“Pagpugas sa mga Tunog sa Musika” Liahona, Hulyo 2025.
Mga Tingog sa mga Santos sa Ulahing mga Adlaw
Pagpugas sa mga Tunog sa Musika
Tanan kita pwedeng makapangita og mga paagi nga ikapakigbahin ang hinatag sa Dios nga mga gasa ug mga talento, nagtabang kon asa man kita nagbarog.
Paghulagway pinaagi ni David Malan/Malan Creative
Kanunay kong gusto nga motugtog sa Orchestra sa Temple Square, ang orchestra sa Ang Simbahan ni Jesukristo sa mga Santos sa Ulahing mga Adlaw. Mopatugtog ko og clarinet ug dunay degree sa musika, apan walay kalagmitan nga maangkon ko kana nga oportunidad.
Human sa tanan, nagpuyo ko sa New Zealand.
Ang Espiritu Santo nagpahinumdom kanako, bisan pa, nga ako “makontento” (Alma 29:3) isip pioneer sa musika alang sa Simbahan sa New Zealand ug sa ubang mga dapit. Ang akong una nga calling sa edad nga 18 mao ang pagka-music leader sa nursery. Sukad niana, napanalanginan ko nga motudlo ug mopahigayon og stake ug ward nga musikal nga mga produksiyon, ingon man pagtukar sa piano sa Primary. Nakapakigbahin ko og musika sa tibuok New Zealand ug sa Pilipinas ug miduyog gamit ang piano alang sa musikal nga open house sa district sa Simbahan sa Shanghai, China. Nakakanta ko og duet sa Provo Missionary Training Center.
Ang musika maoy nagtabang kanakong magpabilin sa Simbahan sa tibuok panahon sa malisod nga pakigbatok sa kahingawa ug depresyon. Kon mobati ko nga walay koy bisan unsang mahimo, nasayod kong makatubag ko og oo aron motabang pinaagi sa musika. Ang musika nagtabang nako nga makakita sa kalibotan pinaagi sa espiritwal nakong mga mata.
Nakahimo ko og musika kauban sa akong asawa ug tulo ka anak. Magkauban kaming nagpasundayag sa ward, nakahimo og musikal nga kontribusyon sa broadcast alang sa mga misyonaryo sa Auckland New Zealand Mission, ug nakakanta alang sa online nga komperensiya sa stake. Nasayod ko kon sa unsang paagi ang pulong sa Dios, pinaagi sa mga himno sa Simbahan, nagdapit sa Espiritu Santo ug kon sa unsang paagi kini makatandog sa kasingkasing sa among mga pamilya ug mga ward.
Padayon ang akong pagkaganahan sa Orchestra sa Temple Square gikan sa layo, apan nasayod ko nga panalanginan kita kon magtinguha kita og mga oportunidad sa pagserbisyo ug sa pagdayeg sa Ginoo bisan asa kita ug sa bisan unsang paagi nga atong mahimo (tan-awa sa Salmo 150:6). Mapasalamaton ko nga kita makapakigbahin sa atong mga pagpamatuod pinaagi sa atong mga gasa ug mga talento, lakip sa musika. Mapanalanginan kita, ug makapanalangin kita sa uban, kon atong ipakigbahin kana nga mga gasa ug mga talento ngadto sa mga anak sa Dios ug “mangusog diha sa atong gibarogan.”