Oltaem i gat hop

Taem oli singaotem mi mo waef blong mi blong go long misin long Tahiti, mitufala i neva pikjarem ol naesfala eksperiens we bae mitufala i kasem. Letem mi serem wan eksperiens we i soem hao Lod i wok long ol sikret wei. 

Moa long twenti-faef yia i pas, taem mi stap olsem Bisop blong Aix-en-Provence Wod mo stap wok blong ol Seminari mo Institiut, mi mitim Sophronia blong Tahiti we i kam blong stadi long Franis. Hem i wan yang adalt we i gat bigfala save long saed blong gospel, mo i groap insaed long Jos. Hemia i mekem se i luk defren taem hem i kam long ofis blong mi mo talem se bae hem i nomo atendem Jos. Mi ting se bae i blong smol taem nomo be, hem i mekem olsem we hem i bin talem, mo mi neva luk hem bakegen. Blong moa long twenti yia, Sophronia i laef long wan laef we i no folem gospel. 

Long 2024, taem mitufala i kasem misin blong mitufala long Tahiti, mitufala i hapi blong luk hem bakegen—mo mitufala i hapi moa blong harem se hem i kambak long Jos tu yia i pas. Hem i serem wanem we i mekem hem i bin kambak: 

“Mi wantem talemaot se truaot long taem ia we mi stap aot long Jos, mi kipim testemoni blong mi long gospel mo mi gat strong tingting se gel blong mi, Kahaili, bae i gro ap semmak olsem mi—long Jos Ia blong Jisas Kraes blong Ol Lata-dei Sent. Mi wantem hem i save se God i laef, Hem i lavem hem, mo i gat wan plan blong mekem hem mo famli blong hem i gobak stap wetem Hem sapos hem i kipim ol komanmen blong Hem. Be yet mi no wantem blong kambak long jos mi wan. ?I luk olsem mi go agensem toktok blong miwan? 

“Samtaem Kahaili i atendem ol miting wetem mama blong mi, be hemia bae i no save mekem hem i rere gud blong kasem baptaes. Long 2022, taem Kahaili i gat sikis yia haf, mi luksave se mitufala i gat wan yia haf nomo blong stap rere. Mi talem ‘mitufala’ from hemia i minim se bae mi mas tekpat moa long proses ia mi wan, mo no dipen long mama blong mi o long eni man. 

“Mi askem hem se, ?‘Kahaili, yu wantem kasem baptaes taem yu gat 8 yia?’ 

Hem i ansa stret se, ‘Yes, mama, mi wantem blong kasem baptaes!’ 

Strong tingting blong hem i mekem mi glad, mo long taem blong strong filing ia, mi faenem paoa blong mekem sakrifaes ia mo kambak long jos. 

“Mitufala i atendem fas Sandei ia mitufala nomo. Sam taem afta, hasban blong mi Cyril i joenem mitufala, mo i filim se ples blong hem i blong stap narasaed long mitufala. Taem Kahaili i talemaot se hem i wantem papa blong hem i baptaesem hem, mi talem wetem wan haf smael ‘Ale, askem papa blong yu, yu neva save!’—wetem tingting se bae i no save hapen. Papa blong hem i ansa se gel blong mi, ‘sapos mi save mekem, bae mi mekem.’” 

Afta, Lod i kam insaed long laef blong Cyril. Laef blong hem i jenis i kam long Kraes taem hem i ridim Ita 12:4: “Eni man we i biliv long God i save gat tru hop blong kasem wan wol we i moa gud, yes, mo tu kasem wan ples long raet han blong God, we hop ia i kam tru long fet, i mekem wan angka long ol sol blong ol man, we bae i mekem olgeta i strong mo oli no muvmuv, oltaem oli mekem ol gudfala wok, mo i lidim olgeta blong leftemap nem blong God.” 

Skripja ia we i tokbaot hop olsem wan angka, i go wetem eksperiens blong Cyril taem hem i tingbaot wan taem we kolosap hem i draon long Tuamotu lagun sam yia i pas. Taem hem i stap fising, bot blong hem i flot i go longwe from angka blong hem i kamaot. Nomata hamas hem i traem blong swim mo kasem bot, hem i taed. Olsem wan merikel, angka blong bot i stak long sam korel, mo i holem taet bot mekem se hem i save kasem. Kasem tedei, Cyril i gohed blong tokbaot hemia olsem wan merikel we i sevem laef blong hem. 

Olsem se hem i bon bakegen, Cyril i kasem baptaes long namba 28 Maj, 2024—taem hem i gat 50 yia. Wan manis afta, hem i baptaesem Kahaili. Bigfala dei blong olgeta i hapen long namba 12 Epril 2025, taem Sophronia, Cyril, mo Kahalili oli sil insaed long Papete Tempol. Mitufala i bin gat spesel janis blong atendem tabu seremoni ia. 

Mi serem stori ia blong testifae se oltaem i gat hop taem ol famli memba i go longwe long Jos. Nomata sapos i tekem longtaem, tru long fet long Jisas Kraes, wan merikel i save hapen oltaem.