oli stret mo gud mo samtaem, sore tumas blong stap luk se ol testemoni oli kam slak mo oli ded long taem blong hadtaem, fasin blong no stap obei mo ol tes blong laef.
Yumi glad long olgeta we olgeta we oli olsem o fas Lata-dei insaed long ol famli blong olgeta, oli lukaot mo fidim gud ol testemoni blong olgeta we i smol yet taem oli stap mekem mo kipim ol tabu kavenan blong olgeta. Mo yumi talem tangkyu long ol paeonia Sent ia long olsem wanem oli pasem lav blong olgeta long God i go long ol fiuja jeneresen.
Ol papa mo mama, ol tija, ol yut, ol yang adalt we oli stap putum ol miting blong Sandei i kam ol fas samting blong mekem, seves insaed long tempol, mo atendens long seminari, institiut mo ol konfrens blong ol yut mo ol yang adalt—blong stap putum Sevya i kam faswan long laef blong olgeta—oli stap givim ples blong graon long saed blong spirit mo stap lukaot mo fidim gud ol testemoni we oli smol yet blong oli develop.
Olsem ol bonsai tri we mi bin luk long Tokio, ol testemoni blong yumi abaot Jisas Kraes mo gospel blong Hem we i bin kambak, i wan samting we save gat be i no gat praes mo bae i blesem olgeta we yumi lavem. Oli save kam lekesi blong yumi olsem taem yumi kea gud, fidim mo serem olgeta long wan jeneresen i go long narafala jeneresen i go long narafala jeneresen.