Gikan sa YA Matag Semana
Ang Dihadiha Nakong Pagkaamgo mahitungod sa Pagkadisipulo ngadto sa usa ka Pamilya Nga Dili Aktibo sa Simbahan
Ang pagkahimong disipulo ni Jesukristo mas mahitungod kini sa paghigugma sa uban kay sa mosulay sa pag-usab kanila.
Sa akong pagdako, ang relasyon sa akong pamilya malisod. Dihang mibiya ko para sa akong misyon, ang akong mama ug ako ra ang aktibo sa Simbahan.
Dihang nahuman ang akong misyon, mibati ko nga responsibilidad nako ang pagtabang sa akong papa ug sa duha ka igsoong babaye aron mabalik ang ilang pagtuo. Nagtuo ko nga pareparehas ra kini sa pagtudlo sa mga estranghero nga ikatagbo nako sa akong giagian sa misyonaryo pa ko.
Mas labaw pa gayod, nanghinaot ko nga motabang sa akong pamilya aron mobati sa kalipay nga akong gibati sa pagsunod sa ebanghelyo. Ug labaw sa tanan, nanghinaot ko nga sa kataposan maselyo kaming pamilya sa templo, butang nga akong gipangandoy sukad sa gamay pa ko.
Apan hinoon, ang mga relasyon sa akong pamilya malisod. Ang panagbingkil mipuno sa among panimalay samtang ang akong mga gilaoman nagpabiling wala makab-ot ug ang mga pagkompara nga akong gihimo sa ubang mga pamilya misugnod og mga pagbati nga sad-an. Nakasinati ko og hilabihan nga mga pagbati sa pagkakulang, ug ang mga higala ug mga sakop sa pamilya dali ra kaayong makakita sa akong mga sayop isip nauli nang misyonaryo.
Dili nako makita sa unsang paagi ang akong matinud-anong pagserbisyo duna bay natabang sa akong pamilya. Duna ba koy nabuhat nga sayop?
Kristohanong gugma
Human sa taudtaod nga pakigbugno niini nga problema, duna koy naamgohan mahitungod sa pagkadisipulo. Akong naamgohan nga ang ebanghelyo mas labaw pa kay pagpasimba sa mga tawo; mahitungod kini sa paglig-on sa mga relasyon ug pagpakita og sama kang Kristo nga paghigugma. Kini nga pag-usab sa panglantaw wala magpasabot nga ningsurender na ko—kondili, akong gipili ang pagtutok sa paghigugma.
Si Sister Tamara W. Runia, Unang Magtatambag sa Kinatibuk-ang Kapangulohan sa Young Women, miingon, “Samtang ang atong mga pamilya dili hingpit, kita mahimong mohingpit sa atong gugma alang sa uban hangtod nga kini mahimong makanunayon, dili mausab, bisan unsa pa nga matang sa gugma—ang matang sa gugma nga nagsuporta sa kausaban ug nagtugot sa pagtubo ug sa pagbalik.”
Nasayod ko nga may pipila ka butang nga kinahanglang usbon. Imbis maningkamot sa paghimo sa akong pamilya nga mosunod sa ebanghelyo, gitutokan nako ang paghigugma ug paglig-on sa akong relasyon ngadto kanila. Mihukom ko nga higugmaon sila dili tungod sa ilang gibuhat o wala buhata apan tungod kay gusto lang ko nga mopakita og gugmang putli alang niadtong akong labaw nga gihigugma dinhi sa kalibotan.
Mga Pangutana nga Wala Matubag
Bisan pa niining pag-usab sa gitakda sa hunahuna, duna akoy daghang wala matubag nga mga pangutana mahitungod kon sa unsay dagway sa kahangtoran alang sa akong pamilya. Usa ako ka tigplano, ug makahadlok nga bation ang pagkadili mahibalo unsay dangatan sa umaabot.
Usa ka butang nga nagdala kanako og kahupayan mao ang akong pagpamatuod sa plano sa kaluwasan. Bisan og dili nako makita ang umaabot, ang Dios—nga hingpit ang kamaalamon, mapinanggaon, ug manggiluy-on—makakita sa umaabot. Bisan og padayon kong dunay mga pangutana mahitungod sa kaeksakto kon sa unsang paagi mahimo ang tanan, nasayod ako nga ang mga butang mahitabo gayod.
Si Elder Dale G. Renlund sa Korum sa Napulog Duha ka Apostoles mitambag, “Kita pweding mopugong lang una sa atong mga pangutana bahin sa kon unsaon kaha ug kanus-a kaha ug magtutok sa pagpalambo sa hugot nga pagtuo diha kang Jesukristo, nga Siya adunay gahom sa paghimong husto sa tanang butang ug maghandom sa paghimo sa ingon.” Dili nako mahulagway ang kahupayan nga naggikan sa pagtugyan nako sa akong tanan nga kawalay kaseguroan ug mga kasubo ngadto sa Manluluwas.
Nasayod ako nga “ang tanan nga dili makiangayon kabahin sa kinabuhi mahimong mapahusto pinaagi sa Pag-ula ni Jesukristo.” Nagatuo ako nga hingpit ang plano sa Dios, ug tungod kay kita Iyang mga anak, gusto Siya nga kita magmalipayon. Walay naghatag kanako og mas dakong kalipay ug seguridad kay sa pagsunod sa ebanghelyo ni Jesukristo.
Ug walay naghimo kanako nga mapuno ang akong kasingkasing og dugang tinuod nga gugma alang sa akong pamilya ug mga higala kay sa pagsunod Kaniya.