God I Stap long Stia

Long nambatu Febwari long yia ia, mi mo Sista Meurs, mitufala i bin visitim Warrnambool long Australia, blong krietem Warrnambool Branj aot long Geelong wod grup. Hem i bin wan dei blong glad blong gobak long ples we mi bon long hem mo luk branj we mi bin atendem olsem wan smol boe we oli krietem bakegen. 

Tu wik afta, mitufala i toktok long ol misinari long Pasifik Eria MTC long Auckland. Mitufala i laekem blong mitim ol niufala misinari mo filim glad mo fet blong olgeta taem oli statem tabu seves blong olgeta. Hem i bin wan spesel janis from apu boe blong mitufala, Harrison Snow i bin kasem misin kol blong hem blong go long Melbourne Mission long Australia—mo hem i bin wan long ol misinari ia. 

Mitufala i glad moa from Elda Snow i kasem asaenmen blong go long Warrnambool olsem fas eria blong hem. Mi disaed blong raet i go long hem mo tokbaot olsem wanem famli blong mifala i joenem Jos long ples ia. Hemia i wan smol pat blong wanem mi serem: 

Bigfala bubu man blong yu, Frederick Michael Wilhelm Meurs, i bon long Holland long 1926. Hem i wan long ol twelef pikinini. Mama blong hem i bin wan strong Katolik mo i tekem ol pikinini blong hem i go long jos evri Sandei. Fred i atendem ol Katolik skul mo i bildimap bigwan fet blong hem long Jisas Kraes mo i kam blong lavem ol skripja plante. 

Bigfala bubu woman blong yu, Lois Ellen Meurs, i bon tu long 1926 long Warrnambool. Hem i gat tu brata, Ralph mo David, mo hom we hem i groap long hem, hem i wan fetful metodis hom. Hem i laekem ol wok blong seves we papa mo mama blong hem i stap mekem mo hem i bildimap wan strong Kristin fet. 

Fred mo Lois, tufala i mared long Warrnambool long Jenuware 1954. Julie i bon samtaem afta long semmak yia, mo Peter (mi) long Disemba 1956. 

Long ol eli yia blong mared laef blong tufala, Fred mo Lois i wantem kam wan long fet blong tufala. Tufala i atendem Katolik mo Metodis jos mo stadi long Niu Testeman tugeta. Taem tufala i stap rid, tufala i raetemdaon plante kwestin—abaot Godhed, Laef bakegen long ded, prishud atoriti, strakja blong Jos, mo baptaes andanit long wota. 

Tufala i lukaotem ol ansa long ol lokol lida blong jos, be plante oli talem se ol tingting ia oli ol “sikret” o oli faenem i had blong ansa. Wokbaot blong tufala blong faenem trutok i lidim tufala blong visitim sam Kristin jos long Warrnambool. From se tufala i no kasem ol stret ansa, tufala i tanem tufala i go long God long prea, mo askem Hem blong givim ol ansa. 

Long taem ia, Presiden Thomas S. Bingham i bin sendem Elda Jones (blong Yuta) mo Elda Erickson (blong Kanada) blong openem misinari wok long Wonambol. Ol lokol minista i wonem ol pipol long vilej blong no toktok wetem tufala, mo oli talem se bae tufala i “tanem tingting blong ol pikinini blong yufala.” 

Elda Jones mo Elda Erickson, tufala i fetful blong noknok long ol doa blong tri manis nomata se ol man i no akseptem tufala nating. Tufala i lusum hop mo harem nogud bigwan. Fet blong tufala i stap muvmuv. Tufala i raet i go long Presiden Bingham mo askem blong hem i transferem tufala aot long Warrnambool. 

Mo afta, tufala i kasem wan leta i kam long Presiden Bingham. Afta long plante tingting mo prea, hem i raetem se hem i gat wan strong filing se i gat sam pipol long Warrnambool we oli rere blong kasem Jos we i kambak. Hem i leftemap tingting blong tufala blong gobak long wok mo visitim ol ples we tufala i no bin visitim fastaem. 

