“Pangitaa ang Hingpit nga Kalipay sa Inyong Panaw sa Ebanghelyo,” Liahona, Hulyo 2025.
Pangitaa ang Hingpit nga Kalipay sa Inyong Panaw sa Ebanghelyo
Ang labing dakong resulta sa atong pagpakita og gugma sa Ginoo pinaagi sa pagsunod sa Iyang mga sugo mao ang mga panalangin nga nagdala og kamaya ug hingpit nga kalipay.
Litrato sa malipayon nga mga miyembro sa Simbahan sa Thailand pinaagi ni Christina Smith
Samtang nagserbisyo isip lider sa misyon sa Japan pipila ka tuig ang milabay, mitambong ko og komperensiya sa siyudad sa layong bahin sa among misyon. Ang presidente sa district nakigsabot nako nga mopahigayon og interbiyo sa usa ka lalaki nga nagpasakop sa Simbahan sa milabayng tuig ug nagtinguha nga makadawat og rekomend sa templo. Nanghinaot siya nga makadawat sa iyang kaugalingong pagtuga inig-abot o inig hapit na moabot ang iyang pag-usa ka tuig sa iyang bunyag.
Atol sa among panagsultihanay, kining bag-ong miyembro mihulagway kon unsa kadako ang iyang pasalamat sa daghang panalangin nga iyang nadawat sa tuig sukad siya nabunyagan. Nalipay siya sa pagtambong sa sinemana nga panagtigom alang sa sakramento ug sa ubang mga miting. Kanunay siya nga moapil sa mga kalihokan sa iyang branch. Alang nako, nagpakita siya og kamasaligon sa pakigsaad gumikan sa pagsabot sa iyang katuyoan sa ebanghelyo, nga karon nahimo nang usa ka mahinungdanong bahin niya. Siya usa ka kinabig nga disipulo ni Kristo nga nakasinati og dakong kausaban sa kasingkasing (tan-awa sa Mosiah 5:2).
Ang uban pa sa among panagsultihanay nagpakita gihapon sa pagkamalaumon. Naghisgot kami sa mga ordinansa ug sa mga pakigsaad nga mahimong kabahin sa iyang kasinatian sa templo. Mauyonon siya nga mitubag sa matag sumbanan nga mga pangutana nga nag-uban sa pagdawat og rekomend sa templo.
Human sa interbiyo, nakahinumdom ko nga misulti ko sa presidente sa district kon unsa ko ka mapasalamaton nga nakahimamat og ingon ka talagsaon nga tawo. Giingnan nako siya unsa ka dako ang akong pagdayeg nga ang mga misyonaryo ug mga miyembro nakakaplag, ug espirituhanong miamuma, sa usa ka tawo nga ingon niana kanindot ug kamadasigon.
Nahingangha ko sa dihang ang presidente sa district mipakigbahin nga sa dihang kini nga lalaki misugod sa pagdawat sa mga leksiyon gikan sa mga misyonaryo ug nagtambong sa simbahan sa miaging sobra sa usa ka tuig, siya walay panimalay ug hilabihan nga naglisod—murag wala nay paglaom—nga kahimtang. Dayon ang presidente sa district mihulagway kon sa unsang paagi nga ang pagtuon sa ebanghelyo niini nga brother ug ang iyang pagkakabig sulod sa pipila ka bulan miresulta sa iyang milagroso nga kausaban, nakapahimutang niya sa dalan sa espirituwal ug temporal nga pagbarog pinaagi sa kinaugalingong paningkamot ug naghatag niya og pagbati nga dunay katuyoan ug hingpit nga kalipay.
Ang ebanghelyo ang naghatag niya og tinuoray nga kahulogan sa katuyoan sa iyang kinabuhi. Ang yano ug bililhong mga kamatuoran sa ebanghelyo nagdala og mga tubag sa importante nga mga pangutana sa mortalidad, nagsugod sa usa ka kahibalo nga “Ang Dios mao ang atong Langitnong Amahan, ug kita ang Iyang mga anak. … Ang Dios personal nga nakaila kanato ug nahigugma kanato.” Sa Iyang plano, “Ang Langitnong Amahan … naghatag og daghang gasa ug mga giya sa pagtabang kanato nga makabalik ngadto sa Iyang presensya.”
Mao kana ang mga panalangin alang niini nga tawo, nga mahimo usab nga maangkon sa tanang anak sa Dios pinaagi sa ebanghelyo ni Jesukristo.
