Makita Ba Namo Pag-usab ang Among Apo?

Paghulagway pinaagi ni David Malan/Malan Creative

Niadtong 1999 namatay ang among kamagulangang anak nga lalaki. Nahibilin kaniya ang iyang asawa ug usa ka tuig nga anak nga babaye kang kinsa kami adunay makalingaw nga relasyon ug maanindot nga sinemana nga mga pakigkauban.

Tungod sa makasubo nga panghitabo, ang ikatulong tuig nga adlawng natawhan sa among apo nga babaye mao ang kataposang higayon nga kami naka-istorya kaniya. Sulod sa daghang katuigan, nag-ampo mi, nagpuasa, ug nanghinaot nga ugma damlag makita namo siya og usab.

Atol sa Oktubre 2018 nga kinatibuk-ang komperensiya, si Presidente Russell M. Nelson mihatag og imbitasyon nga adunay saad: “Giawhag ko kamo sa pagpangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon. Ako mosaad kaninyo nga ang Ginoo mohatag og mga milagro nga Siya nasayod nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”

Dihang nadungog ko kini nga mga pulong, akong gibati nga ang Langitnong Amahan namulong ngari nako pinaagi sa Iyang propeta. Mao nga, ang akong bana ug ako mipasalig nga magsugod og tambong sa templo matag Martes ug tumanon kana nga pasalig “nga hingpit ug malipayon.”

Usa ka adlaw niadtong 2019, ang kaniadto among 21-anyos nga apo nga babaye wala damhang nagmensahe kanako sa online. Ang iyang komunikasyon adtong una inanayng miabot, apan dihang nagpadayon ang iyang mensahe, nagsugod siya sa pagpangutana nga maoy nag-abli og usa ka makatingalang linya sa pag-istoryahanay. Anam-anam niya kaming gitugotan ngadto iyang kinabuhi sa hinay-hinay ug dayon sa kanunay.

Niadtong 2021 gidapit namo siya sa pagsaulog sa Adlaw sa Pagpasalamat uban sa among pamilya. Gidawat niya kini, ug duna kami maanindot nga panahon nga magkaila-ila. Dali ra niyang nasuod ang iyang mga iyaan, mga uyoan, mga pag-umangkong babaye ug pag-umangkong mga lalaki. Gusto niya nga ang iyang pagbisita atol sa Adlaw sa Pagpasalamat mahimo nga usa ka tradisyon.

Paglabay sa usa ka tuig, ang nipalayo namong anak nga lalaki nikonektar kanamo pag-usab. Niadtong Marso 2024, sa unang higayon sa kinabuhi sa among pamilya, aduna kami reunion sa pamilya nga naglakip sa tanang buhi nga anak, ilang mga asawa, ug tanan nga 16 ka mga apo.

Sa kanunay mituo ako nga ang propeta mamulong alang sa Ginoo. Nagatuo ako nga kining gikinahanglan kaayong milagro nahitabo tungod sa gipadayag nga giya ug saad sa Propeta nga si Presidente Nelson.

Ang akong pagpamatuod ug gugma sa Langitnong Amahan ug sa Iyang Anak, dili, ug wala magsalig niini nga milagro. Nahingangha lang ako, bisan pa, kon unsa ka-personal ang Ilang gugma alang nako ug unsa kagamhanan sa Ilang mga saad nga gikan sa propeta.