Paoa blong Tempol Seves we i Jenisim man

Mi bin mitim Paul Coward blong fastaem long Sidni long yia 2000 taem mi mo famli blong mi i muvaot long Perth long saed blong wok. Long taem ia, Paul i stap givim seves olsem Sydney Australia Greenwich Stek Presiden mo long semmak taem hem i wok olsem Daerekta blong Wok blong laef long Pasifik Eria. I no wan yia yet, oli bin singaotem mi i kam olsem wan kaonsela long niufala bisoprik, mo hemia i mekem mi save hem moa. Ol yia i pas mo mi kam blong laekem lidasip blong hem mo tu strong tingting blong hem long saed blong tempol seves.

Paul i finis wok long 2020 mo naoia hem i stap givim seves long Hamilton Niu Zealand Tempol we i jes open, wetem waef blong hem, Julie. Taem hem i stap luklukbak long ol eksperiens blong hem olsem wan bisop, stek presiden, misin presiden, Eria Seventi, mo Daerekta blong ol Wok blong laef, hem i glad from ol bigfala save long saed blong spirit, we hem i bin kasem. Ol koling ia i mekem hemwan i kam moa strong, be Paul i kasem moa insperesen tru long ol sakrifaes blong ol fetful memba we oli bildimap kingdom blong God long wol tru long tempol wosip.

Be i gat wan spesel eksperiens we i bin givim wan filing we i stap wetem hem blong longtaem. Taem hem i stap givim seves olsem wan Eria Seventi, Paul i stap hariap blong go insaed long tempol mo i luk wan man we i moa olfala long hem i stap kam aotsaed sloslo. Ae blong hem i stap long olfala patron ia, mo long taem ia, spirit i wispa long hem se, “Hem i wan tabu man.” Paul i neva mitim hem bifo, mo man ia i no luk olsem wan we i impoten. Be yet, Paoa blong Spirit i talem se hem i tabu. Long taem ia Paul i lanem se taem yumi go insaed long haos blong Lod, wan smol pis blong holines blong Hem i stap wetem yumi, mo yumi tekem wetem yumi i gobak long ol hom blong yumi.

 Waef blong Paul, Julie, i bin helpem hem tu blong luk tempol seves long wan wei.we i moa dip. Wok blong hem olsem wan Eria Seventi i mekem hem i mas atendem plante stek konfrens, mo taem hem i kambak hom, Julie bae i oltaem askem, “Konfrens i olsem wanem?” Bae hem i ansa se, “I gud.”

Taem hem i askem, “Ol toktok blong yu i olsem wanem?” bae hem i talem se, “Mi ting se i go gud.” Julie, we i gat plante andastaning, bae i talem wetem strong tingting se, “Mi sua se i go gud, be i no wan bigfala hadwok blong givim wan gudfala toktok long fored.” Wetem sapraes, Paul i lisin taem hem i stap gohed se: “Stret wok i tekem-ples taem ol hat i filim spirit, mo wok blong Lod i komplit long ol hom blong ol memba mo insaed long haos blong Lod.”

Paul i agri fulwan. Sapos yumi wantem filim ol han blong Sevya we i protektem yumi, yumi nid blong stap insaed long tempol. Sapos yumi wantem paoa we bae i sevem mo mekem yumi kam stret evriwan, blong stanap strong agensem ol tingting blong wol ia, blong tijim mo leftemap olgeta we yumi lavem, mo blong letem Lod i faet long bihaf blong yumi, yumi nid blong stap insaed long tempol.

I tru se ol tempol patron—ol “tabu” brata mo sista ia—wetem ol fetful wokman we oli stap givim seves insaed long kingdom blong Lod i tru oli ol sol blong wol. Oli ol sol we oli jenis i kam long God, oli stanap strong mo no muvmuv. Oli tekem ol kavenan blong olgeta i series, oli laef long ol laef we i fulap long fasin blong stap obei mo sakrifaes. Paul i bin lanem tru long eksperiens blong hemwan se hemia i ki blong gohed blong jenis i kam long Jisas Kraes mo gospel blong Hem.

Stret fasin blong jenis i no komplit nomo tru long wanem we i stap aotsaed be tru long fet we i kwaet mo i no muvmuv. Ol doktrin we i nid, ol odinens, mo ol kavenan oli holemtaet yumi long gospel. Wosip long tempol oltaem i mekem yumi kam klin mo strong olsem ol disaepol long ol wei we i defren olgeta.

Paul i talem bigfala tangkyu from ol testemoni mo tabu seves blong ol tempol woka mo patron. Fet blong olgeta i testifae se bigfala gro long saed blong spirit i no hapen long ol bigfala wei, be long tabu mo kwaet wok blong tempol. From se hem i insaed long tempol, long Haos blong Lod, we yumi faenem tru holines.