Mga Yanong Paagi nga Mahimong Mas Kristohanon sa Atong Pagpangalagad

Ni Francisco Lázaro Campos de Sousa, Brazil

Atol sa usa ka miting sa kapangulohan sa korum sa mga elder, mibati ko og tinguha nga makigkita sa usa ka dili aktibong sakop sa korum, tawo nga wala pa nako mahimamat. Usa ka adlaw human sa pagpangompra mibati ko nga moadto sa iyang balay. Nagpanuko ako, apan ang mga pagbati sa pakigkita kaniya mas mikusog. Gipaila nako ang akong kaugalingon ug gisulti ang mga butang nga misulod sa akong hunahuna. Giingnan nako siya nga gikinahanglan siya sa Ginoo, ug siya nagkinahanglan sa Ginoo.

Gipakigbahin niya ang iyang mga kasubo sa pag-inusara ug ubang mga kalisdanan. “Makakita ka og mga higala sa korum kinsa motabang ug mosuporta,” giingnan nako siya. Gidawat dayon niya ang akong pagdapit ug mitambong sa mga miting sa Igpapahulay.

Wala ako makaila niya sa sinugdanan, apan ang Ginoo nakaila ug mibati sa iyang kasingkasing. Ang akong kombiksiyon napamatud-an. Kon mangalagad kita sa mga anak sa atong Amahan ug mag-ampo aron mahibaloan ang ilang panginahanglan, ang Ginoo mogiya kanato ngadto nila. Masinati usab nato ang malipayong kasinatian sa “[pagpataas sa] mga kamot sa nawad-an og paglaom, ug [paglig-on sa] mga tuhod nga mahuyang” (Doktrina ug mga Pakigsaad 81:5).

Ni Ana Rodriguez Ramirez, Spain

Usa ka adlaw sa akong misyon, ang akong kompanyon ug ako nadasig sa pagbisita sa usa ka sister sa ward. Nanggunting kami og mga kasingkasing nga papel ug gisulatan kini og mahigugmaong mga mensahe sa pagpahinumdom kaniya sa iyang bili.

Nangabot kami sa iyang balay, naghunahuna nga basin wala siya sa balay. Samtang gipahimutang namo ang mga papel nga kasingkasing, ang iyang sakyanan mihunong diha gayod sa balay. Ang akong kompanyon ug ako misulay sa pagtago aron mahinayon ang mahigalaong sorprisa, apan napakyas kami. Nakit-an niya kami.

Ang sister mikanaog gikan sa iyang sakyanan nga may luha sa iyang nawong. Gigakos niya kami ug miingon,”Kamong duha ang akong mga anghel. Kanunay kamong anaa kon gikinahanglan ko kaayo kamo. Salamat.”

Iya kaming gidapit pasulod ug gisultihan kami sa tibuok adlaw niyang pag-atubang og usa ka lisod nga sitwasyon sa pamilya. Gipaminaw ra namo siya. Among gipakigbahin unsa kadako ang gugma sa Dios kaniya ug nga ang Dios wala mahikalimot sa unsay iyang gisinati. Gibasahan namo siya og mga kasulatan, ug ang iyang panimalay napuno sa Espiritu Santo dihang mibiya kami.

Ang mga disipulo ni Jesukristo“andam … sa paghupay niadtong nagkinahanglan og kahupayan” (Mosiah 18:9). Iya kitang gisaligan nga mahimong kabahin sa Iyang talagsaon nga buhat—mas taas ug mas balaan nga pagpangalagad. Kon mogahin kita og panahon aron makaila sa mga tawo ug maminaw kanila, mas masangkapan kita nga mahimong mga anghel sa Dios dinhi sa kalibotan.

Ni Talia Rodríguez, Switzerland

Ang pag-ampo usa ka mahinungdanong bahin sa pagpangalagad sama sa Manluluwas. Ang pag-ampo makasugod sa atong pagpangita aron mahibalo kon kinsay panalanginan. Makatabang kini nga kita makasabot sa kabubut-on sa langit kon unsaon sa pagpanalangin. Ang pag-ampo usa usab ka mahinungdanon nga lakang sa pagkat-on unsaon sa pagpahigayon sa atong katungdanan.

Ang akong bana, si Mario, nag-antos sa COVID sa unang mga adlaw sa sakit sa wala pa ang mga pagbakuna. Ang bishop mihangyo og usa ka elder sa among ward, si Moroni, sa paghatag kaniya og panalangin sa pagkapari.

