Lapokon nga “Sensilyo” Nagtabang sa Pamilya nga Magpabilin Diha sa Dalan sa Pakigsaad

Niadtong 2015, ang usa ka tres anyos nga si Arwen Villapando gikan sa Siyudad sa Quezon miadto sa tindahan sa kasilinganan aron mopalit. Samtang naghulat nga atimanon, nagbarog siya sa lapokon nga agianan ug nakamatikod og dako nga sensilyo nga natabonan sa migahi nga lapok. Naghunahuna nga kini kwarta, gidala niya kini sa balay.

Ang iyang amahan nga si Ireneo bag-o lang nabunyagan nga miyembro sa Ang Simbahan ni Jesukristo sa mga Santos sa Ulahing mga Adlaw ug ang iyang inahah nga si Maribel gitudloan sa mga misyonaryo. Nakuryoso sila bahin sa lapokon nga sensilyo nga gidala sa ilang kinamanghoran nga anak nga babaye sa balay maong gilimpyohan nila kini. Milungtad og mga adlaw sa paglimpyo niini, ug migamit gani sila og steel brush. Samtang gikiskis nila ang lapok, ang mga pulong nga “Aaronic nga Pagkapari” nakita ug sa wala madugay ang mga imahe sa templo ug tulo ka personahe nakita. Ang sinati nga kinulit nakaaghat nila sa paglimpyo sa medalyon ug tipigan kini nga usa ka handomanan. Wala gayod nila isulti ni bisan kinsa ang mahitungod niini hangtod sa Septiyembre 2017 atol sa Family Discovery Day sa Stake.

Usa ka booth nga giduol sa inahan ni Arwen adunay gamay nga kahon diin usa ka pamilyar nga sensilyo ang gipakita. Natingala siya nga nakakita nga kini susama sa ilang sensilyo! Sa pagpangutana, iyang nahibaloan nga kini usa ka medalyon nga iganti ngadto sa batan-ong lalaki kinsa malamposong makahuman sa programa sa Katungdanan ngadto sa Dios.

Ang pamilya Villapando sa kataposan mipakigbahin sa istorya kon giunsa nila sa pagkakita sa medalyon. Ang mga miyembro gusto nga motabang nila sa pagpangita sa tag- iya sa medalyon apan sila walay mga giya. Alang sa pamilya, ang medalyon mao ang usa ka pahinumdom gikan sa Langitnong Amahan alang nila nga magpabilin nga matinud-anon ngadto sa mga pakigsaad nga ilang gihimo isip mga miyembro sa Simbahan.

Si Arwen nabunyagan atol sa pandemya. Nagtubo siya nga suod sa iyang duha ka igsoong babaye nga sila si Marian ug Myaka, bisan og si Myaka wala pa moapil sa Simbahan. Si Marian aduna nay tulo ka anak nga babaye sa iyang kaugalingon, si Franz (8), nga nabunyagan karong bag-o, si Reign (5), ug si Angela, (3).

Paglabay sa katuigan, ang medalyon nahimong usa ka tigpahinumdom ngadto ni Brother Ireneo sa pagpalambo sa iyang pagkapari ug paggiya sa iyang pamilya sa pagsunod sa ebanghelyo. Ngadto ni Sister Maribel, usa kini ka leksiyon nga ang materyal nga bahandi o kwarta dili ang labing importante nga butang sa kalibotan. Kini mao ang pagbaton og malipayon ug himsog nga pamilya ug pagpabilin nga nagkahiusa sa pagserbisyo sa Ginoo. Ngadto ni Arwen, ang medalyon nagtudlo kaniya nga siya usa ka anak sa Dios, ug nga ang iyang potensyal alang sa mahangtorong paglambo walay kinutoban.

Hangtod niining adlaw, ang pamilya Villapando mihimo sa medalyon isip usa ka pahinumdom nga sila mihimo sa eksakto nga desisyon sa dihang sila miapil sa Simbahan, ug buhaton nila ang tanan nga magpabilin diha sa dalan sa pakigsaad.