“Pagpangalagad Niadtong adunay mga Allergy sa Pahumot,” Liahona, Hulyo 2025.
Pagpangalagad Niadtong adunay mga Allergy sa Pahumot
Ang mga pagpahimutang nagkinahanglan og pagkamabinantayon ug kaluoy gikan sa tanang nalambigit.
Mga paghulagway pinaagi ni Elia Sampo
Ang imbitasyon sa atong Manluluwas alang sa “[tanan kanato] sa pagduol ngadto kaniya ug pag-ambit sa iyang kamaayo; ug siya walay balibaran bisan kinsa nga moduol kaniya” (2 Nephi 26:33). Usa ka importante nga paagi nga kita moduol sa Manluluwas mao ang pagtambong sa simbahan ug pag-apil sa mga kalihokan diha sa simbahan. Usahay, ang pagtambong sa simbahan mahimong lisod tungod sa lainlaing mga rason. Lisod kini ilabi na sa usa ka tawo nga nagpuyo nga adunay kakulangan sa panglawas, allergy, o ubang medikal nga mga kahimtang sa panglawas.
Isip mga disipulo ni Jesukristo, gusto nato nga ang tanan mobati nga giabiabi ug makatambong sa simbahan ug sa mga kalihokan. Pananglitan, atong gipakita ang atong pagsabot sa mga tawo nga adunay allergy sa pagkaon pinaagi sa pagpili sa opsiyon nga mag-andam sa sakramento nga walay gluten nga sagol. Makahatag kini og paagi niini nga mga indibidwal sa pag-ambit sa sakramento ug sa pagbag-o sa sagrado nga mga pakigsaad ngadto sa Ginoo.
Ang ubang mga miyembro maglisod sa pagtambong sa simbahan o ubang pampubliko nga mga panagpundok tungod sa pagkasensitibo ngadto sa mga kemikal sa mga pahumot sama sa mga perfume ug mga cologne. Ang mga tawo nga adunay hubak, allergy sa pahumot, o sensitibo sa nagkadaiyang kemikal mas sensitibo sa kemikal nga mga baho ug mahimong adunay reaksiyon. Sama sa mga allergy sa pagkaon, dili ka makasulti nga ang tawo sensitibo sa kemikal pinaagi lamang sa pagtan-aw nila. Agi og resulta, kini nga kahimtang kanunay nga dili makita, apan makaapekto og dako sa abilidad sa tawo sa paghimo sa normal nga mga kalihokan sa kinabuhi.
Mga Sintomas
Ang mga sintomas managlahi ug mahimong maglakip sa kasukaon, pagkalipong, sakit sa ulo, kakapoy, kahigwaos, mga problema sa pagginhawa, sakit sa dughan ug tutonlan, ug daghan pa.
Ang sintomas magsugod sa dili ra grabe ngadto sa grabe. Samtang ang usa ka tawo sakitan sa ulo nga mawala ra human sa duha ka oras, ang laing tawo mahimong adunay grabe nga reaksiyon nga molungtad sa pipila ka adlaw o moresulta sa emerhensiya nga pagdala ngadto sa ospital.
Ang kasensitibo sa kemikal makabalda sa kinabuhi sa tawo ug maoy hinungdan sa mga pagbati nga nag-inusara. Usa ka miyembro nga nakasinati og grabe nga sintomas mipasabot: “Ang matag adlaw nga mga kalihokan, sama sa pag-shopping, pagbisita sa mga higala, pagtambong sa mga miting sa Simbahan, o pagpangaon sa gawas mahimong makapadismaya nga mga hagit. Mosangpot kini ngadto sa mga pagbati og kasagmuyo, pagpalayo, ug hilabihan nga pag-inusara. Agi og dugang, sa kasagaran masaypan kita sa pagsabot ug hukman sa mga naglibot nato nga dili ‘makakita’ sa atong sakit ug mibati nga kita walay laing gihunahuna kondi ang ato rang kaugalingon ug nagpanghinobra ra kaayo kay dili kita ganahan sa kahumot.’”
Naay usa ka amahan ug iyang anak nga lalaki nga adunay grabe nga hubak nga motukar sa kemikal nga mga pahumot. Ang anak nga lalaki nangandam sa pagpakigpulong sa panagtigom alang sa sakramento sa dili pa moadto sa misyon. Usa ka semana sa wala pa ang iyang pakigpulong, ang bishop misulti sa mga miyembro sa ward nga ang batan-ong lalaki maglisod og ginhawa kon makatimaho og isog nga mga perfume ug mihangyo nga hinumdoman kana sa mga miyembro kon motambong sa simbahan sa sunod semana. Miresulta kini sa labing nindot nga Dominggo nga nasinati sa amahan ug sa anak diha sa simbahan.
Pagpahimutang
Diha sa Simbahan, ang tawo nga adunay dili grabe nga kasensitibo sa kemikal mahimong mopili sa paglingkod layo sa ubang tawo. Sa uban, mas dugang nga mga pag-amping ang kinahanglanon, sama sa pagsul-ob og facemask, pagdala og air purifier ngadto sa simbahan, o pagtan-aw sa panagtigom sa sakramento sa online.
