Mensahe Sa Area
Ang Langitnong Amahan Nagdapit “Ngadto ni Bisan Kinsa” sa Pagduol ngadto sa Kaniya
Ang usa ka pagdapit mao ang usa ka hangyo o tawag nga gihatag ngadto sa usa ka tawo, naghangyo kanila sa pag-apil sa o pagtambong og kalihokan. Mahimo kini nga pormal o dili pormal, gisulti o gisulat, ug nagpasabot kini nga ang tawo nga gidapit adunay kapilian sa pagdawat o pagbalibad. Ang pagdapit usa ka malumo nga tawag sa pagbuhat, pag-usab, o pagtubo—sama sa usa ka imbitasyon sa pagsunod og usa ka baroganan o paghimo og lakang ngadto sa personal nga kalamboan. Ang labing sento niini, ang usa ka pagdapit nga nag-ila sa kabubut-on—nagtanyag kini kay sa mag-insister.
Niadtong tingpamulak sa 1820, ang Dios nga Amahan ug si Jesukristo nagpakita ngadto ni Joseph Smith samtang nag-ampo siya didto sa kakahoyan duol sa iyang panimalay sa kasadpang New York. Kini nga panghitabo nailhan nga Unang Panan-awon. “Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan, ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!”
Espirituwal nga Pagdapit
Ang pagdawat sa pagdapit sa Amahan nagpasabot sa pagpili sa pagsunod ni Jesukristo. Nagpasabot kini sa pagdawat sa Iyang mga pagtulun-an, paghinulsol sa sala, pagpabunyag, pagdawat sa Espiritu Santo, ug paglahutay hangtod sa kataposan. Ang matag lakang nga atong himoon padulong ni Kristo mao ang usa ka lakang paingon sa atong Langitnong Amahan. Ang Manluluwas dili motalilkod ni bisan kinsa nga nagtinguha Kaniya. Hinuon, Siya mobayaw nato, moawhag nato, ug mogiya nato subay sa dalan sa pagkadisipulo. Ang panaw tingali lisod, apan napuno kini sa hingpit nga kalipay, kalinaw, katuyoan, ug balaan nga tabang. Unsaon?
Gikan sa sulod sa journal #222, pinitsahan og Agosto 1, 1978, nga gitumong ngadto ni Bisan kinsa, misulat si Elder Lively, “Ako gayod ang labing malipayon nga misyonaryo sa misyon. Karong gabhiona, ang pamilya Romo midawat sa bunyag sa ika-12 sa Agosto. Yahooo! Matag higayon nga among hagdon ang usa ka pamilya, dunay mogimok sa akong tibuok lawas, sama sa akong nasinati sa dili pa magsugod ang dula sa basketball. Nasayod ko nga ang akong Langitnong Amahan nagtan-aw kanato tungod kay gipanalanginan ta niya og talagsaong mga pamilya. Ganahan kaayo ko sa akong misyon dili lang karon tungod sa mga butang nga nindot kaayo apan usab kon sa mga panahon nga dili maayo ug lisod.”
Nakigsulti kami sa pamilya Romo mahitungod sa pagpuasa aron mahibaloan kon ang mensahe nga gitudlo tinuod ba, ug sila miingon—segurado, walay problema, buhaton namo kini. Ang tanan madasigon kaayo mahitungod sa tibuok sitwasyon.” Hangtod ugma!
Ang mga misyonaryo nangahas sa sa pagdapit sa pagpuasa ug pag-ampo tungod kay wala sila mahadlok nga mawala nila ang bulawanon nga pamilya kon ang pamilya dili modawat niini; hinuon, nahadlok sila nga ang pamilya dili makadawat sa mga panalangin ug gahom nga giandam sa Dios alang kanila. Si Elder Lively midugang sa sulat sa journal #238, “Ngadto ni bisan kinsa, Agosto 26, 1978, Sabado, ang bunyag sa mga Romo talagsaon kaayo. Ang tanan hapsay ra, ingon nga mao ang angay mahitabo.”
Usa ka Saad sa Kamaya ug Kalinaw
Ang pagdapit gikan sa Langitnong Amahan sa kataposan mao ang pagdapit sa kamaya. Wala Siya motawag nato ngadto Kaniya aron kita magsagubang apan sa pagpanalangin nato. Sa Iyang presensya mao ang kalinaw, gugma, ug kinabuhing dayon. Si Propeta Lehi mitudlo nga “ang mga tawo anaa, aron sila makabaton og kamaya.” ug kana nga kamaya makita sa labing hingpit sa usa ka relasyon nga nagserbisyo sa Dios. Kon moserbisyo kita Kaniya, mas masinati nato ang lawom, malahutayon nga kamaya nga dili mahatag sa kalibotan.
Sama nila ni Elder Lively ug Elder Libatique, ang pagdapit gikan sa Langitnong Amahan klaro, makanunayon, ug puno sa gugma: “Duol ngari kanako.” Wala kini gitagana alang sa hingpit apan gihatag ngadto sa tanan kinsa magpaubos sa ilang mga kaugalingon ug magtinguha Kaniya. Pinaagi ni Jesukristo, pinaagi sa gahom sa Espiritu Santo, ug uban sa sinsero nga katuyoan, ang matag usa nato makatubag niana nga tawag. Kon kita moduol ngadto sa atong Amahan, madiskobrehan nato kon kinsa gayod kita—ang Iyang hinigugma nga mga anak—ug kita makakaplag og kamaya, katuyoan, kalinaw, ug sa saad sa kinabuhing dayon diha sa Iyang presensya.
Gusto nakong ipakigbahin ang usa ka litrato sa mga igsoon nga Romo (Carolyn, Richie, Olympio Jr., Michaela, ug Carlo) uban ni Elder Lively ug sa iyang asawa – si Janet, sa miaging Abril 2025 didto sa Utah. Ang mga igsoon midawat sa pagdapit sa pagsunod sa
Ginoo ug Manluluwas, si Jesukristo, ug sa Iyang gipahiuli nga ebanghelyo. Ang akong pagdapit sa tanan, kauban sa akong pagpamatuod sa mga pulong sa atong minahal nga propeta, si Presidente Russell M. Nelson, mao: “Karon kusganon nakong ipahayag nga ang Ginoo mihangyo sa matag takos, makahimo nga batan-ong lalaki sa pag-andam ug pagserbisyo og misyon.” “Alang sa Santos sa Ulahing mga Adlaw nga mga batan-ong lalaki, ang misyonaryo nga pagserbisyo mao ang usa ka responsibilidad sa pagkapari. Kamong mga batan-ong lalaki gitagana alang niining panahona nga ang gisaad nga pagpundok sa Israel nanghitabo.”
Ako mohatag sa akong ligdong nga pagpamatuod nga ang Amahan sa Langit usa ka buhi nga Dios, si Jesus mao ang Kristo, ang akong Manluluwas ug akong Manunubos ug ang Espiritu Santo kinsa walay kinutoban nga nagdapit kaninyo ug kanako sa pagserbisyo sa atong isig ka kaigsoonan sa malipayong paagi.
Ngadto ni bisan kinsa, Hangtod ugma!