Pag-atiman: Usa ka Tibuok Kalibotan nga Inisyatiba sa Pagpalambo sa Kaayohan sa Kababayen-an ug Kabataan

Kabahin sa usa ka Importante nga Katuyoan

Sa dihang ako (Presidente Johnson) mibiyahe sa Costa Rica sa miaging tuig, aduna koy kahigayonan sa pagtabang sa kalihokan sa pagpanghatag og donasyon nga pagkaon. Natandog ko nga nakahimamat og daghang kababayen-an ug kabataan nga miadto aron modawat og makapahimsog nga pagkaon. Nindot ang akong gibati nga nagbuhat kami sama sa unsay gusto sa Manluluwas nga among buhaton. Nahimamat nako si Yumana ug ang iyang tulo ka matahom nga mga anak. Kining sinsero nga babaye namaligya og laso nga mga rosas nga iyang gihimo aron sa pagsangkap sa iyang pamilya. Mapasalamaton kaayo siya sa pagkaon alang sa iyang gigutom nga mga anak. Giingnan nako siya nga nahigugma ko siya ug, ilabi na, nga ang Dios nahigugma niya. Si Yumana nakadawat og temporal nga kahupayan ug espirituwal nga kahupayan ingon nga siya mibati ug nakabatyag sa gugma sa Dios.

Atong makita kining tibuok kalibotan nga inisyatiba isip kabahin sa buhat sa kaluwasan ug kahimayaan. Samtang ang mga tawo nakadawat og temporal nga kahupayan, kita nanghinaot ug naglaom nga bation nila ang gugma sa Ginoo alang nila ug magtinguha sa pagsulod o pagpalawom sa relasyon sa pakigsaad uban Kaniya.

Ang mga paningkamot sa pagpalambo sa kahimsog ug kaayohan sa kababayen-an ug kabataan nagtuman sa balaanong responsibilidad sa pag-atiman niadtong nanginahanglan. Apan kini nga inisyatiba nagpanalangin sa mga tawo sa ubang mga paagi:

• Nagpauswag kini sa intelektuwal ug pisikal nga kapasidad sa nagtubo nga henerasyon, nagtabang usab nila sa pagkab-ot sa ilang espirituwal nga potensiyal.

• Nagpasiugda kini og pagtabang ngadto sa atong mga silingan ug mga higala, daghan nila gusto usab nga makakat-on kon unsaon sa pagtabang ang ilang kaugalingong mga anak.

• Naghatag kini og usa ka katuyoan nga nakasentro sa ebanghelyo nga nag-awhag og makahuloganong pagserbisyo ug mga oportunidad sa pagpangalagad alang sa kababayen-an, ilabi na sa young adult nga kababayen-an.

Ang henerasyon karon sa mga young adult gusto nga mahimong kabahin sa importante nga katuyoan, usa ka katuyoan nga makahimo og tinuod nga epekto ug kalainan sa kalibotan. Manghinaot kita nga kining tibuok kalibotan nga inisyatiba motabang sa atong mga kaigsoonang babaye nga makita nga sila nahisakop na sa usa sa labing mahinungdanong mga katuyoan sa yuta: ang balaanong organisasyon sa Ginoo alang sa kababayen-an diha sa Iyang gipahiuli nga Simbahan, ang Relief Society.

Kita nagtuo nga kining tibuok kalibotan ang inisyatiba modasig sa atong mga miyembro ug mga higala sa pagserbisyo sa ilang mga komunidad. Manghinaot kita nga makita nila kana:

• Ang Simbahan ni Jesukristo sa mga Santos sa Ulahing mga Adlaw naghatag og prayoridad sa mga isyu nga nakaapekto sa kababayen-an ug kabataan ug nagpahinungod sa atong mga kapanguhaan sa pagpalambo sa ilang kahimsog ug kaayohan.

• Ang Simbahan ug ang Relief Society niini mao ang tibuok kalibotan nga mga lider sa pagtubag sa makitawhanong mga isyu.

• Ang Relief Society gipangulohan ug gilangkoban sa kababayen-an nga nagpalambo sa kinabuhi sa mga indibidwal, mga pamilya, ug mga komunidad.