Kay dili man siya gustong motakod ang kagaw ug motakod-takod sa iyang pamilya, si Moroni nagkinahanglan og kumpirmasyon gikan sa langit sa wala pa mopadayon. Miluhod siya sa pag-ampo uban sa iyang asawa, naghulat og malinawong kaseguroan. Dihang mibati siya og kalinaw, giingnan siya sa iyang asawa, “Lakaw og dalha ang imong taming, Moroni.”

Dihang misulod siya sa among balay, nakakita kami og manggugubat sa Ginoo. Ang akong bana nakaluha sa kalipay dihang nakita niya ang brother nga maisog nga miadto sa paghatag kaniya sa panalangin nga iyang gikinahanglan. Usa kadto ka dili mahulagway nga kasinatian.

Ang Manluluwas miadto pinaagi sa Iyang sulugoon, nga among pinalangga nga brother nga si Moroni, kinsa mipatong sa iyang mga kamot sa ulo ni Mario ug mipanalangin kaniya sama sa buhaton ni Kristo.

Ni Geiziane Morais Freitas Duarte, Brazil

Kausa nangalagad ko sa usa ka sister kinsa wala na magsimba. Dihang gibisita nako siya, akong ipakigbahin unsa kadako ang gugma sa Manluluwas kaniya ug sa iyang pamilya. Kanunay kong modapit niya sa pag-adto sa simbahan sa mosunod nga Dominggo. Kini nga buhat mihangtod og taas nga panahon, apan wala gayod sila moadto. Nadismaya ko. Ang tentasyon nga dili na magpadayon kusog kaayo. Apan sa matag higayon nga ang akong kompanyon ug ako mobisita sa ilang panimalay, among makita sa daklit ang balaanong potensiyal sa pamilya. Kanunay namo silang mahanduraw nga anaa sa templo, nagsul-ob og puti. Nasayod kami nga kinahanglan kaming padayon nga maningkamot.

Human sa daghang pag-ampo ug mga pagbisita, ang adlaw sa kataposan miabot—ang pamilya miadto sa simbahan! Padayon na silang miadto sa matag semana. Ang pamilya naningkamot gayod aron molambo ang ilang pagtuo ug magsubay sa dalan sa pakigsaad. Klaro na nga ang ebanghelyo milig-on kanila.

Sa kadugayan, nakadawat ko og imbitasyon sa ilang pagpaselyo sa templo. Dihang nagtan-aw ko sa sagradong ordinansa, dili ko makapugong apan sa pagluha sa kalipay. Usa kadto ka milagro.

May mga higayon nga gusto na kong moundang. Apan sa matag higayon nga mobisita ko nila, makita nako ang templo. Gipakita kanako sa Ginoo ang daklit nga pagtan-aw sa Iyang plano alang niini nga pamilya. Iya akong gigamit isip Iyang instrumento aron padayon nga mokontak kanila. Mapasalamaton ako Kaniya sa pagpakita ngari nako sa tinuod nga panan-awon sa pagpangalagad.

Ang kalipay ug gahom sa pagpangalagad makita kon mamahimo kitang usa ka panalangin sa kinabuhi sa usa ka tawo, moserbisyo kanila sama sa buhaton sa Manluluwas. Ang Kinatibuk-ang Presidente sa Relief Sociey si Camille N. Johnson mitudlo nga “sa higayon nga kamo mobuhat og bisan unsang butang nga magdala og kahupayan ngadto sa uban—temporal man o espiritwal— … inyong gidala ngadto kanila ang gugma ni Jesukristo. Mopamatuod ko nga kon buhaton ninyo, kamo mapanalanginan nga makaplagan ang inyong kaugalingong kahupayan diha Kaniya.”

Mamahimo kitang mas mahisama sa Manluluwas sa atong pagpangalagad kon kita moduol sa Ginoo alang sa tabang sa atong mga paningkamot. Sundon nato ang mga pag-aghat, ilhon kadtong atong giserbisyohan, mag-ampo alang nila, tabangan sila sa paghimo ug pagtuman sa mga pakigsaad, ug ipadayon nga makugihon ang atong mga paningkamot.

Ang pagpangalagad sa Manluluwas—sa tagsa-tagsa—usa ka maayong sundanan sa atong kaugalingon (tan-awa sa 3 Nephi 11:15). Sigon sa gitudlo ni Elder Juan Pablo Villar sakop sa Seventy: Kon kita mosunod ni Jesukristo—ang Labing Hanas nga tigpangalagad—ug mangalagad ngadto sa uban sama sa Iyang pagpangalagad, Siya molig-on ug mohatag og gahom kanato. Pinaagi sa atong pagpangalagad, kita makapanalangin sa kinabuhi sa uban ug makakaplag og kalinaw ug kamaya alang sa atong kaugalingon.”