“Konseho sa Managkompanyon: Pagmugna og Tinuyo nga Kalipay diha sa Kaminyoon,” Liahona, Hulyo 2025.
Konseho sa Managkompanyon: Pagmugna og Tinuyo nga Kalipay diha sa Kaminyoon
Ang mga managpares, sama sa mga misyonaryo, mahimong mogamit sa mga konseho sa managkompanyon aron mapalambo ang ilang relasyon.
Isip usa ka batan-ong estudyante sa kolehiyo nga nagtuon bahin sa kalinaw ug kasungian, nainteresado ko sa bisan unsa nga proseso nga mahimong gamiton sa pagsulbad sa kasungian. Ang usa ka makausab sa kinabuhi nga panagsultihanay ngadto sa usa ka higala mipailaila nako ngadto sa proseso nga wala pa gayod nako madungog sukad: konseho sa managkompanyon.
Samtang nagpakigbahin mahitungod sa iyang misyon, ang akong higala misulti nako nga kana nga konseho sa managkompanyon usa ka regular nga pagsusi diin ang managkompanyon nga misyonaryo maghisgot kon kumusta ang ilang panag-uban sa pagtrabaho ug kon unsaon sa pagpalambo. Nakita sa akong higala nga ang proseso makatabang kaayo isip misyonaryo nga siya nagplano nga gamiton kini sa iyang kaminyoon sa umaabot. Ang ideya midulot sa akong kasingkasing. Gibasa nako ang konseho sa managkompanyon diha sa Isangyaw ang Akong Ebanghelyo ug nakigsulti sa ubang mipauli na nga mga misyonaryo mahitungod sa ilang mga kasinatian niini. Nakita nako kon sa unsang paagi nga ang mga konseho sa managkompanyon, susama sa mga konseho sa pamilya, mahimong gamiton aron matubag ug malikayan ang makaguba nga mga kasungian nga atong giatubang sa atong mga relasyon karon.
Ang akong bana, si James, ug ako misugod sa pagpahigayon og sinemana nga mga konseho sa panakompanyon bisan wala pa kami magminyo. Nakahinumdom pa gihapon ko sa among unang miting. Si James bukas kaayo, mabination, masinabtanon, ug seryosong mitagad sa akong mga hunahuna nga sa ingon mibati ko nga masaligon sa among abilidad sa pagmugna og malipayong kaminyoon.
Karon sa duday-dugay na namong panag-uban sa kinabuhi, among gipadayon ang tradisyon sa sinemana nga konseho sa managkompanyon. Bisan kon ang among relasyon dili perpekto, kaming duha miuyon nga kadaghanan sa sesyon nga among gipahigayon nakatabang namo nga makaplagan ang mas lawom nga kalipay ug katumanan sa among kaminyoon kaysa among gihunahuna nga posible.
Pagtan-aw sa Panaglahi isip Oportunidad
Ang Dios milalang og usa ka kalibotan nga balik-balik Niyang gibahin-bahin ug gilahi-lahi, ug nakita nga “maayo ang iyang gibuhat” (Genesis 1:10, 12, 18, 21, 25). Kana nga matahom nga panaglahi usa ka impluwensya nga moresulta sa daghang kasinatian ug mga panglantaw taliwala sa mga anak sa Dios. Bisan kon makahahadlok pamation nga maghunahuna nga bisan ang mapasaligon nga mga kapikas sa kaminyoon mahimong adunay daghang lainlaing opinyon mahitungod sa importante nga mga hilisgotan, dili kita angay nga mahadlok. Uban sa Manluluwas isip atong ehemplo, makapili kita sa pag-atubang niini nga mga panaglahi pinaagi sa mahigugmaon, mamugnaon, ug madasigon nga mga paagi nga mosangpot ngadto sa mas kompleto nga mga solusyon ug mas malipayon nga mga relasyon.
Kon kita moatubang sa usag usa niining mas halangdon ug mas balaan nga paagi, atong masabtan nga dili na kinahanglan ang panagbingkil o taphaw nga pagdawat sa mga opinyon sa usag usa, nga ang pagsinabtanay dili managsama sa pagkaparehas. Pinaagi sa pagpraktis, ang panaglahi sa mga opinyon murag mahimo nang mga oportunidad sa pagpalig-on imbes mga babag. Ang panagbingkil mapulihan og pakigtambayayong, pagsalig, ug pagmahal.
Ang konseho sa managkompanyon, inubanan sa Kristohanon nga gugma, makatabang ninyo sa paghimo sa kasungian nga usa ka panalangin sa inyong kaugalingong relasyon. Ania ang upat ka sugyot aron matabangan kamo sa pagsugod.
Pagpahigayon og Inyong kaugalingong Konseho sa Managkompanyon
1. Mopasalig
Ikonsiderar ang pagsulbad nga manag-uban aron mapalambo ang inyong relasyon pinaagi sa pagpahigayon og regular nga konseho sa managkompanyon, bisan kon mosulay lang niini sulod sa mubong panahon. Ang proseso dili mosalir kon walay hingpit nga partisipasyon sa duha.
2. Paghimo og agenda
Ang inyong relasyon adunay talagsaon nga mga kalig-on, mga kakulangan, ug mga panginahanglan. Naghunahuna niana, pag-ila og mga hilisgotan nga sa pamati ninyo importante nga hisgotan sa inyong konseho sa managkompanyon, sama sa pakigsuod, mga estilo sa pagkaginikanan, pag-eskedyul, o mga panalapi.