Sinugdanan lamang kini sa talagsaong butang nga mopanalangin sa kinabuhi sa daghan kaayo nga mohatag ug modawat sa kahupayan sa Manluluwas karon, ug sa umaabot nga katuigan, ingon nga kining tibuok kalibotan nga inisyatiba magpadayon sa pag-uswag.

Sulod sa Mahimong Maabot sa Atong mga Impluwensya

Sa tibuok kalibotan nga gidak-on, ang Simbahan sa tibuok kalibotan nagrepresentar sa matag usa nato isip mga miyembro sa paghiusa sa mga organisasyon kinsa mga hanas sa pagtubag sa dagkong mga isyu diha sa lagyong mga dapit. Sa gihapon, tingali ang labing maayo nga makitawhanong tabang mahimo duol sa panimalay samtang motabang kamo tabok sa koral o tabok sa dalan. Nagtuman kamo sa inyong mga pakigsaad ug nag-apil sa atong tibuok kalibotan nga katuyoan kon kamo molihok inubanan sa Kristohanon nga kamaluluy-on ug mahigugmaong pag-atiman niadtong anaa sa inyong kaugalingong mga pamilya, mga silingan ug mga komunidad.

Tingali dili kamo makahimo sa pag-ayo sa atop sa silingan o sa pagbiyahe sa laing nasod aron manglimpyo sa mga balay sa mga tawo human sa makagun-ob nga bagyo, apan pwede ba nga basahan ninyo ang usa ka bata, maminaw sa usa ka higala nga nanglimbasog, o modonar og halad sa puasa? Ang matag paningkamot mapuslanon ug importante niini nga buhat sa pag-atiman niadtong nanginahanglan. Salamat sa pagkahimong agianan diin ang uban makadawat sa kahupayan sa Manluluwas pinaagi sa pagkahimong Iyang malumong mga kamot, Iyang abtik nga mga tiil, Iyang mapaminawon nga mga dunggan, Iyang mabinationg mosulti nga mga ngabil.

Samtang ang Simbahan mihiusa sa mga organisasyon aron magtambayayong alang sa kahimsog ug kaayohan sa kababayen-an ug kabataan sa lainlaing mga nasod, ang Relief Society nga mga sister naghiusa sa mga tawo sa pagtubag sa mga hagit sa ilang kaugalingong mga komunidad. Ang kababayen-an sa Relief Society moila sa mga panginahanglan, mopundok sa mga kapanguhaan, ug motabang sa pagtubag sa mga hagit. Ug kita mohimo niini uban sa tabang sa Espiritu, magdala sa gugma ug kahupayan ni Jesukristo ngadto sa tanang anak sa Dios.

Sa pagkakita sa mga panginahanglanon sa mga mibalhin sa Milan, Italy, ang Relief Society nga mga sister miorganisar og oportunidad sa pagserbisyo aron sa pagsangkap nila og sinina ug mga pagkaon sa panimalay. Ang ubang mga sister midonar og wala pa kaayo magamit nga mga aytem, samtang ang uban miorganisar ug milimpyo sa mga donasyon. Ang halad sa matag sister importante. Ang Relief Society nga mga sister mitabang sa mga bisita nga mobati sa gugma ni Jesukristo sa ilang pag-adto sa sentro alang sa mga donasyon. Si Monia, usa ka lokal nga Relief Society nga sister, miingon, “Gikan sa gagmay nga mga butang moabot ang dagkong mga butang. Ug makapanalangin kita sa mga tawo sa sulod ug sa gawas sa Simbahan. Kini ang ebanghelyo nga gilihok.”

Namulong ngadto sa bag-ong naorganisar nga Relief Society, si Propeta Joseph Smith miingon sa mga sister, “Kamo karon nahimutang sa sitwasyon diin kamo makalihok pinasubay niadtong mga maluluy-ong pagbati nga gitanom sa Dios diha sa inyong mga dughan.”

