“Ang Gugma ug Pagpakabana sa Manluluwas alang sa Usa ka Tawo,” Liahona, Hulyo 2025.
Ang Gugma ug Pagpakabana sa Manluluwas alang sa Usa ka Tawo
Kita gihangyo sa paghigugma ug sa pagpangalagad sa usag usa sama sa gihimo ni Jesukristo—sa tinagsa-tagsa.
Paghulagway pinaagi ni Alex Nabaum
Wala madugay human sa akong bunyag niadtong Agosto 1984, nakadungog ko og kalihokan sa paglingawlingaw nga adunay musika ug barbeque dili layo sa akong gipuy-an sa Kwekwe, Zimbabwe. Ang akong mga higala ug ako naghinamhinam nga moadto, apan Dominggo kadto. Ang akong mga higala dili mga miyembro sa Simbahan.
Giingnan nako sila, “Moadto ko sa simbahan apan moikyas ko human sa panagtigom alang sa sakramento ug moapil ninyo.”
Ang akong mga higala, nga nasayod sa akong mga kahuyang, miingon, “Kon buhaton nimo kana, dili na ka makaabot. Inig-abot nimo, wala nay barbekyu.”
Ako adunay desisyon nga kinahanglang himoon. Moadto ba ko sa simbahan o sa barbekyu? Gipili nako ang barbekyu apan akong nasayran sa Dominggo sa buntag nga dili diay madayon. Nianang higayona, ulahi na kaayo ko nga moadto sa simbahan, mao nga nagpuyo na lang ko sa akong gamayng giabangan nga lawak.
Sayo niana nga kahaponon, nakadungog ko og tingog: “Dinhi ba nagpuyo si Eddie Dube?”
Ang akong presidente sa branch kadto, si John Newbold, kuyog sa iyang asawa, si Jean. Gusto ko nga motago sa ilawom sa akong higdaanan! Apan sa wala pa nako kana mahimo, anaa na sila nagbarog sa may kurtina nga nag-ulang sa akong lawak sa balay.
“Ah, Eddie,” miingon sila, “gimingaw mi nimo sa simbahan karon.”
Nagsultihanay kami og kadali, ug unya mibiya sila, ang ilang mabinationg mga pulong nga, “Eddie, gimingaw mi nimo,” nagsigeg balikbalik sa akong hunahuna. Mapasalamaton ko nila ni John ug Jean Newbold. Sukad nianang adlawa, napanalanginan ko tungod kay gitabangan ko nila nga makita, sa personal nga paagi, ang gugma ug pagpakabana sa atong Manluluwas alang sa usa ka tawo.
Sa Tinagsa-tagsa
Si Jesus isip nabanhaw nga binuhat miadto sa mga Nephita human sa Iyang pag-adto sa Iyang Amahan. Miadto Siya aron sa paghupay sa katawhan. Siya mahigugmaong midapit nila:
“Tindog ug duol kamo kanako, aron inyong ihikap ang inyong mga kamot sa akong kilid, ug usab inyong mabati ang mga agi sa lansang sa akong mga kamot ug sa mga tiil, aron masayod kamo nga ako ang Dios sa Israel, ug ang Dios sa tibuok yuta, nga gipatay tungod sa mga sala sa kalibotan.
“… Ug ila kining gihimo, miduol sa tinagsa-tagsa hangtod nga silang tanan nakaduol, ug nakita sa ilang mga mata ug nabati sa ilang mga kamot, ug nasayod sa pagkatinuod ug nagpamatuod, nga kini mao siya, ang gisulat sa mga propeta, nga moabot” (3 Nephi 11:14–15).
Unya, ang Manluluwas midapit nila sa pagdala sa tanang masakiton, nasakitan, o “gitakboyan sa bisan unsa nga matang sa sakit … ug miayo siya kanila sa matag usa dihang sila gidala ngadto kaniya” (3 Nephi 17:7, 9). Dayon Iyang “gikuha ang ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila” (3 Nephi 17:21).
Sa paghuhahuna nga 2,500 ka tawo ang anaa didto makapatandog gayod (tan-awa sa 3 Nephi 17:25). Natawo ko ug gipadako sa Africa, kanunay nakong nahunahuna ang Manluluwas nga nagbarog diha sa hayag nga adlaw, naghulat aron sa pag-ayo, paghupay, pagdasig, ug pagpakita og gugma ngadto sa tanan nga moduol Kaniya. Isip Iyang mga disipulo, kita gihangyo sa pagpangalagad niadtong anaa sa atong palibot sama sa Iyang gihimo—sa tinagsa-tagsa.
Molakaw inubanan sa Pagtuo
Ang kapangulohan sa Relief Society o sa korum sa mga elder sa inyong ward o branch, uban sa pagtugot sa bishop o presidente sa branch, misangon ninyo og mga indibidwal ug mga pamilya nga pangalagaran. Ang uban nila tingali wala kaayo kamo makaila. Tingali makuyawan kamo mahitungod sa pagbisita, pagtawag, o bisan sa pag-text nila. Tingali nabalaka kamo nga basin dili sila ganahan nga moadto kamo sa ilang balay. Apan ang inyong mga lider mainampoong naghunahuna kon unsa kaha ang kahulogan niini nga buluhaton alang ninyo ug ang mga panalangin nga mahatag niini nganha ninyo ug sa mga pamilya nga inyong pangalagaran. Busa, lakaw inubanan sa hugot nga pagtuo.
