Gihupay sa Ginoo aron Makatulog

Paghulagway pinaagi ni David Malan/Malan Creative

Dihang ang una namong anak, si Caden, 10 pa ka bulan, ang akong bana, si David, ug ako mibilin kaniya sa pag-atiman sa akong mga ginikanan sa unang higayon. Nanggawas mi aron manihapon ug dayon nangadto sa sinehan. Dihang nakapalit na mi og popcorn ug nanglingkod, mitawag ang akong inahan.

Ang among anak wala na magginhawa, ug nagpadulong na ang ambulansiya!

Mipadagan dayon mi sa sakyanan pauli nga naratol ug nanagdagan sa pagsulod nga nakita si Caden nga gisapwang sa akong inahan, nagpahiyom sa mga paramedics. Okey na siya, apan nakasinati siya og kombulsyon.

Dili matino sa mga doktor ang hinungdan sa kombulsyon o ang duha ka sunod-sunod nga kombulsiyon, apan giresitahan siya og tambal aron itabang. Isip unang higayon nga nainahan, nasakitan kaayo ko. Ingon og OK ra si Caden, apan ang akong kasinatian mitarog sa akong pagtuo. Gisanapan ako sa kaluya ug kabalaka.

Duha ka tuig human niana usa ka neurologist mirekomendar nga ipa-electroencephalogram (EEG) si Caden, usa ka pagtesting nga magsukod sa kalihokan sa iyang utok samtang natulog siya. Kon maayo ra ang mga resulta, ihunong na ang iyang tambal sa kombulsyon.

Nabalaka ko mahitungod sa pag-testing kay si Caden mihunong na sa pagtagpilaw usa ka tuig nang milabay. Unsaon kaha namo siya sa pagpakatulog diha sa nagkapuliki nga opisina sa doktor nga puno sa mga electrode ang iyang ulo?

Sa gabii sa wala pa ang pag-testing, gihatagan ni David si Caden og panalangin sa pagkapari. Dihang gisugdan ang panalangin, akong gibati ang kusog nga presensiya sa Espiritu. Nasayod ko nga ma-OK ra ang tanan. Primero kining higayon sukad sa iyang una nga pagkombulsiyon nga ako mibati og kalinaw.

Pagkasunod adlaw gipangtaoran sa mga doktor og mga electrode ang ulo ni Caden. Dayon gipahimutang namo siya sa pang-eksamin nga lamesa ug gipalong ang mga suga.

Nakatulog siya sulod sa mga minuto. Ingon og dili kini usa ka milagro, apan wala pa siya makatagpilaw nga siya ra sulod sa kapin sa usa ka tuig.

Ang Langitnong Amahan wala makalimot kanamo. Ang Iyang Espiritu didto niana nga opisina sa doktor, nagpakalma ni Caden ug naghupay kanako. Ang akong kinaiya ngadto sa mga pagsulay ug sa mga panalangin sa pagkapari nausab nianang adlawa. Nasayod ko nga ang gahom sa pagkapari tinuod.

Si Caden karon usa na ka young adult. Wala na siya magkombulsyon sukad niadtong bata pa siya. Miatubang siya og ubang mga hagit apan nabuntog niya ang kadaghanan niini. Nasayod ko nga ang Ginoo padayong nagbantay kaniya ug mipakalma sa akong mga kabalaka (tan-awa sa Lucas 8:50).