Pagtubag sa Mahinungdanong Pangutana: Unsa may Inyong Hunahuna mahitungod ni Kristo?

Ang panan-awon nga gihulagway diha sa Doktrina ug mga Pakigsaad 76 naghatag og gibug-aton sa mahinungdanong mga kamatuoran mahitungod ni Jesukristo:

• “Ang Ginoo mao ang Dios, ug gawas kaniya wala nay Manluluwas” (bersikulo 1).

• Siya “maluluy-on ug mabination niadtong mahadlok [kaniya], ug mahimuot sa pagpasidungog niadtong moserbisyo [kaniya] sa pagkamatarong” (bersikulo 5).

• “Siya mianhi sa kalibotan … aron mag-antos sa mga sala sa kalibotan, ug aron balaanon ang kalibotan, ug aron limpyohan kini gikan sa tanang dili matarong; nga pinaagi kaniya ang tanan unta maluwas kadtong mga gihatagan sa Amahan sa iyang gahom ug gilalang pinaagi kaniya” (mga bersikulo 41–42).

• Ug si Jesukristo sa kataposan “nagbuhat niining hingpit nga pag-ula pinaagi sa pagpaagas sa iyang kaugalingong dugo” (bersikulo 69).

Si Joseph ug si Sidney maisogon nga nagpamatuod sa katinuod ug kamahinungdanon ni Jesukristo:

“Siya buhi!

“Kay kami nakakita kaniya, gani sa tuo nga kamot sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan—

“Nga pinaagi kaniya, ug diha kaniya, ug tungod kaniya, ang mga kalibotan nalalang, ug ang mga lumulupyo niana mga anak nga lalaki ug mga anak nga babaye sa Dios” (mga bersikulo 22–24).

Si Jesukristo moluwas sa “tanan gawas [sa mga anak sa kapildihan]” (Doktrina ug mga Pakigsaad 76:44). Natubag na nila sa hingpit ang pangutana “Unsa may inyong hunahuna mahitungod kang Kristo?” pinaagi sa pagsalikway sa Balaang Espiritu ug paglimod kang Jesukristo ug sa Iyang gahom human nga Siya mipadayag ngadto kanila (tan-awa sa bersikulo 43). Sa pagbuhat sa ingon, sila “milansang sa krus kaniya diha sa ilang mga hunahuna ug mga kasingkasing ug mipakaulaw kaniya” (bersikulo 35).

Giunsa pagtubag niadtong anaa sa telestial nga gingharian ang pangutana nga “Unsa may inyong hunahuna mahitungod ni Kristo?” Sila mipili sa pagsalikway sa ebanghelyo ug “sa pagpamatuod ni Jesus” (Doktrina ug mga Pakigsaad 76:82, 101), ug sila misalikway sa Iyang mga sugo “mga bakakon, ug mga barangan, ug mga mananapaw, ug nagbaligya sa dungog” (bersikulo 103).

Bisan pa man niana, makadawat sila og pagkabanhaw ug usa ka ang-ang sa himaya “nga dili gayod matugkad sa panabot sa tawo” (bersikulo 89). Nasunod nila ang labing minos usa ka balaod sa telestial nga gingharian (tan-awa sa Doktrina ug mga Pakigsaad 88:36) nagkinahanglan nga ang tanan “moluhod, ug ang matag dila mokompisal ngadto kaniya kinsa naglingkod sa trono hangtod sa kahangtoran” (Doktrina ug mga Pakigsaad 76:110).

Giunsa pagtubag niadtong anaa sa terrestial nga gingharian ang pangutana nga “Unsa may inyong hunahuna mahitungod ni Kristo?” Bisan og sila adunay “pagpamatuod ni Jesus,” sila “dili maisogon” niini; “mao nga, dili sila makaangkon og korona didto sa gingharian sa atong Dios” (bersikulo 79). Sila gipanalanginan nga “makadawat sa pagduaw sa Anak, apan dili sa kahingpitan sa Amahan” (bersikulo 77).

