Mensahe Ng Area
Inaanyayahan ng Ama sa Langit ang “Sinuman” na Lumapit sa Kanya
Ang paanyaya ay isang kahilingan o panawagan na ipinararating sa isang tao, at hinihiling na lumahok o dumalo sa isang okasyon. Ito ay maaaring pormal o di-pormal, binibigkas o nakasulat, at nagpapahiwatig na mapipili ng taong inaanyayahan na tanggapin o tanggihan ito. Ang paanyaya ay magiliw na panawagang kumilos, magbago, o lumago—tulad ng paanyaya na sundin ang isang alituntunin o gumawa ng hakbang tungo sa personal na pag-unlad. Ang pinakamahalaga rito, ang paanyaya ay kumikilala sa kalayaan—nag-aalok ito sa halip na namimilit.
Noong tagsibol ng 1820, nagpakita ang Diyos Ama at si Jesucristo kay Joseph Smith nang manalangin ito sa isang kakayuhan malapit sa kanyang tahanan sa kanluraning New York. Ang kaganapang ito ay kilala bilang ang Unang Pangitain. “Nang tumuon sa akin ang liwanag, nakakita ako ng dalawang Katauhan, na ang liwanag at kaluwalhatian ay hindi kayang maisalarawan, nakatayo sa hangin sa itaas ko. Ang isa sa kanila ay nagsalita sa akin, tinatawag ako sa aking pangalan, at nagsabi, itinuturo ang isa---Ito ang Aking Pinakamamahal na Anak. Pakinggan Siya!”
Espirituwal na Paanyaya
Ang kahulugan ng pagtanggap sa paanyaya ng Ama ay pagpiling sundan si Jesucristo. Nangangahulugan ito ng pagtanggap sa Kanyang mga turo, pagsisisi sa mga kasalanan, pagpapabinyag, pagtanggap sa Espiritu Santo, at pagiging tapat hanggang wakas. Bawat hakbang na ginagawa natin tungo kay Cristo ay isang hakbang tungo sa ating Ama sa Langit. Hindi tinatanggihan ng Tagapagligtas ang sinumang naghahanap sa Kanya. Sa halip, tayo ay Kanyang pinasisigla, hinihikayat, at ginagabayan sa pagtahak sa landas ng pagkadisipulo. Maaaring mahirap ang paglalakbay, pero ito ay puno ng kagalakan, kapayapaan, layunin, at tulong ng langit.
Mula sa journal entry #222, na may petsang Agosto 1, 1978, patungkol sa Sinuman, isinulat ni Elder Lively, “Ako na siguro ang pinakamasayang missionary sa misyon. Ngayong gabi, pumayag na magpabinyag ang pamilya Romo sa ika-12 ng Agosto. Yahooo! Tuwing aalukin naming magpabinyag ang isang pamilya, kinikilig ang buong katawan ko, katulad lang ng nararamdaman ko bago magsimula ang isang basketball game. Naku, alam ko na binabantayan kami ng ating Ama sa Langit dahil pinagpala Niya kami ng gayon kababait na pamilya. Gustung-gusto ko ang aking misyon hindi lamang dahil sa napakaganda ng takbo ng mga bagay-bagay kundi maging sa mahihirap na pagkakataon.” Kinausap namin ang pamilya Romo tungkol sa pag-aayuno para alamin kung ang mensaheng itinuturo ay totoo, at sabi nila – sigurado, walang problema, gagawin namin iyan. Tuwang-tuwa kaming lahat tungkol dito.” Hanggang bukas!
Nangahas ang mga missionary na anyayahan silang mag-ayuno at manalangin dahil hindi sila takot na mawala ang ginintuang pamilya kung hindi nila ito tatanggapin; sa halip, takot sila na hindi matanggap ng pamilya ang mga pagpapala at kapangyarihang laan ng Diyos para sa kanila. Idinagdag ni Elder Lively ang journal entry #238, “Sa sinuman, Agosto 26, 1978, Sabado, ang galing ng binyag ng mga Romo. Naging maayos ang lahat, tulad ng nararapat.”
Isang Pangako ng Kagalakan at Kapayapaan
Ang paanyaya ng Ama sa Langit sa huli ay isang paanyaya na magalak. Hindi Niya tayo pinalalapit sa Kanya upang bigyan tayo ng pasanin kundi upang pagpalain tayo. Nasa Kanyang piling ang kapayapaan, pagmamahal, at buhay na walang hanggan. Itinuro ni Propetang Lehi na “ang mga tao ay gayon, upang sila ay magkaroon ng kagalakan” ii at ang kagalakang iyan ay matatagpuan nang lubusan sa isang relasyon ng paglilingkod na kasama ang Diyos. Habang lalo natin Siyang pinaglilingkuran, lalo nating mararanasan ang malalim at nagtatagal na kagalakang hindi kayang ibigay ng mundo. Tulad nina Elder Lively at Elder Libatique, ang paanyaya mula sa Ama sa Langit ay malinaw, palagian, at puspos ng pagmamahal: “Lumapit sa akin.” Hindi ito nakareserba para sa perpekto kundi ipinararating sa lahat ng magpapakumbaba at maghahanap sa Kanya. Sa pamamagitan ni Jesucristo, sa kapangyarihan ng Espiritu Santo, at taglay ang tapat na layunin, bawat isa sa atin ay tumutugon sa panawagang iyan. Kapag lumapit tayo sa ating Ama, matutuklasan natin kung sino tayo talaga—ang Kanyang pinakamamahal na mga anak—at makasusumpong tayo ng kagalakan, layunin, kapayapaan, at ng pangako ng buhay na walang hanggan sa Kanyang piling.
Nais kong ibahagi ang isang larawan ng magkakapatid na Romo (Carolyn, Richie, Olympio Jr., Michaela, at Carlo) kasama ang noon ay si Elder Lively at ang kanyang asawa – si Janet, noong nakaraang Abril 2025 sa Utah. Tinanggap ng magkakapatid ang paanyayang sundan ang Panginoon at Tagapagligtas na si Jesucristo at ang Kanyang ipinanumbalik na ebanghelyo. Ang aking paanyaya sa lahat, pati na ang aking patotoo sa mga salita ng ating mahal na propeta, si Pangulong Russell M. Nelson, ay: “Ngayo’y muli kong pinagtitibay nang husto na hiniling ng Panginoon sa bawat karapat-dapat at may kakayahang binatilyo na maghanda para sa at maglingkod sa misyon.” “Para sa mga binatilyong Banal sa mga Huling Araw, ang paglilingkod sa misyon ay isang responsibilidad sa priesthood. Kayong mga binatilyo ay inireserba para sa panahong ito na nagaganap ang ipinangakong pagtitipon ng Israel.”
Taimtim kong pinatototohanan na ang Ama sa Langit ay isang Diyos na buhay, si Jesus ang Cristo, aking Tagapagligtas at Manunubos at ang Espiritu Santo na walang-humpay na nag- aanyaya sa inyo at sa akin na paglingkuran ang ating mga kapwa kapatid na lalaki at babae nang may kagalakan.
Sa sinuman, Hanggang bukas!