Pinaagi sa paghatag niini nga mga hilisgotan og regular nga luna sa inyong agenda, naghatag kamo og higayon sa mga hunahuna ug mga pagbati nga mahimong mapagawas lamang sa panahon sa kasagmuyo o tingali dili na lang.
3. Mag-eskedyul og piho nga oras ug mangandam
Ikonsiderar ang paggahin og piho nga oras alang sa inyong konseho sa managkompanyon. Modesisyon unsay labing maayo alang ninyo ug dayon mopasalig nga motambong, mangandam sa pagpaminaw inubanan sa pagsabot, sinsero nga pagpakigbahin, ug kamabination. Mahimo usab kamo nga magtipig og sinulat nga rekord sa inyong konseho sa managkompanyon. Ang atong mubo nga mga sulat sa miaging semana makatabang nato samtang mangandam sa umaabot nga sesyon.
Ang pagsulat makatabang usab ninyo nga makahinumdom—sa mga pulong ni Presidente Spencer W. Kimball (1895–1985)—“sa inyong mga kadaogan ibabaw sa kalisdanan, sa inyong pagkaamgo human sa pagkasayop, sa inyong pag-uswag sa dihang ang tanan ingon og walay paglaom, sa inyong paglipay sa dihang sa kataposan kamo [milampos].” Si James ug ako mapasalamaton kaayo nga nagtipig kami og rekord sa dul-an sa 800 ka sesyon sa konseho sa managkompanyon nga among napahigayon sa mga katuigan. Makapalipay kaayo nga motan-aw og balik ug makita kon unsa na ka layo ang among naabtan!
4. Magmakanunayon
Ang konseho sa managkompanyon murag kiwaw o makahadlok sa sinugdanan, apan mas magkasayon kon padayong buhaton. Pinaagi sa pagsusi kanunay, mabantayan nimo ug sa imong kapikas ang ginagmay nga mga isyu sa dili pa kini mahimong dagkong mga problema.
Kataw-anan, usa sa labing sakit nga mga argumento nga nahitabo ni James ug nako atol sa konseho sa managkompanyon. Ang kasungian paspas ug wala damha nga migrabe nga miabot sa punto sa pagpangatarongan, ug kaming duha parehong nasakitan sa proseso. Apan kanang sakit nga kasungian nga nagsugod sa konseho sa managkompanyon nasulbad diha sa konseho sa managkompanyon. Kami nasayod nga aduna kami laing kahigayonan sa sunod semana ug sa sunod pa.
Busa human sa usa ka semana nga pagpamalandong ug pagpabugnaw, misulay na usab kami, ug kadugayan among nasagubang ang among mga panaglahi. Gibati gyod nako ang “personal nga kalinaw ug usa ka kusog nga espirituhanong paglambo” nga gisaad ngari nato sa higayon nga kita mosulbad sa mga kasungian sumala sa paagi sa Manluluwas. Matag kasungian nga atong sulbaron inubanan sa kamamugnaon ug gugma moduso nato sa unahan ug modapit og dugang nga impluwensya gikan sa Espiritu Santo sa atong mga relasyon.
Tingali adunay mga higayon nga bation ninyo nga murag walay kasungian sa inyong relasyon, mao nga matental kamo nga dili buhaton ang konseho sa managkompanyon. Ang akong bana ug ako nakadesisyon nga dili kana buhaton. Kana mao ang mga panahon nga ang konseho sa managkompanyon mahimong putli nga kalipay—diin maghisgot kami kon unsay nindot nga panghitabo, magkinataw-anay, magpakigbahin og lawom nga mga hunahuna, ug maghimo og mga handomanan.
Ang Saad
Ang Langitnong Amahan mihimo sa matag usa nato nga managlahi ug miorganisar nato ngadto sa mga relasyon. Siya naglaom nato nga sulbaron ang atong mga panaglahi, dili pinaagi sa panagbingkil (tan-awa sa 3 Nephi 11:29) apan pinaagi sa putli nga gugma ni Jesukristo, tungod kay nasayod Siya nga makapaduol kini kanato ug makapaduol ngadto Kaniya (tan-awa sa Mateo 5:9; Moroni 7:48).
Si Presidente Russell M. Nelson mihatag nato sa mosunod nga buluhaton uban sa usa ka saad: “Atong ipakita nga adunay malinawon, matinahuron nga paagi sa pagsulbad og komplikado nga mga isyu ug usa ka nabanwagan nga paagi sa pagsulbad og mga panagbangi. Samtang inyong ipakita ang gugma nga putli nga gipakita sa tinuod nga mga sumusunod ni Jesukristo, ang Ginoo mopalambo sa inyong mga paningkamot lapas sa inyong labing taas nga mahunahuna.”
Makapadayon kita sa unahan diha sa dalan sa pakigsaad, puno sa pagsalig niana nga kaseguroan gikan sa minahal nga propeta. Atong masulbad ang mga kasungian pinaagi sa kamamugnaon ug kamanggiluluy-on, “diin ang [atong] mga kasingkasing mabugkos sa panaghiusa ug sa gugma sa usag usa” (Mosiah 18:21).