Ang Katuyoan sa Kinabuhi
Tungod kay gipahiuli ni Jesukristo ang ebanghelyo pinaagi ni Propeta Joseph Smith, “kita nakasabot bahin sa katuyoan sa kinabuhi, kon kinsa kita,” namahayag si Presidente M. Russell Ballard (1928–2023). Sa iyang kataposang pagpamatuod sa Simbahan, si Presidente Ballard, kanhi Akting nga Presidente sa Korum sa Napulog Duha ka Apostoles, miingon:
“Kita nakaila kon kinsa ang Dios; kita nakaila kon kinsa ang Manluluwas, tungod kay kita adunay Joseph, kinsa miadto sa kakahoyan isip usa ka batang lalaki, nagtinguha og kapasayloan sa iyang mga sala. …
Ako nahingangha, ug segurado ako nga daghan kaninyo ang nahingangha usab, kon unsa kita ka bulahan nga mahibalo sa unsay atong nahibaloan bahin sa katuyoan sa atong kinabuhi, kon nganong ania kita dinhi, unsa ang atong paningkamotan nga buhaton ug tumanon sa atong inadlaw nga mga kinabuhi.”
Alang sa mga miyembro sa Ang Simbahan ni Jesukristo sa mga Santos sa Ulahing mga Adlaw, kana nga kahibalo naglakip sa pagsabot sa “hingpit nga plano” sa Dios alang sa kaluwasan. Nailhan usab isip “ang mahinungdanong plano sa kalipay,” “ang plano sa katubsanan,” ug “ang plano sa kaluoy” (Alma 42:8, 11, 15), kini “mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot.” Mahinungdanon niana nga plano “ang doktrina ni Kristo,” nga mao ang sentro sa katuyoan sa kinabuhi.
Tungod kay anaa kanato ang ebanghelyo, kita nasayod nga kita mga anak sa Dios, gipadala dinhi sa yuta aron sulayan, hashasan, ug maandam aron “pagabangonon pinaagi sa pagkabanhaw sa mga patay, pinaagi sa kadaogan ug himaya sa Kordero” (Doktrina ug mga Pakigsaad 76:39). Nahibalo kita sa mga sugo ug gitudloan sa “igo aron [kita] mahibalo sa maayo gikan sa daotan” (2 Nephi 2:5). Nahibalo kita nga ania kita sa yuta aron sa paghigugma ug pagserbisyo. Ug kita nahibalo nga ang Manluluwas nanawagan nato sa pagbuntog sa kalibotan ug sa pagtabang sa uban sa paghimo usab niini (tan-awa sa Juan 16:33; Doktrina ug mga Pakigsaad 64:2) agi og pagpangandam alang sa Iyang Ikaduhang Pag-anhi.
Kon kita motutok Kaniya, ang unsay gitawag ni Joseph Smith og “nag-awhag nga tunog sa Ebanghelyo sa atong Ginoo nga si Jesukristo” molig-on nato atol sa lisod nga mga panahon ug maghatag og kahulogan ug katuyoan sa atong kinabuhi ug sa kinabuhi sa uban.
Every Knee Shall Bow [Matag Tuhod Moluhod], ni Dan Wilson, dili mahimong pakopyahan
Pagkamasulundon, Mga Panalangin, Hingpit nga Kalipay
Ang Dios naghatag nato og matarong nga kabubut-on aron manubag kita sa atong mga pagpili (tan-awa sa Doktrina ug mga Pakigsaad 101:78; 2 Nephi 2:16). Isip kabahin sa “kaatbang sa tanang butang” (2 Nephi 2:11), si Satanas gitugotan sa pagtental nato aron gamiton sa sayop ang atong kabubut-on.
Apan si Ginoong Jesukristo, “nahibalo sa katalagman nga moabot sa mga lumulupyo sa yuta” sa atong panahon, mitawag ni Propeta Joseph Smith, “namulong ngadto kaniya gikan sa langit, ug mihatag kaniya og mga sugo” (Doktrina ug mga Pakigsaad 1:17). Kana nga sundanan diin ang Ginoo mopadayag sa Iyang mga sugo ug kabubut-on ngadto sa Iyang mga propeta nagpadayon sa atong panahon nganha ni Presidente Russell M. Nelson—ug alang sa sama nga rason. Nagtinguha ang Dios sa paggiya nato ngadto sa hingpit nga kalipay niini nga kinabuhi ug ngadto sa celestial nga himaya sa sunod nga kinabuhi.