Pipila ka tuig ang milabay, mikuyog ko sa presidente sa stake didto sa habagatang-silangan sa Estados Unidos aron mobisita sa pipila ka pamilya sa wala pa ang komperensiya sa stake. Sa pag-abot namo sa usa ka balay, usa ka lalaki nga nagsul-ob og hugaw nga sinina miduol namo.
“Unsay inyong tuyo?” misinggit siya. “Dili ko ganahan nga dunay mga tawo nga moanhi sa akong balay!”
Nabalaka ko sa dihang ang batasan sa lalaki daw mahulgaon. Gusto nakong kuptan ang presidente sa stake ug modagan pabalik sa sakyanan! Apan ang presidente sa stake kalma ra kaayo. “Pasensya,” miingon siya. “Abi namo og gisultihan ka sa imong bishop nga moanhi kami.”
Samtang nagsultihanay sila, gibati gayod nako ang Espiritu. Naningkamot ko nga makabaton og kaisog, miduol sa tawo, ug miingon, “Minahal nga brother, si Presidente Thomas S. Monson [siya ang propeta nianang higayona] mihatag nako og buluhaton nga moanhi dinhi. Ania kami aron makigkita nimo. Nagdala ko sa gugma sa propeta nganha nimo.”
Mitan-aw ko sa mga mata sa tawo ug nakamatikod nga kahilakon kini. Misugod siya sa pagpakigbahin sa iyang mga problema ngari kanamo. Ang iyang asawa nag-antos og depresyon. Bag-o lang ang brother nawad-an og trabaho. Wala siyay pagkaon nga ikapakaon sa iyang mga anak. Ang presidente sa stake mipaneguro sa tawo nga ang Simbahan motabang niya ug sa iyang pamilya. Nindot kaayo ang among pagbisita.
Pipila ka semana human niana, nangutana ko sa presidente sa stake kon kumusta na siya. Giingnan ko niya nga ang bishop niini nga brother ug ang konseho sa ward mitabang niya ug nga siya ug ang iyang asawa, kinsa dili miyembro sa Simbahan, misugod sa pakigkita sa mga misyonaryo.
Ang pagpangalagad nagsugod sa pagtabang sa uban inubanan sa hugot nga pagtuo ug gugma. Samtang kita molakaw inubanan sa hugot nga pagtuo, nagsalig sa Ginoo, makapangayo kita og pagpadayag gikan Kaniya kalabot sa Iyang mga plano ug mga katuyoan alang sa atong pakighinabi sa matag usa sa Iyang mga anak. Siya motabang nato kon unsay atong isulti ug buhaton ug mogiya nato kon unsaon sa “[pag]pas-an sa mga alantoson sa usag usa, nga kini mogaan,” “pagbangotan uban niadtong nagbangotan; … paghupay niadtong nanginahanglan og kahupayan” (Mosiah 18:8–9). Kon kita mohimo niini, atong mahibaloan kon unsa gayod ka dako ang gugma sa Manluluwas ngadto sa usa ka tawo.
Unsa ka Dako ang Imong Hingpit nga Kalipay
Hangtod karon, padayon gihapon ang among kasuod nila ni John ug Jean Newbold. Sa tanan niining katuigan, gibati nako ang hingpit nga kalipay tungod sa gugma nga ilang gihatag kanako. Ug gibati nila ang hingpit nga kalipay nga nagtan-aw nako nga nag-uswag diha sa ebanghelyo. Mao kini ang mahitabo kon kita mangalagad—kita ug kadtong atong giserbisyohan masuod sa usag usa ug mas masuod ngadto sa Manluluwas.
Ang Manluluwas mitudlo nga “ang bili sa mga kalag mahinungdanon sa panan-aw sa Dios. …
“Ug kon maningkamot kamo sa tanan ninyong mga adlaw sa pagsangyaw og paghinulsol ngadto niini nga katawhan, ug makadala, og bisan usa ka kalag ngari kanako, pagkadako sa inyong kamaya uban kaniya didto sa gingharian sa akong Amahan!” (Doktrina ug mga Pakigsaad 18:10, 15).
Kon ang pagpangalagad dili ninyo prayoridad, si Presidente Russell M. Nelson mitudlo nga “kitang tanan makabuhat og mas maayo pa ug mahimong mas maayo pa kaysa kaniadto.” Ako modapit ninyo sa pag-usab ug pagbag-o. Ako mosaad nga kon kamo moapil sa pagpangalagad, kamo makakaplag og mga kasulbaran sa mga hagit nga inyong giatubang karon.
Ang saad sa Manluluwas tinuod: “Kay ang gustong magluwas sa iyang kaugalingong kinabuhi mawad-an hinuon niini. Apan ang mawad-an sa iyang kinabuhi tungod kanako makabaton niini” (Mateo 16:25).
Pinaagi sa tabang sa Manluluwas, kamo mamahimo nga matang sa tigpangalagad nga igsoong lalaki o igsoong babaye nga Iyang gikinahanglan nga kamo mamahimo aron sa paghimo og kalainan sa kinabuhi sa mga anak sa Langitnong Amahan—sa matag bililhon nga usa.