Ang Hugot nga Pagtuo ni Sister Muñoz

Paghulagway pinaagi ni David Malan/Malan Creative

Niadtong 1967, si Elder William Danner ug ako nahimong duha sa kinaunhang 20 ka misyonaryo nga moserbisyo sa Colombia. Wala kaayo kami magmalamposon hangtod nga ang usa ka tawo nga ginganlan og Raúl, nga gitudloan sa laing mga misyonaryo, mipailaila namo sa pamilya Muñoz. Ang Espiritu kusog kaayo samtang nagtudlo kami sa pamilya, nagpamatuod kang Propeta Joseph Smith ug sa Pagpahiuli.

“Nasayod ko nga kining mga batan-ong lalaki nagsulti sa kamatuoran,” si Raúl miingon. “Aduna sila sa samang pagkapari nga anaa ni Jesukristo. Mahimo sila nga mosaka sa taas karon dayon ug ayohon ang imong anak nga babaye nga buta, si Margarita.”

Si Sister Muñoz mitan-aw nako ug nangutana, “Tinuod ba kana?”

Mura kog natuk-an. Ang akong pagpamatuod wala pa masulayi og sama niini sukad. Nasayod ko nga ang ingon niana nga milagro magkinahanglan og lig-on nga pagtuo. Wala madugay nahibaloan nako ug sa akong kompanyon nga ang mga espesyalista sa mata misulti sa pamilya nga si Margarita, nga nawad-an sa iyang panan-aw unom ka bulan na ang milabay human sa aksidente, dili na gayod makakita og balik.

“Kamo adunay pagkapari nga sama kang Jesukristo,” si Sister Muñoz miingon. “Ang akong anak nga babaye buta. Mosaka kita sa taas ug ayohon siya.”

Wala ko sukad makasaksi og ingon niana ka hugot nga pagtuo. Sama siya sa asawa ni Hari Lamoni, nga miingon kang Ammon, “Ako motuo nga kini mahimo sumala sa imong gisulti” (Alma 19:9).

Si Elder Danner ang midihog ni Margarita, ug ako ang miselyo sa pagdihog. Sa akong katingala, ang mga pulong nga migula sa akong ba-ba dili sa akong kaugalingon: “Ikaw mamaayo ug makadawat sa imong panan-aw.” Mibati usab ko sa pagsulti og ubang mga panalangin, naglakip nga ang mga sakop sa pamilya motabang sa pagpalig-on sa Simbahan sa Colombia. Human niana, naghunahuna ko kon nakahimo ba ko og mga saad nga dili matuman.

Pagkasunod adlaw, ang batan-ong anak nga lalaki sa pamilya nagdagan paingon namo sa dalan, nagsinggit, “Milagro! Milagro! Ang akong igsoong babaye makakita na!”

Nakabunyag kami og 13 ka tawo nianang semanaha.

Sila si Brother ug Sister Muñoz nahimong matinud-anong mga miyembro sa Simbahan. Ang ilang impluwensya, lakip sa trabaho ni Brother Muñoz isip nangulo sa mga custom sa Colombia, nakatabang sa pagpakatap sa ebanghelyo didto. Ang usa ka anak nga babaye nakaserbisyo og misyon; ang iyang igsoong lalaki nakaserbisyo isip bishop. Si Margarita nagpabiling makakita sa tibuok niyang kinabuhi.

Si Jesukristo miingon bahin niadtong adunay hugot nga pagtuo diha Kaniya, “Pinaagi sa akong ngalan mopabuka sila sa mga mata sa mga buta” (Doktrina ug mga Pakigsaad 84:69). Nasayod ko nga “ang tanan mahimo sa tawo nga may pagtuo” diha sa Manluluwas (Marcos 9:23).