Fakatupulaki ʻa e Tuʻunga ʻo e Akó ʻi Tonga ʻaki ha Loki Ako Foʻou ʻe Ua

Naʻe ʻikai taʻofi ʻe he ʻuha lōvaí ʻa e fiefia ʻa e ngaahi mātuʻá mo e kau akó ʻi heʻenau fakatahataha mai ke fakafiefiaʻi ʻa e tānaki foʻou ki he Ako Lotoloto ʻa e Puleʻangá ʻi Veitongo ʻi Tongá kimuí ni.

Naʻe fuʻu tokolahi ʻa e kau akó ki he ngaahi loki akó pea naʻe fiemaʻu ha solovaʻanga taimi lōloa. ʻI he fakatokangaʻi ʻe he Kautaha ʻa e Mātuʻá mo e Kau Faiakó ʻa e ngaahi polé ni, naʻá nau fetuʻutaki ai ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo kole ha tokoni ki he ngāué.

Naʻe pehē ʻe Fineasi Fūnaki, ko e pule ki he tokoni ʻofa fakaetangata ʻi he Pasifikí, “ʻOku fakataumuʻa kotoa pē ki he fānaú.”

Naʻá ne toe tānaki atu, “Ko e fānau kotoa kitautolu ʻa e Tamai Hēvaní. ʻOku lau tāpuaki mo lāngilangiʻia ʻa e Siasí mo hono ngaahi vaʻa ki he tokoni ʻofa fakaetangatá ke nau fai ha tokoni ke paotoloaki ʻa e ako leleí pea mahuʻinga tahá, ko e ako ʻetau fānaú he ko e kahaʻu kinautolu ʻo e fonuá.”

Naʻe fakahaaʻi ʻe he kau fakafofonga mei he Potungāue Akó mo e kolo ʻo Veitongó ʻa ʻenau houngaʻia ʻi he Siasí mo hono kau mēmipá ʻi heʻenau tokoní, ʻa ia ʻe ʻikai ngata pē hono tāpuekina ai ʻa e fānaú, ka ʻe kau foki ai mo e koló kotoa.

Naʻe vahevahe ʻe Falemaama Fualalo, ko e puleako ʻo e akoʻangá, ʻa ʻenau “fekumi ki ha ngaahi founga ke tokoni ai ki hono fakapaʻanga ʻa e ongo lokiako foʻou ʻe ua ko ʻení. Naʻe faifai pea tali ʻemau lotú ʻi he taimi naʻe fili ai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke tokoniʻi kimautolu ʻo fakapaʻanga hono langa ʻa e ongo lokiako ʻe ua ʻa e ʻapiakó.”

Naʻá ne tānaki atu, “ʻe fakaʻaongaʻi [foki ʻa e ongo lokiakó] ko ha senitā kumi hūfanga maʻá e kakai ʻi he koló ʻi he taimi ʻo ha faingataʻa fakaenatula.”