Ang pagkamasulundon sa mga sugo sa Dios kinahanglang nagagikan sa atong debosyon ug gugma alang Kaniya. Si Ginoong Jesukristo mismo namahayag nga ang paghigugma sa Dios “mao ang una ug dakong sugo” (tan-awa sa Mateo 22:37–38). Mihatag Siya og dugang nga pagpasabot sa dihang namahayag Siya, “Kon nahigugma kamo kanako, tumana Ninyo ang akong mga sugo” (Juan 14:15).
Adunay ganti alang sa paghigugma sa Ginoo ug sa pagsunod sa Iyang mga sugo. Niini nga dispensasyon Siya mihulagway nga adunay “balaod, nga dili mausab nga gipahayag didto sa langit … , nga diha ang tanan nga mga panalangin gipasikad—
“Ug kon kita makadawat og bisan unsa nga panalangin gikan sa Dios, tungod kini sa pagsunod niana nga balaod diin kini gipasikad” (Doktrina ug mga Pakigsaad 130:20–21).
Sa ingon niana, ang labing dakong resulta sa atong pagpakita og gugma alang sa Ginoo pinaagi sa pagsunod sa Iyang mga sugo mao ang mga panalangin nga nagdala og kamaya ug hingpit nga kalipay.
Sa pagtan-aw sa kinabuhi gamit ang mga panglantaw sa gipahiuli nga ebanghelyo ug sa moderno nga pagpadayag maghatag nato og katin-awan. Pinaagi sa tin-aw nga panglantaw sa atong balaanong gigikanan ug padulngan, kita nasayod nga “ang mga butang gayod nga makapahimo sa [atong] mortal nga kinabuhi nga labing maayo nga kini mahimo mao gayod ang samang mga butang nga makapahimo sa [atong] kinabuhi hangtod sa kahangtoran nga labing maayo nga kini mahimo!”
Panapos
Akong taposon kon asa ko nagsugod, nahinumdom sa akong kasinatian sa milabayng katuigan sa usa ka bag-ong kinabig sa Japan. Pinaagi sa iyang kakugi ug sa kakugi sa mga misyonaryo ug mga miyembro, iyang nakaplagan ang gipahiuli nga ebanghelyo ni Jesukristo. Sa pagkaplag sa ebanghelyo, nadiskobrehan usab niya ang iyang katuyoan, nga nakapalapad sa iyang panglantaw. Nakaplagan usab niya ang mahinungdanong plano sa kalipay. Ang pagkamasulundon sa mga pakigsaad sa ebanghelyo diha sa plano nagdala niya og mga panalangin ug hingpit nga kalipay, nagpalambo niya sa temporal ug sa espirituwal nga paagi.
Ang iyang panaw nga misangpot ngadto sa pagkamiyembro sa Simbahan ni Jesukristo nagtugot niya nga mahimong usa ka saksi ni Jesukristo. Si Elder Patrick Kearon sa Korum sa Napulog Duha ka Apostoles mihulagway sa hingpit nga kalipay sama sa mosunod:
“Tungod sa mahigugmaong plano sa atong Langitnong Amahan alang sa matag usa sa Iyang mga anak, ug tungod sa matubsanon nga kinabuhi ug misyon sa atong Manluluwas, si Jesukristo, kita makahimo—ug kinahanglan—nga mahimong labing malipayon nga mga tawo sa yuta! Bisan og ang mga unos sa kinabuhi sa gubot nga kalibotan mohapak kanato, kita makaugmad og usa ka nagtubo ug nagapadayon nga pagbati sa hingpit nga kalipay ug kalinaw sa kahiladman tungod sa atong paglaom kang Kristo ug sa atong pagsabot sa atong kaugalingong dapit diha sa matahom nga plano sa kalipay.”
Ako mohalad sa akong pasalamat ug pagpamatuod sa gipahiuli nga ebanghelyo ni Jesukristo, lakip na sa mahinungdanong plano sa kalipay nga nahimong importante nga bahin niini. Dapiton ko kamo sa pagsinati sa mga bunga sa ebanghelyo ug sa pagbati pa og dugang nga kalipay niini nga kinabuhia sa inyong panaw paingon sa kinabuhing dayon.