Samtang sa Guadalajara, Mexico, nahibaloan ug nakit-an ni Sister Yee ang daghan kaayong nindot nga mga ehemplo sa mga sister nga naglihok sumala niadto nga mga simpatiya samtang nagtinguha sila sa pagtubag sa lokal nga panginahanglan.

Usa niana nga sister mao si Sister Pulido, nga nakakita sa panginahanglan diha sa lokal nga ospital sa pagtabang sa mga pamilya ug mga indibidwal nga gikan sa layong lugar ug nagkinahanglan og pagkaon ug sinina samtang maghulat sila nga tambalan. Gipundok niya ang 120 ka Relief Society nga mga sister, pipila ka misyonaryo, ug uban pa diha sa komunidad sa pagpangita og mga donasyon sa pagkaon, tubig, mga habol, ug sinina. Mga 1,500 ka tawo ang midonar og pagkaon, ug ang mga sister ug ang uban miandam og mga paniudto ug pagkaon alang sa dul-an sa 1,200 ka tawo. Ang mga pagkaon gihatag niadtong naghulat sa ilang turno alang sa pagtambal sa ospital.

Kini nga sister miingon nga gihimo niya kini tungod kay naluoy siya niini nga mga tawo. Nanglugmaw ang mga luha sa iyang mga mata, mapainubsanon siya nga mipasabot nga kanhi usa siya niadtong mga indibidwal nga naghulat sa ospital samtang ang iyang bana miadto ug nagpatambal sa kanser. Miingon siya nga ang iyang labing mahinungdanong panalangin ug tinguha mao ang pagpangalagad sama sa buhaton sa Manluluwas.

Nagdala sa Kahupayan sa Manluluwas

Mga sister, gisangonan kita og sagrado nga buhat sa pagdala sa kahupayan sa Manluluwas—temporal ug espirituwal—ngadto sa tibuok kalibotan. Ug mahimo nato kini pinaagi sa pag-alima niadtong maabot sulod sa atong kaugalingong impluwensya. Pagkadako nga gasa ug panalangin kini. Ang pag-apil sa tibuok kalibotan nga inisyatiba sa pagpalambo sa kaayohan sa kababayen-an ug kabataan mao ang usa sa daghang kasinatian nga makapaduol nato ngadto sa Manluluwas. Sa paglihok sama sa Iyang buhaton, atong bation ang Iyang gugma; ug ang atong tinguha, ug pasalig, ang relasyon sa pakigsaad uban Kaniya molambo.

Salamat sa pagtabang kanamo sa pagdala sa gugma ug kahupayan ni Jesukristo ngadto sa atong mga sister ug mga brother sa bisan asa.

Sa pagpaningkamot sa pagsundog kang Jesukristo, ang labing importante nga kinahanglanon natong buhaton isip Iyang mga disipulo mao ang pagbatyag sa dinalian nga panginahanglan sa indibidwal sa atong palibot ug tubagon kini nga adunay pailob ug gugma.

Si Presidente Russell M. Nelson miingon nato sa 2024 nga Tibuok Kalibotan nga Debosyonal sa Relief Society, “Ako mopanalangin kaninyo nga makaamgo nga ang inyong balaan nga mga gasa isip anak nga babaye sa Dios naghatag kaninyo og gahom dili lamang sa pag-usab sa mga kinabuhi apan sa pag-usab sa kalibotan!”

Kana ang atong talagsaong responsibilidad!

Kini usa ka mahimayaong panahon nga mahimong mga babaye sa pakigsaad ug mga miyembro sa usa ka katilingban nga nagdala sa kahupayan sa Manluluwas—temporal ug espirituwal—ngadto sa atong mga sister ug mga brother sa tibuok kalibotan. Ang labing mahinungdanong tumong sa paghatag og kahupayan ug pagbarog pinaagi sa kinaugalingong paningkamot mao ang pag-andam sa dalan alang sa atong mga sister ug mga brother sa pagtinguha ug pagdawat sa gugma ug kaluoy nga ihatag niadtong naghimo ug nagtuman sa mga pakigsaad uban sa Dios.

Kami mopahayag sa among pagpamatuod nga si Jesukristo mao ang kahupayan ug ang kahupayan nga Iyang gitanyag mahangtoron.