Bisan unsa pa man ang ka grabe sa kasensitibo sa tawo sa kemikal nga mga baho, importante nga hinumdoman nga kini usa ka tinuod nga problema. Ang mga pagpahimutang nagkinahanglan og pagkamabinantayon ug kaluoy gikan sa tanang nalambigit. Ang mga tawo naggamit og mga perfume ug ubang mga pahumot tungod sa lainlaing mga rason, sama sa kay ganahan lang o sa kalimpyo sa panglawas. Ang pagtinahoray ug pagsinabtanay mahinungdanon sa pagtubag sa mga panginahanglan sa tanang nalambigit.
Kon kamo adunay kasensitibo sa kemikal, palihog pakigsulti sa usa ka sakop sa inyong bishopric. Samtang ang pagpahimutang dili posible sa tanang kahimtang, makatabang kini nga pahibaloon ang mga lider sa ward mahitungod sa inyong mga panginahanglan. Ang konseho sa ward makigtambayayong ninyo sa pagpaningkamot sa ilang labing maayo sa pagpahimutang sa inyong kasensitibo sa kemikal. Ang tukmang pagtagad managlahi depende sa mga kahimtang ug kinahanglang mabalanse uban sa pagsabot nga dili tanang sitwasyon makatubag sa mga panginahanglan sa tanan.
Pipila ka ideya alang sa mga lider:
-
Motabang sa mga miyembro nga makasabot nga ang kasensitibo sa kemikal usa ka tinuod nga problema alang niadtong apektado.
-
Mohatag og regular nga mga pagpahibalo ug mga pahinumdom kon unsaon nga kita magmaluluy-on sa uban nga nakigbisog sa kasensitibo sa kemikal ug ubang medikal nga mga kahimtang nga nagkinahanglan nga ilain ang usa ka tawo ug unsaon nga makatabang kita sa tanan nga makaapil sa pagsimba sa Ginoo.
-
Ikonsiderar ang pagtawag og espesyalista sa ward o stake alang sa adunay kakulangan sa panglawas aron motabang sa pagtubag niini ug sa ubang mga isyu.
-
Ikonsiderar ang pag-organisar og sesyon sa pagbansay alang sa mga lider ug sa mga miyembro mahitungod sa kasensitibo sa kemikal ug sa ubang mga sitwasyon nga mahimong makaapekto sa abilidad sa usa ka tawo sa pag-apil sa mga miting sa Simbahan.
Pipila ka ideya sa mga pagpahimutang:
-
Mohatag og mga oportunidad sa mga indibidwal nga sensitibo sa kemikal nga mopakigbahin sa ilang mga panginahanglan ug mga problema ngadto sa mga lider sa ward.
-
Kon posible, himoa ang inyong labing maayo aron maimplementar ang mga lagda alang sa mga miting ug mga kalihokan nga magtugot sa mga tawo nga adunay sensitibo o mga allergy nga komportableng makatambong.
-
Ikonsiderar ang pagtanyag og online streaming sa mga miting alang niadtong dili makatambong ug paghatag og mga paagi alang niini nga mga indibidwal aron makaambit sa sakramento.
-
Mogamit lamang og mga produkto nga giaprobahan ug gihatag sa grupo sa mga pasilidad sa meetinghouse sa Simbahan. Kon ang usa sa gigamit nga mga produkto nakamugna og problema, pakigtambayayong sa manedyer sa lokal nga mga pasilidad aron mangita og mga alternatibo. Kon ang mga miyembro magdala og ilang kaugalingong mga air freshener o mga produkto sa pagpanglimpyo, kana nga mga produkto mahimong makamugna og mga reaksiyon sa sensitibo nga mga indibidwal.
-
Ikonsiderar ang kasensitibo sa kemikal kon magplano og mga kalihokan.
-
Maghunahuna kanunay nga ang ubang mga tawo nga adunay pagkasensitibo sa kemikal gusto nga moserbisyo sa kapasidad nga adunay seguridad alang nila.
Si Elder Patrick Kearon sa Korum sa Napulog Duha ka Apostoles mitudlo: “Alang niadtong mibati nga wala matagad o naa ra sa kilid, ang kanindot sa pagbati sa [atong] pag-abiabi mahinungdanon gayod. Sa kataposan, mahimo natong pangutan-on ang atong kaugalingon kon unsa ang gusto sa Manluluwas nga mahitabo sa atong oras sa sakramento. Sa unsang paagi gusto Niya nga ang matag usa sa Iyang mga anak abi-abihon, atimanon, amumahon, ug higugmaon? Unsa kaha ang Iyang gusto nga atong bation kon kita motambong aron mabag-o pinaagi sa paghinumdom ug sa pagsimba Kaniya?”
Sa pagpahibalo bahin niini nga isyu, ang mga tawo nga nakigbisog sa kasensitibo sa kemikal mobati nga gipaminaw, gitahod, ug mas makaapil sa ilang ward o branch. Kon ang mga bishopric ug mga konseho sa ward maluluy-on ug mainampoon nga makigtambayayong sa mga indibidwal nga apektado niini nga mga matang sa kahimtang sa panglawas, mas daghang mga anak sa Langitnong Amahan ang malig-on kon sila mahatagan og mas daghang oportunidad nga mopaduol kang Jesukristo. Samtang ang ward magtigom, “diin ang ilang mga kasingkasing mabugkos sa panaghiusa ug sa gugma sa usag usa” (Mosiah 18:21), ang mga kasingkasing matandog ug mamaayo.