Si Jesukristo ug ang Iyang walay kataposang ebanghelyo naghagit nato nga dili lamang mahibalo apan usab mobuhat ug mamahimo. Aron makadawat sa kahingpitan sa Amahan ug sa Anak, ang usa ka tawo kinahanglang modawat sa mga ordinansa sa templo ug magmatinud-anon niana nga mga pakigsaad. Si Propeta Joseph Smith mipatin-aw: “Kon ang usa ka tawo makakuha sa kinatibuk-an nga pagkapari sa Dios, kinahanglan iya kining makuha sa samang paagi nga si Jesukristo nakaangkon niini, ug kana mao ang paghupot sa tanang sugo ug pagtuman sa tanang mga ordinansa diha sa balay sa Ginoo.” Ang terrestrial nga mga binuhat dili andam nga modawat sa kahingpitan sa Amahan.

Giunsa pagtubag niadtong anaa sa celestial nga gingharian ang pangutana nga “Unsa may inyong hunahuna mahitungod ni Kristo?” Sila midawat “sa pagpamatuod ni Jesus”; sila mituo “sa iyang ngalan;” sila “nabunyagan subay sa paagi sa iyang paglubong, ingon nga gilubong diha sa tubig pinaagi sa iyang ngalan” (bersikulo 51). Sila misunod “sa mga sugo [aron] mahimo silang mahugasan ug malimpyohan gikan sa ilang tanang sala, ug makadawat sa Balaang Espiritu pinaagi sa pagpandong sa mga kamot gikan kaniya kinsa na-orden ug naselyo niini nga gahom” (bersikulo 52). Sila “nagmadaogon pinaagi sa pagtuo [diha ni Jesukristo], ug naselyo pinaagi sa Balaan nga Espiritu sa saad” (bersikulo 53). Sila “nahimong hingpit pinaagi ni Jesus ang tigpataliwala sa bag-ong pakigsaad, kinsa nagbuhat niining hingpit nga pag-ula pinaagi sa pagpaagas sa iyang kaugalingong dugo” (bersikulo 69).

Si Jesukristo nakasabot sa Iyang tahas diha sa plano sa Langitnong Amahan alang sa kalipay: “Ako ang dalan, ang kamatuoran, ug ang kinabuhi. Walay makaadto sa Amahan kon dili moagi kanako” (Juan 14:6). Walay makadawat sa celestial nga himaya o sa kahingpitan sa Amahan nga dili modawat sa tanan nianang gitanyag sa Manluluwas pinaagi sa Iyang Pag-ula (tan-awa sa Doktrina ug mga Pakigsaad 84:37–38): Iyang gugma, gahom, kaluoy, kaamaayo, mga sulugoon, kaangayan, mga sugo, mga ordinansa, ug mga pakigsaad.

Si Presidente Russell M. Nelson mihatag og gibug-aton sa tahas sa Simbahan ni Jesukristo sa pagtabang sa mga anak sa Dios nga makadawat og kinabuhing dayon: “Ang dugay na nga katuyoan sa Simbahan mao ang pagtabang sa tanang miyembro nga molambo ang ilang hugot nga pagtuo sa atong Ginoong Jesukristo ug sa Iyang Pag-ula, sa pagtabang kanila sa pagbuhat ug pagtuman sa ilang mga pakigsaad uban sa Dios, ug aron sa paglig-on ug [pagselyo] sa ilang mga pamilya.”

Si Presidente Nelson miawhag nato nga ang celestial nga gingharian himoon natong mahangtorong tumong, “mabinantayong mokonsiderar asa [kita] ibutang sa sunod kinabuhi sa [atong] matag desisyon samtang ania sa yuta.” Pinaagi sa pagtubag niini nga pagdapit, kita maandam sa pagtubag sa mahinungdanong pangutana “Unsa may inyong hunahuna mahitungod ni Kristo?”

Ang panan-awon bahin sa mga ang-ang sa himaya mipaneguro nato dili lamang nga ang kabubut-on tinuod apan usab ang mga pagpili mahinungdanon gayod. Nakapahinumdom usab kini nato nga, tungod ni Jesukristo, kita “natubos gikan sa pagkapukan” ug “nahimong gawasnon hangtod sa hangtod … mopili sa kalingkawasan ug sa kinabuhing dayon, pinaagi sa halangdon nga Tigpataliwala sa tanang katawhan, o sa pagpili sa pagkabihag ug sa kamatayon” (2 Nephi 2:26–27). Unsa ang atong pilion? Ang atong umaabot niini nga kinabuhi ug ang atong mahangtorong padulngan sama ka hayag sa atong hugot nga pagtuo diha ni Jesukristo.