Tufala elda i kasem leta ia samples long semmak taem we Fred mo Lois i stap prea blong kasem ol ansa. Sam dei i pas, tufala i noknok long doa blong famli Meurs long 68 Jamieson Street, Warrnambool. Lois i openem doa, mo tufala elda i talem se tufala i gat wan spesel mesej blong serem abaot Jisas Kraes mo Jos blong Hem. 

Lois i talem se, “Mitufala i stap prea from yutufala blong kam—be bae yutufala i no save kam insaed naoia. Ol pikinini blong mitufala (Julie we i gat tu yia mo Peter we i gat sikis manis) oli gat ol soa long bodi, mo bae oli save pasem long yutufala.” Hem i askem tufala blong kambak afta long wan wik. 

Lois i talem long Fred abaot visit ia, mo tufala i gohed blong prea se bae ol misinari oli no fogetem blong kambak. Tufala i no save huia tufala i stap wok wetem. 

Elda Jones mo Elda Erickson, tufala i bin kambak wan wik afta mo tufala i stat blong tijim Lois mo Fred. Taem oli stap tij, oli ansarem evri kwestin we i stap long longfala lis blong Fred mo Lois. Tufala i eksplenem huia God, prishud atoriti, Laef Bakegen long Ded mo laef afta long ded, stamba tingting blong laef, fasin blong bildimap fet, mo ol odinens blong baptaes mo sakramen. 

Fred mo Lois i openem ol skripja blong tufala—we tufala i makem folem ol stadi blong tufala—mo faenem pruf blong evri samting we ol misinari i stap tijim. 

Sam yia i pas, taem oli singaotem mi olsem Eria Seventi, mi bin toktok wetem Elda Bruce Jones abaot eksperiens ia. Hem i talem long mi se taem blong tufala long Warrnambool, kasem taem we tufala i mitim papa mo mama blong mi, i bin wan bigfala jalenj blong fet blong hem. Be taem oli tijim Fred mo Lois, afta tufala i ansa wetem ol pruf blong ol skripja insaed long Niu Testeman, hemia i mekem fet blong hem i strong bakegen mo i jenisim laef blong hem. 

Lois mo Fred i kasem baptaes mo konfemesen long Julae namba 5 1957—tri wik nomo afta we tufala i mitim ol misinari. Sam taem afta, ol narafala famli oli joenem Jos, mo niufala branj ia i stat blong holem ol miting long haos blong ol famli Meurs long Jamieson Street. 

Yumi evriwan i save folembak fet blong yumi i go long wan stori blong jenis i kam long Kraes—maet hem i stori blong yumiwan o blong wan famli memba we i akseptem gospel blong Jisas Kraes we i bin kambak. Hemia i rimaenem mi long ol toktok ia blong fas japta blong Prijim Gospel blong Mi: 

“I gat ol pipol we i stap raon long yu . . . oli stap lukaotem wan stamba tingting long laef. . . . Oli wantem ‘pis long wol ia, mo laef we i no save finis long wol we bae i kam’” (Doktrin mo Ol Kavenan 59:23). 

“Plante oli no save trutok from nomo oli no bin save weaples blong faenem trutok” (Doktrin mo Ol Kavenan 123:12). 

Tedei, yumi save se blong invaetem ol fren nomo blong kam long jos wetem yumi i save givim olgeta wan nambawan eksperiens. Bae oli lanem moa abaot Jisas Kraes, faenem ol ansa long ol kwestin blong olgeta, mo filim welkam tru long ol memba olsem yu. Bae oli filim wan spesel spirit taem oli stap tekpat long sakramen. Plante bae oli wantem blong lanem moa—mo bae oli stat blong wokbaot long kavenan rod ia tru long fasin blong kasem baptaes. 

Bae mi oltaem talem tangkyu from Elda Jones mo Elda Erickson—mo from glad we papa mo mama blong mi i filim taem tufala i save abaot Niu Testeman Jos, we hem i Jos Ia blong Jisas Kraes blong Ol Lata-dei Sent.